Na pryłaŭkach staličnaha Kamaroŭskaha rynku dniami zaŭvažyli pa-sapraŭdnamu «załatuju» čarešniu. Za kiłahram adbornaj ispanskaj sadaviny prosiać 150 rubloŭ, a čarešniu krychu mienš prezientabielnaha vyhladu hatovyja addać nie mienš, čym za 120 rubloŭ za kiło. Telegraf.news pahladzieŭ, jak vyhladaje situacyja z cenami na inšyja vidy sadaviny i jahad na staličnych rynkach za niekalki tydniaŭ da pačatku letniaha siezona.
Miarkujučy pa kamientarach, pakinutych karystalnikami tyktoka pad videa z «załatoj» čarešniaj, ceny na hetuju jahadu pakul usiudy ŭ Biełarusi ŭražvajuć.
«Załataja čarešnia. Na śmietnik chutka vyviezuć. Heta dakładna nie pa našych hrošach i zarobkach. Kupili b, kali heta b vyratavała ad strašnaj chvaroby abo ad śmierci», — adznačyła adna z hladačak.
Inšaja raskazała, što ŭ Homieli čarešnia zaŭvažanaja «ŭsiaho tolki» za 90 rubloŭ, a treciaja, ź Minska, ahučyła navat bolšuju sumu, čym u aŭtara rolika.
«220 rubloŭ — HC Diamond, na pieršym paviersie harodnina/sadavina, adna tam kropka. U pačatku tydnia byli, ašaleła, kali ŭbačyła», — raskazała jana.
«Pajdu brać kredyt u banku», — žartam napisaŭ adzin z kamientataraŭ, uraziŭšysia «cenami za miažoj fantastyki», a chtości prapanavaŭ kuplać čarešniu paštučna.
«Ja kupiła dźvie štučki.. Addała 4 rubli. Cana była 130 rubloŭ», — napisała adna z hladačak, jakaja, pa jaje słovach, mienavita tak i zrabiła.
Miž tym, miarkujučy pa aficyjnym akaŭncie Kamaroŭki ŭ instahramie, na rynku źjavilisia ŭ prodažy i inšyja «letnija» jahady — bujaki i kłubnicy. Ceny na pieršyja pakul taksama «kusajucca» — pradaŭcy prosiać 79,9 rubla za kiło jahady ispanskaj vytvorčaści.
A voś cana na kłubnicy ŭžo nie tak šakuje šarahovaha pakupnika — kiłahram hetaj jahady na Kamaroŭcy ŭžo možna kupić za 13-25 rubloŭ.
Zrešty, mnohija kamientatary da cenaŭ na śviežyja jahady ŭ mižsiezońnie pastavilisia sa skiepsisam.
«Heta toje, biez čaho ja spakojna abychodžusia.. Tamu cana mianie na hety pradukt nie napružvaje», — napisała adna z kamientatarak.
A voś pytańnie cany na jakasnuju bulbu, miarkujučy pa kamientarach, biełarusaŭ u hetym siezonie nijak nie adpuskaje.
«Heta katastrafična doraha! I bulba navat za 10 rubloŭ — katastrofa!» — emacyjna vykazałasia adna z hladačak videa.
Ciapier čytajuć
Kiełahu pakazali kampramietujučyja videamateryjały na biełaruskuju apazicyju? Tak miarkuje Łatuška18
Kamientary