Płanujecca, što Pucin pieradaść jaho Donaldu Tusku 7 krasavika na sustrečy ŭ katyńskim lesie.
Rasijskija śpiecsłužby terminova šukajuć u svaich archivach śpis polskich aficeraŭ i pradstaŭnikoŭ ich siemjaŭ, što byli zabityja na terytoryi Biełarusi viasnoj 1940 h.
Hety śpis na siońnia źjaŭlajecca samaj vialikaj tajamnicaj vajennych złačynstvaŭ SSSR u dačynieńni da polskich vajennapałonnych aficeraŭ. Ab jaho isnavańni dakładna nieviadoma, adnak isnujuć uskosnyja śviedčańni ab jaho realnaści. U pryvatnaści, isnuje padobny śpis polskich aficeraŭ i členaŭ ich siamiej, što byli represavanyja na terytoryi Zachodniaj Ukrainy.
Viadoma, što FSB zaniałasia pošukami dakumientaŭ ź inicyjatyvy Uładzimira Pucina. Jon choča pieradać śpisy represavanych palakaŭ Donaldu Tusku padčas uračystaściaŭ, što majuć adbycca ŭ Katyni 7 krasavika.
Imiony rasstralanych na terytoryi Ukrainy vajennapałonnych stali viadomyja na pačatku 90-ych hadoŭ. Tady źjaviŭsia tak zvany «ukrainski katyński śpis» – akty NKVD ab rasstrele palakaŭ na terytoryi Zachodniaj Ukrainy. Va ŭkrainskim śpisie 3435 proźviščaŭ.
Kali ich adniać ad ahulnaj kolkaści zabitych na terytoryi Biełarusi i Ukrainy – 7305 čałaviek – to možna mierkavać, što ŭ Biełarusi było rasstralana 3870 palakaŭ. Miarkujecca, što bolšaść ź ich byli rasstralanyja ŭ Kurapatach, adnak dakładnych źviestak ab hetym niama.
Kali «biełaruski śpis» usio ž znojdziecca, jon moža častkova pralić śviatło na jašče adnu trahičnuju staronku historyi Biełarusi. Možna nie sumniavacca, što siarod rasstralanych viasnoj 1940 hoda polskich aficeraŭ i členaŭ ich siamiej było šmat biełarusaŭ.
Ciapier čytajuć
Statkievič raskazaŭ, jak vyžyvaŭ u źniavoleńni. I čym zajmajecca ciapier1
Kamientary