«Babaryku i nie treba było padtrymlivać, jon trymaŭsia dobra». Były palitviazień raskazaŭ, jak adbyvaŭ piacihadovy prysud 

«Chulihaniŭ» darohaju z KHB u RAUS?

Napiaredadni vybaraŭ u pačatku žniŭnia 2020 hoda pa krainie prakaciłasia chvala aryštaŭ aktyvistaŭ kamandy kandydatki ŭ prezidenta Śviatłany Cichanoŭskaj. Nie abminuła jana i Mazyr.

Rusłan Parfionaŭ ad samaha pačatku vybarčaj kampanii ačolvaŭ hrupu mazyrskich aktyvistaŭ, jakija dapamahali Cichanoŭskaj stać kandydatkaj i potym arhanizoŭvali jejnuju vybarčuju kampaniju ŭ rehijonie.

«6 žniŭnia (2020 hoda — red.) mianie ŭ Kalinkavičach zatrymali kadebešniki. Jany zavieźli mianie adrazu ŭ kamitet. Tam «adpracoŭvali» svaje psichałahičnyja ŭździejańni. Ja admoviŭsia ź imi razmaŭlać. A jany ŭžyli 5 roznych mietadaŭ, kab mianie razhavaryć. Spačatku niekalki čałaviek pakazvali «złoha i dobraha palicejskich», a potym pačali pa adnym zachodzić i taksama sprabavać davać parady, što lepiej mnie pačać supracoŭničać»,

— uzhadvaje Rusłan Parfionaŭ.

Pry hetym supracoŭniki KHB stracili pilnaść i navat nie zaŭvažyli, što Rusłan zmoh uziać ź ichniaha stała svoj telefon.

«Jany pakłali moj telefon prosta na stoł. Kali čarhovy raz mianialisia «apytvalniki» mnie ŭdałosia jaho sa stała skraści. Potym ja paprasiŭsia ŭ tualet. Jany mianie zaviali i tam ja zdoleŭ paviedamić usim našym, kab vychodzili z našaj supołki i čyścili listavańni sa mnoj, a taksama pavydalaŭ z telefona ŭsio niebiaśpiečnaje»,

— kaža Rusłan.

Jon pahadziŭsia dać pakazańni, jakich damahalisia kadebešniki pry ŭmovie, što vyzvalać aktyvista z Kalinkavičaŭ Dźmitryja Kajtanava i žychara Mahilova z proźviščam Tyškaviec, jaki akazaŭsia ahientam śpiecsłužbaŭ, a da taho pahadziŭsia dapamahčy Parfionavu. Pra supracu Tyškaŭca z orhanami Rusłan tady nie viedaŭ.

Pavialičyć

A druhoj hadzinie nočy Rusłana zavieźli ŭ izalatar časovaha ŭtrymańnia Mazyrskaha RAUS. Na nastupny dzień u jaho byŭ sud u administracyjnaj spravie za chulihanstva:

«U sudzie byli ja, sakratar, sudździa i mient. A ja nie razumieŭ uvohule, za što mianie sudziać. Kažu: «Dajcie mnie choć jakija pratakoły aznajomicca. Za što vy mianie sudzicie?» Jana [sudździa — red.] mnie daje pratakoł. Tam pra toje, što ja nibyta išoŭ vulicaj 17 vieraśnia ŭnačy i nibyta spraŭlaŭ naturalnyja patreby, a da mianie padyšli milicyjanty, ja im akazaŭ supraciŭ i mianie zatrymali. Ja joj kažu, što ja byŭ u Kamitecie dziaržbiaśpieki i z dvara hetaha kamiteta mianie na «varanku» zavieźli ŭ dvor RAUS, dzie i kali ja moh spraŭlać hetyja patreby? Jana ździviłasia, ale ŭsio adno dała 10 sutak [aryštu — red.]».

Častku administracyjnaha aryštu Rusłana Parfionava trymali ŭ IČU Naraŭlanskaha RAUS, bo ŭ Mazyry paśla daty vybaraŭ i nastupnych pratestaŭ nie chapała miesca. Mienavita tady ŭ Mazyrskim RAUS byli asabliva žorstkija katavańni ŭdzielnikaŭ pratestaŭ suprać falsifikacyi vynikaŭ prezidenckich vybaraŭ.

Pavialičyć

Dva dni na voli i novaje zatrymańnie

17 žniŭnia 2020 hoda jaho vyzvalili ź IČU paśla adbyćcia aryštu. Na voli jon prabyŭ dva dni.

«Ja ŭžo dumaŭ va Ukrainu źjazdžać. Maja dačka lažała ŭ lakarni. Ja dumaŭ, zajedu da dački, adviedaju jaje i pajedu adrazu va Ukrainu. I tak i nie dajechaŭ. Ranicaj 19 žniŭnia ja jechaŭ z Kalinkavičaŭ. Mianie spynili na kolišnim paście DAI pamiž Kalinkavičami i Mazyrom. I potym u supravadžeńni dvuch ekipažaŭ DAI — śpieradu i zzadu, ź mihałkami, zaviali ŭ RAUS. A ŭžo adtul adrazu mianie zavieźli ŭ Śledčy kamitet u Minsk. Tam ja daŭ tyja samyja pakazańni, što i ŭ KDB davaŭ — što zrabiŭ sam tyja «vožyki», kab bolš nikoha nie pryplatać da hetaj spravy»,

— kaža Rusłan Parfionaŭ.

U prapahandysckim videasiužecie, pakazanym na dziaržaŭnym kanale «ONT», Rusłana Parfionava abvinavacili ŭ vyrabie niejkich «vožykaŭ», jakija musili prabivać koły transpartnych srodkaŭ siłavikoŭ. Rusłan kaža, što tyja «vožyki» sapraŭdy byli, ale rabiŭ ich nie jon. Jamu ich dali i jon dumaŭ, jak ich dastavić u Minsk.

U čacie aktyvistaŭ kamandy Cichanoŭskaj heta ŭziaŭsia zrabić adzin chłopiec z Mahilova — toj samy Tyškaviec. Mienavita jaho i pakazali ŭ prapahandysckim videa, pradstaviŭšy Rusłanam Parfionavym. Ale Tyškaviec akazaŭsia sakretnym supracoŭnikam śpiecsłužbaŭ, ukarenienym u supołki aktyvistaŭ Cichanoŭskaj.

Pavialičyć

«Ja kazaŭ i kahebešnikam i ŭ SK, što heta ŭsio majo, ja rabiŭ tyja «vožyki» na leciščy sam, sam chacieŭ advieźci ŭ Miensk i nichto mnie nijakaha spryjańnia ŭ hetym nie nadavaŭ. Maja meta była ŭ tym, kab pazbavić ad pieraśledu inšych, u tym liku taho Tyškaŭca, bo ja nie viedaŭ, što jon supracoŭničaje sa śpiecsłužbami Łukašenki»,

— tłumačyć Parfionaŭ.

Haładoŭka ŭ IČU

Padčas suda Rusłana Parfionava trymali ŭ SIZA № 3 u Homieli. Da taho ž jon sa žniŭnia pa listapad 2020 hoda znachodziŭsia ŭ SIZA № 1 na vulicy Vaładarskaha ŭ Minsku, a paśla taho, jak śledstva skončyłasia, jašče niejki čas jaho ŭtrymlivali ŭ turmie ŭ Žodzinie.

U pierapynkach pamiž sudovymi pasiadžeńniami Rusłana trymali ŭ Mazyrskim IČU. Tam jon trapiŭ u kamieru z čałaviekam sa złačynnaha asiarodździa, ź jakim u jaho zaviazalisia siabroŭskija stasunki i toj padaryŭ jamu markier. Rusłan hetym markieram napisaŭ na nary nazvu telehram-kanała, jaki administravaŭ da zatrymańnia, — «Mozyŕ dla žiźni».

«Mianty, kali pabačyli hety nadpis, jany ašaleli. Mianie vyklikali da načalnika IČU. Jon pačaŭ mnie ŭcirać, što, u hetym kanale iduć abrazy milicyjantaŭ i ŭłady, roznyja niepryjemnyja vykazvańni pra ich. Ja jamu tłumačyŭ, što paśla taho, što adbyłosia ŭ žniŭni, jany musiać być udziačnyja biełarusam, što ichniaja złość vylivajecca tolki ŭ internet-kamientary, a nie ŭ fizičnaje ŭździejańnie na tych, chto rabiŭ biezzakońnie i hvałt. U vyniku mianie ŭpieršyniu ŭ Mazyrskim IČU načalnik pastanaviŭ pasadzić u ŠIZA. Ja staŭ pieršaadkryvalnikam ŠIZA ŭ IČU ŭ Mazyry»,

— žartuje Rusłan Parfionaŭ.

Rusłan vyrašyŭ pratestavać suprać hetaha i abviaściŭ haładoŭku.

«Ja napisaŭ aficyjnuju zajavu, što ja admaŭlajusia ad ježy. I hetyja troje sutak ja haładaŭ, a praz troje sutak mianie vypuścili i znoŭ pasadzili ŭ kamieru z tym samym čałaviekam, jaki padaryŭ mnie markier. Možna skazać, što zadavolili maje patrabavańni»,

— havoryć Rusłan.

Navapołack: samaja žorstkaja kałonija Biełarusi

«3 sakavika mnie dali piać hadoŭ, 19 traŭnia razhledzieli apielacyju i 9 červienia mianie ŭžo zavieźli ŭ Navapołack. Spačatku tam było vielmi žorstka. Vielmi žorstka było, pakul nie źniali hetaha Palčyka (były načalnik Navapołackaj kałonii № 1 Andrej Palčyk — red.). A źniali jaho praz toje, što adzin z «palityčnych» — Vadzim Chižniakoŭ daŭ intervju pra hetaha Palčyka. Paśla hetaha intervju jaho źniali z pasady i panizili ŭ zvańni z pałkoŭnika da majora. A da taho jon tam lutavaŭ. Šmat faktaŭ źbićcia. I nie tolki datyčna mianie, ale i mnohich inšych. Babaryki taho ž»,

— uzhadvaje Rusłan Parfionaŭ.

Pavialičyć

Andrej Palčyk — kolišni načalnik navapołackaj kałonii № 1

Rusłan kaža, što asabliva pieraduziata stavilisia jakraz da «palityčnych». Supracoŭniki kałonii rabili vyhlad, što nijakaha asablivaha staŭleńnia da «žoŭtabiračnikaŭ» niama, ale schavać heta było niemahčyma.

«Mnie davodziłasia svarycca z kiraŭnictvam kałonii. Jany zabaranili, kab mnie addavali listy, jakija mnie pisali. Ale ja damohsia, što listy stali da mianie dachodzić. Dva razy ja navat chacieŭ zładzić niejki pratest usiaredzinie kałonii. Za heta mianie sadžali ŭ ŠIZA. A ŠIZA tam žorstkaje. Samaje strašnaje katavańnie tam — heta choład. Choład tam luty. Ty prosta navat unočy nie śpiš, bo ty vymušany niejak sahravacca. To-bok ty musić adciskacca, fizičnyja praktykavańni niejkija rabić, kab chacia b troški sahrecca. I heta treba rabić chacia b kožnyja paŭhadziny. A tam jašče jość takija nary, jakija stajać prosta pad adčynienym aknom. A inšaje akno adčynienaje na «pradoł». I ty lažyš prosta na skraźniaku. Ja admaŭlaŭsia kłaścisia na hetyja nary i mnie za heta dadavali jašče 10 sutak ŠIZA»,

— raskazvaje Parfionaŭ.

Babaryku źbivali ludzi ŭ cyvilnym, jakija pryjechali ŭ kałoniju na busie

«Z [Viktaram]Babarykam my stasavalisia amal kožny dzień. Niadoŭha, ale časta. Kali my vychodzili z pramzony na abied i kali vychodzili sa stałoŭki, treba było pašychtavacca. I pakul my išli šychtavacca, u nas było niekalki chvilin, kab pierakinucca paraj słovaŭ. U asnoŭnym abmiarkoŭvali situacyju, jakaja zaraz u krainie. Staralisia padtrymać adno adnaho. Chacia, u pryncypie, jaho i nie treba było padtrymlivać, jon trymaŭsia dobra. Da taho vypadku, jaki ź im adbyŭsia»,

— uzhadvaje Rusłan Parfionaŭ svaje znosiny z mahčymym jašče adnym pretendentam na kandydata na prezidenta na vybarach 2020 hoda.

Rusłan kaža, što źbivali Viktara Babaryku nie supracoŭniki kałonii:

«Pryjazdžali niejkija ludzi ŭ cyvilnym na busie. Nie viedaju na jakich padstavach jany zajšli ŭ zonu. Jaho vyciahnuli z kamiery, zaviali ŭ prahułačnyja dvoryki. Tam źbili jaho. Potym jaho musili zavieźci ŭ lakarniu. Heta dakładnaja infarmacyja. Mnie heta raskazvaŭ čałaviek, jak dakładna viedaje, što tam adbyłosia. I potym ža jaho na hetym ža busie ź lakarni i pryvieźli. Jaho znoŭ ža zaviali ŭ zonu tyja ž samyja ludzi, jakija jaho i źbivali»,

— kažy były palitźniavoleny navapołackaj kałonii.

Pieravod u «Voŭčyja nory»

Rusłan kaža, što niedzie da kanca 2023 hoda tym, chto nie padparadkoŭvajecca kiraŭnictvu kałonii, pryznačali źmienu režymu i adpraŭlali ŭ turmy. A paźniej pačali zavodzić spravy pavodle artykuła 411 Kryminalnaha kodeksa i dadavać terminy źniavoleńnia.

«Ja adčuvaŭ, što i mnie rychtujuć pieravod u «krytuju» turmu. I ja, jak by, pakazvaŭ, što ja jakraz chaču źjechać z Navapołacka ŭ «krytuju». Ale kiraŭnictva, kali daviedvałasia žadańni viaźnia, rabiła ŭsio naadvarot. I kali jany daviedalisia, što ja chaču ŭ «krytuju», jany zrabili ŭsio, kab prosta pieravieści mianie ŭ inšuju kałoniju. Nie viedaju, čamu jany heta rabili. Tady, jak my zrazumieli, u ich adbyvałasia niejkaja pierturbacyja — partyi źniavolenych prosta brali i pieravozili z kałonii ŭ kałoniju»,

— havoryć Rusłan.

Tak jon trapiŭ u viadomuju kałoniju «Voŭčyja nory» kala vioski Damanava Ivacevickaha rajona.

«Ja skažu tak: u paraŭnańni z Navapołackam «Voŭčyja nory» — heta sanatoryj. Chacia, tam ja ŭžo troški parachmanieŭ. Pa-pieršaje, siarod tych, chto tam siadzieŭ, ja nie pabačyŭ blizkich mnie ducham ludziej, hatovych niečaha damahacca. Ja ich razumieju, bo nie kožny choča pakutvać. A, kab niečaha damahčysia, treba prajści praz pakuty. A pa-druhoje, i padumaŭ, što mnie zastaŭsia hod i treba niejak jaho ŭžo dasiadzieć. Vyrašyŭ, jak kažuć u «zonie» — «nie vyłazić u efir». Ale tam takaja «kałchoznaja» zona — niejkaje biazładździe. Jano trochi hraje na ruku źniavolenym. Ale kali ty chočaš niešta zrabić pavodle zakonu, afiyjna to heta vielmi ciažka zrabić, bo jany [supracoŭniki kałonii — red.] prosta nie robiać hetaha»,

— paraŭnoŭvaje Rusłan Parfionaŭ.

Imiony kataŭ

I ŭ Navapołacku, i ŭ «Voŭčych norach» byli supracoŭniki kałonii, jakija čynili asabliva žorstkija parušeńni da źniavolenych. Rusłan Parfionaŭ namahajecca adnavić ichnija proźviščy:

«Ja vioŭ zapisy, u mianie byŭ natatnik, u jaki ja ŭ zašyfravanym vyhladzie zapisvaŭ i proźviščy tych, chto asabliva žorstka staviŭsia da źniavolenych, i niejkija vypadki. Ale ŭ ivacevickaj kałonii ŭ mianie zabrali moj natatnik. Z kałonii pad Ivacevičami ja jašče sam šmat kaho pamiataju, a z navapołackaj kałonii mnohija proźviščy ŭžo zabylisia. Ale ja maju namier praz razmovy z tymi, chto vyzvaliŭsia z hetych kałonij adnavić toje, što ja zapisvaŭ».

Rusłan pryhadaŭ proźviščy tych supracoŭnikaŭ Ivacevickaj kałonii, jakich, praź ichniuju žorstkać, jon najbolš zapomniŭ:

«Namieśnik pa režymna-apieratyŭnaj rabocie, proźvišča Mołaš — heta samy taki žorstki. Potym načalnik režymnaj častki Dylko — asabliva pieraduziata stavicca da palityčnych».

Pavialičyć

Rusłan Parfionaŭ paśla vyzvaleńnia z kałonii

«Nie źbirajusia mirycca z tym, što nie adpaviadaje rečaisnaści»

Paśla vyzvaleńnia Rusłan Parfionaŭ pryjechaŭ dadomu i zrazumieŭ, što jamu nie daduć spakoju na voli i, chutčej za ŭsio, znoŭ źniavolać. Tamu jon vyrašyŭ evakujavacca ź Biełarusi. Zaraz jon znachodzicca ŭ adnosnaj biaśpiecy ŭ adnoj z krain Jeŭropy. Ale jon nie źbirajecca curacca svaich pohladaŭ:

«Na etapach časam kanvairy vyciahvali mianie na razmovy pra toje, za što i navošta my zmahalisia. Na adnym z epataŭ ja spytaŭ u takoha kanvaira: «Ty vieryš u 80%?» I jon skazaŭ, što nie vieryć. I tady ja jamu skazaŭ, što ja nie pavieryŭ i ja nie pahadziŭsia z hetym, i za heta ja siadžu. A ty nie pavieryŭ i źmiryŭsia z hetym, padaryŭ hetyja adsotki. Ciabie padmanuli. I ciabie jašče padmanuć i nie raz. I ty, atrymalivajecca, prosta ciarpiła. Žyvi z hetym. A ja nie źbirajusia mirycca z tym, što nie adpaviadaje rečaisnaści. Tak, ja paciarpieŭ. Ale majo sumleńnie čystaje i pierad samim saboj, i pierad ludźmi, i, najpierš, pierad svajoj dačkoj».

• 31
• 1
• 1
• 0
• 0
• 0
• 1
• 4