«Jany voś prosta pamiž damoŭ padajuć». Karpiankoŭ raskazaŭ, što drony ŭ Biełarusi padajuć i vybuchajuć amal kožny tydzień
Namieśnik ministra ŭnutranych spraŭ i kamandujučy ŭnutranych vojskaŭ Mikałaj Karpiankoŭ u intervju pres-słužbie ŭnutranych vojskaŭ paviedamiŭ toje, pra što maŭčać ułady, zaŭvažyła «Lusterka».
Karpiankoŭ skazaŭ, što drony «vielmi časta ŭ prymiežžy zalatajuć da nas», raspaviadajučy pra pracu padraździaleńniaŭ pa raźminiravańni.
Jak vynikaje z raskazu Karpiankova, tolki vypadkova ad drona nie zahinuli ludzi. Karpiankoŭ kaža, što «Boh achoŭvaje Respubliku Biełaruś».
«Voś kolki jany ŭ palach padali — stolki jany vybuchali. Ale kolki jany padali ŭ nasielenych punktach — Łojniki, u Chojevie (majucca na ŭvazie Chojniki i Łojeŭ. — Zaŭv. red.) — vy viedajecie, jany nie vybuchajuć. Jany voś prosta pamiž damoŭ voś padajuć, na darohu padajuć, da doma zastajecca 50-60 mietraŭ. I, vy viedajecie, jany nie detanujuć», — raspavioŭ Karpiankoŭ.
«I voś niemahčyma razabracca ŭ hetym dronie — u im jość samalikvidatar, pastaŭleny jon, atrymlivajecca, na samaźniščeńnie ci nie, biez čałavieka heta vyrašyć niemahčyma. I ŭsiudy miascovaść takaja — robata nie adpraviš, ničoha nie zrobiš», — dadaŭ jon.
Pavodle jaho słoŭ, da drona sapior u śpiecyjalnym kaściumie «padnosić renthien» i hladzić, što znachodzicca ŭnutry korpusa — askiepkava-fuhasny abo termabaryčny zarad. Paźniej drony adciahvajuć i ŭzryvajuć.
Karpiankoŭ zajaviŭ, što «niejkija drony źbivajucca, a niejkija drony zalatajuć, i my potym ich raźminujem — nu, heta vajna, heta nastupstvy taho, što adbyvajecca ŭ našym paŭdniovym prymiežžy».
«Heta adbyvajecca praktyčna kožny tydzień», — paviedamiŭ jon.
Dziaržaŭnuju prynaležnaść dronaŭ, što zalatajuć u Biełaruś, Karpiankoŭ nie ŭkazvaŭ.
Jak piša «Fłahštok», luty staŭ rekordnym pa kolkaści zdareńniaŭ z rasijskimi dronami ŭ Biełarusi. Padzieńni fiksavalisia jak minimum u Chojnikach, Małožynie, Mazyrskim i Homielskim rajonach i Homieli. Ułady zvyčajna nijak nie kamientujuć takija zdareńni, a miascovyja dziaržSMI nie pišuć pra takoje — niama dazvołu.
Ciapier čytajuć
Biełarus nabyŭ kvateru ŭ Ispanii, ale jaje zaniali akupasy. Ciapier jon nie moža jaje viarnuć44
Kamientary
[Zredahavana]