Polskaja prakuratura nie daje zhody na razhałošvańnie infarmacyi pa spravie Mielnikavaj
Źniknieńnie śpikierki Kaardynacyjnaj rady Anžaliki Mielnikavaj rasśleduje Departamient pa spravie arhanizavanaj złačynnaści i karupcyi Nacyjanalnaj prakuratury Polščy. U viedamstvie zajavili «Biełsatu», što na hetym etapie śledstva anijakich padrabiaznaściaŭ raskryvać nie buduć.
Rasśleduje źniknieńnie śpikierki Kaardynacyjnaj rady Anžaliki Mielnikavaj Lublinski adździeł Departamienta pa spravach arhanizavanaj złačynnaści i karupcyi. Heta strukturnaja adzinka Nacyjanalnaj prakuratury Polščy.
16 krasavika była zaviedziena kryminalnaja sprava pavodle faktu źniknieńnia hramadzianki Biełarusi i Polščy. Na pytańnie karespandenta «Biełsata», na jakim etapie ciapier śledstva i ci vyznačanaja hałoŭnaja viersija, pradstaŭnica Nacyjanalnaj prakuratury Katažyna Caleŭ-Jašeŭska paŭtaryła, što spravu daručyli Ahienctvu ŭnutranaj biaśpieki i razhladajecca ŭ tym liku vykradańnie:
«Pačataje rasśledavańnie, u pryvatnaści, pavodle artykułu «niezakonnaje pazbaŭleńnie voli». Spravu daručyli Ahienctvu ŭnutranaj biaśpieki z metaj vyśvietlić akaličnaści, što mohuć być źviazanyja sa źniknieńniem paciarpiełaj. Na hetym etapie razboru prakuror, jaki viadzie spravu, nie daje zhody na razhałošvańnie dalejšaj infarmacyi».
Pra źniknieńnie śpikierki Kaardynacyjnaj rady Anžaliki Mielnikavaj jaje kalehi paviedamili ŭviečary 28 sakavika. U zajavie Paŭła Łatuški havaryłasia, što suviaź adsutničaje z 25 sakavika, adnak havorka idzie pra anłajn-kamunikacyju. Nasamreč Mielnikavu ŭžyvuju nie bačyli ŭžo daŭnym-daŭno. Paźniej stała viadoma, što Anžalika Mielnikava pakinuła terytoryju Jeŭrasajuza 26 lutaha, a jaje były muž źjechaŭ z Polščy ŭ Biełaruś 3 sakavika.
7 krasavika žurnalistam «Lusterka» ŭdałosia parazmaŭlać z byłym mužam Anžaliki Mielnikavaj, jaki paćvierdziŭ, što znachodzicca ŭ Biełarusi, a dzieci — pry im. Baćki Mielnikavaj u razmovie z žurnalistam «Jeŭraradyjo» taksama paćvierdzili, što dzieci znachodziacca ŭ Biełarusi, a pra miescaznachodžańnie samoj Anžaliki jany sami ničoha nie viedajuć i tryvožacca.
8 krasavika vice-śpikierka Kaardynacyjnaj rady Stanisłava Hlińnik, jakaja ciapier vykonvaje abaviazki śpikierki, paviedamiła, što 13 sakavika z akaŭnta Anžaliki Mielnikavaj byli spampavanyja fajły, da jakich jana mieła dostup u ramkach pracy Kaardynacyjnaj rady. Siarod ich — stratehičny płan, biudžet, unutranyja dakłady i inšyja apieracyjnyja materyjały pačynajučy ź lipienia 2024 hoda.
10 krasavika telekanału «Biełsat» stała viadoma, što z rachunka fondu Białoruś Liberty, zasnavanaha Anžalikaj Mielnikavaj, źniali hrošy. Zrabiła heta jana sama ci chto inšy, pakul nieviadoma.
14 krasavika stała viadoma, što rasśledavańnie źniknieńnia Anžaliki Mielnikavaj u Polščy pieraviali na bolš vysoki ŭzrovień — zamiest Varšaŭskaj akruhovaj prakuratury hetym budzie zajmacca Nacyjanalnaja prakuratura. Na dumku śledčych, spravu pavinny rasśledavać prakurory, jakija zajmajucca najbolš važnymi spravami, u tym liku pytańniami špijanažu.
Anžalika Mielnikava chacieła vykupić biełaruski fond ź Biełastoka
«Ja naohuł nie ŭ kursie». U niaśvižskaj milicyi raskazali, ci šukajuć Anžaliku Mielnikavu
«Jana pracavała i atrymlivała zarobak». NAU adkazaŭ nakont hrošaj Mielnikavaj
Mielnikava prasiła, kab jaje apošniaje zapisanaje intervju vyjšła raniej za siaredzinu sakavika
«Mielnikava pazyčała hrošy aktyvistam u Varšavie i nie prasiła viarnuć»
Raźviedka ZŠA: Biełaruś stała pieradavym vajskovym płacdarmam Rasii24
Kamientary