Anžalika Mielnikava chacieła vykupić biełaruski fond ź Biełastoka
Telekanał «Biełsat» parazmaŭlaŭ ź biełastockim aktyvistam, źviazanym z fondam Białoruś 2020, dzie Anžalika Mielnikava pracavała paśla svajho pryjezdu ŭ Polšču i ź jakoha faktyčna i pačałasia jaje palityčnaja karjera.
Surazmoŭca, jaki pažadaŭ zastacca nienazvanym, byŭ znajomy nie tolki ź dziejnaściu fondu Białoruś 2020, ale i z samoj Anžalikaj Mielnikavaj. Źviazana heta było jakraz z pracaj u fondzie.
Sam fond źjaviŭsia ŭ 2021 hodzie i byŭ adkazam na padziei ŭ Biełarusi. Heta była «sproba arhanizavacca paśla padziejaŭ 2020 hoda» siarod biełarusaŭ, jakija ładzili akcyi ŭ Biełastoku i sprabavali dapamahać uciekačam, raskazaŭ surazmoŭca.
Ź jaho słoŭ, Anžalika Mielnikava źjaviłasia ŭ Biełastoku ŭ 2021 hodzie, ale jak jana znajšła zhadany fond, jon nie viedaje.
Naohuł charaktaryzuje žančynu jak asobu davoli skrytnuju. Jana ničoha nie raskazvała pra siabie, addajučy pieravahu «śvieckim» razmovam jak srodku padtrymańnia kantaktaŭ ź ludźmi.
Ciapier, kali Anžalika źnikła, supolnyja znajomyja sprabujuć uzhadać niejkija akaličnaści jaje žyćcia, jakija mahli by pralić śviet na hetuju situacyju, ale nichto nie moža ŭspomnić navat taho, jak jana źjaviłasia siarod biełastockich biełarusaŭ.
Chiba tolki zhadvajuć, što lubiła padarožničać, u tym liku ŭ ciopłyja krainy — Turcyju, Jehipiet i Abjadnanyja Arabskija Emiraty. Ale nikoli nie dzialiłasia padrabiaznaściami svaich padarožžaŭ. Pry hetym kalehi viedali, što ŭ jaje jość dzieci i jany znachodziacca ŭ Biełarusi, a z mužam jana razvodzicca.
Ale tady byŭ taki čas, kali nikoha jašče nie ździŭlała źjaŭleńnie novych nieviadomych raniej ludziej źniadkul, uzhadvaje surazmoŭca: «Jak kazali ŭ 2020-m, «my nie znali druh druha do etoho leta». Tady ŭ demakratyčnym asiarodździ źjaŭlalisia i źnikali ludzi, pra jakich nie było viadoma nadta šmat, dy i sam ruch byŭ «zialony».
U fondzie Białoruś 2020 Anžalika Mielnikava źjaviłasia ŭ studzieni 2022 hoda, uzhadvaje surazmoŭca. Što tyčycca pracy, to jon charaktaryzuje źnikłuju śpikierku jak vielmi aktyŭnuju i metanakiravanuju.
«Jana źjaviłasia vielmi chutka, adrazu prapanavała svaje pasłuhi jak asoby, jakaja ŭmieje pisać prajekty», — kaža surazmoŭca pra dałučeńnie Mielnikavaj da pracy fondu.
Patrebnaja praca i hrošy, tłumačyła jana svaju aktyŭnaść.
«Jana ŭvieś čas kazała, što joj treba zarabić na kvateru, bo jana tut razvodzicca z mužam, joj treba dziejničać, pracavać… Tłumačeńnie było typova biznesovaje», — śćviardžaje surazmoŭca.
Praca ŭ fondzie nie była praciahłaj. Litaralna praz paru miesiacaŭ Anžalika paviedamiła, što źbirajecca pierajechać u Varšavu. Za hety karotki čas jana paśpieła papracavać tolki nad adnym prajektam.
Jon tyčyŭsia dapamohi ŭciekačam ź Biełarusi i Ukrainy. Surazmoŭca, darečy, nie vyklučaje, što Mielnikava mieła dostup da imionaŭ ludziej, jakija karystalisia prajektam, choć, pa jaho słovach, sama praca i była «techničnaja».
Adjezd ź Biełastoka byŭ vielmi chutki, nastolki, što spravazdaču pa pracy nad prajektam jana dasyłała ŭžo z Varšavy.
Cikava, što zakončyŭšy pracu nad prajektam, Anžalika Mielnikava prapanavała vykupić fond Białoruś 2020 za hrošy. Voś hetamu ŭ fondzie ŭžo ździvilisia: niejkaja asoba, nie viadomaja ŭ demakratyčnym ruchu, raptam choča kupić fond, jaki «mieŭ za saboj bekhraŭnd biełastockich pratestaŭ». I admovili.
Fond Białoruś 2020 dahetul praciahvaje dziejnaść, źviazanuju ź biełaruskaj kulturaj i dyjasparaj. Zasnavalnica i tahačasnaja kiraŭnica fondu admoviłasia kamientavać «Biełsatu» historyju ź Mielnikavaj.
Pra źniknieńnie śpikierki Kaardynacyjnaj rady Anžaliki Mielnikavaj jaje kalehi paviedamili ŭviečary 28 sakavika. U zajavie Paŭła Łatuški havaryłasia, što suviaź adsutničaje z 25 sakavika, adnak havorka idzie pra anłajn-kamunikacyju. Nasamreč Mielnikavu ŭžyvuju nie bačyli ŭžo daŭnym-daŭno. Paźniej stała viadoma, što Anžalika Mielnikava pakinuła terytoryju Jeŭrasajuza 26 lutaha, a jaje były muž źjechaŭ z Polščy ŭ Biełaruś 3 sakavika.
7 krasavika žurnalistam «Lusterka» ŭdałosia parazmaŭlać z byłym mužam Anžaliki Mielnikavaj, jaki paćvierdziŭ, što znachodzicca ŭ Biełarusi, a dzieci — pry im. Baćki Mielnikavaj u razmovie z žurnalistam «Jeŭraradyjo» taksama paćvierdzili, što dzieci znachodziacca ŭ Biełarusi, a pra miescaznachodžańnie samoj Anžaliki jany sami ničoha nie viedajuć i tryvožacca.
8 krasavika vice-śpikierka Kaardynacyjnaj rady Stanisłava Hlińnik, jakaja ciapier vykonvaje abaviazki śpikierki, paviedamiła, što 13 sakavika z akaŭnta Anžaliki Mielnikavaj byli spampavanyja fajły, da jakich jana mieła dostup u ramkach pracy Kaardynacyjnaj rady. Siarod ich — stratehičny płan, biudžet, unutranyja dakłady i inšyja apieracyjnyja materyjały pačynajučy ź lipienia 2024 hoda.
10 krasavika telekanału «Biełsat» stała viadoma, što z rachunka fondu Białoruś Liberty, zasnavanaha Anžalikaj Mielnikavaj, źniali hrošy. Zrabiła heta jana sama ci chto inšy, pakul nieviadoma.
14 krasavika stała viadoma, što rasśledavańnie źniknieńnia Anžaliki Mielnikavaj u Polščy pieraviali na bolš vysoki ŭzrovień — zamiest Varšaŭskaj akruhovaj prakuratury hetym budzie zajmacca Nacyjanalnaja prakuratura. Na dumku śledčych, spravu pavinny rasśledavać prakurory, jakija zajmajucca najbolš važnymi spravami, u tym liku pytańniami špijanažu.
«Ja naohuł nie ŭ kursie». U niaśvižskaj milicyi raskazali, ci šukajuć Anžaliku Mielnikavu
«Jana pracavała i atrymlivała zarobak». NAU adkazaŭ nakont hrošaj Mielnikavaj
Mielnikava prasiła, kab jaje apošniaje zapisanaje intervju vyjšła raniej za siaredzinu sakavika
«Mielnikava pazyčała hrošy aktyvistam u Varšavie i nie prasiła viarnuć»
Eks-muž Mielnikavaj: Pra źniknieńnie Anžaliki nikudy nie źviartaŭsia, nie baču sensu
Ciapier čytajuć
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku2323
Kamientary