«Staŭleńnie jak da skaciny». Prarasijski błohier raskazaŭ pra 25 sutak ŭ IČU

Alaksiej Kavalenka rodam z rasijskaha Narylska, ale ŭ 90-ja jaho siamja pierajechała va Ukrainu. Tam jon pražyŭ kala 20 hadoŭ, pakul u 2016-m nie pierabraŭsia ŭ Polšču.

Z pačatkam paŭnamaštabnaj vajny Kavalenka rušyŭ u Rasiju, ale źbiraŭsia ŭ vyniku asieści ŭ Biełarusi. Jon kazaŭ biełaruskim prapahandystam, što płanuje ładzić u našaj krainie miedyjabiznes z rasijskimi błohierami. 

Ale ž niekalki miesiacaŭ tamu Kavalenka źnik. Paźniej stała viadoma, što mužčynu zakinuli na 25 sutak u IČU Minskaha rajona. Pryčynaj Alaksiej nazyvaje toje, što jon zapisaŭ rolik pra pracu dziaržustanoŭ na minskaj vulicy Cimirazieva — tam znachodzicca adździeł pa hramadzianstvie i mihracyi Centralnaha rajona i mižrajonny rehistracyjny adździeł minskaha DAI. Za heta na jaho byccam by razzłavalisia ŭ RUUS Minskaha rajona. 

Ciapier Kavalenka zapisaŭ rolik pra toje, jak prajšli tyja 25 sutak. Alaksiej kaža, što ŭ IČU siadziać ludzi z administratyŭkami, ale ŭmovy dla ich vielmi žorstkija — staviacca jak da «zakaraniełych zekaŭ»:

«Staŭleńnie jak da skaciny. Tam nielha kuryć, tamu što jon (načalnik IČU — NN) zabaraniŭ. Pryčym nie tolki siadzielcam nielha kuryć, ale i piersanału. Tam nielha lažać na narach, chacia nary tam nie prystasavanyja dla taho, kab na ich siadzieć. Nielha zakidvać nohi na nary.

Ty prosta siadziš, nibyta ty kahości zabiŭ i tabie dali 25 hadoŭ turmy. Tam nie vyvodziać na špacyry, chacia pa zakonie jany abaviazanyja vyvodzić dvojčy na dzień pa paŭhadziny. Nas vyvodzili adzin raz na piać dzion, i toje kali my ŭžo vyprošvali padychać śviežym pavietram. Bo ŭjavicie — kamiera na vosiem čałaviek, a nas u joj 24 siadzić».

Udzień viaźniam nielha spać, i štoranicy ŭ ich pravierki:

«Ciabie jak apošniaha hada vyvodziać, staviać na raściažku i abšukvajuć. Kali da mianie pryjechaŭ čałaviek, kab pieradać mnie pieradačku, jamu ŭvohule skazali, što mianie tam niama, razumiejecie? Jon chacieŭ mnie pieradać ježu, choć niešta — nie.

Načalnik IČU zabaraniŭ zubnyja ščotki, zubnyja pasty, myła, šampuni. Jany zabirajuć usio! Kab vy razumieli — niekatorych ludziej, jakija tudy pryjazdžali i im davali sutki, prymušali całkam raspranacca i prysiadać. Heta što? Heta ŭ nas IČU ci niejkaje ŠIZA, strohi režym?»

Kali viaźni vyražajuć niazhodu ź niečym, na ich, kaža Alaksiej, nadziavajuć kajdanki i pačynajuć ich krucić, heta vielmi baluča. 

Paśla sutak Alaksiej atrymaŭ departacyju i zabaronu pryjazdžać u Biełaruś ciaham 5 hadoŭ. Błohiera nibyta paprasili maŭčać, ale jon abiacaje dajści da Łukašenki, kab razabracca.

• 4
• 1
• 56
• 7
• 1
• 1
• 1
• 0