Ciažarnuju minčanku asudzili za pracu vebkam-madellu. Jana vinnaja dziaržavie 378 tysiač dalaraŭ

Alena žyła ŭ Minsku i ładziła efiry na papularnym sajcie dla darosłych, jaki raźmiaščaje eratyčnyja videačaty z madelami. Jak vynikaje z sudovaha dakumienta, niechta paviedamiŭ pra heta ŭ apieratyŭna-dziažurnuju słužbu Puchavickaha RAUS. Supracoŭnik milicyi Andrej zajšoŭ na sajt, znajšoŭ tam 86 eratyčnych videa i vyśvietliŭ, chto kankretna byŭ u kadry.

Paśla hetaha siłaviki pryjšli ŭ minskuju kvateru Aleny. Tam jany znajšli abstalavańnie dla zdymak: kalcavuju lampu sa štatyvam i videakamieraj, ašyjnik i raznastajnyja seks-cacki, u tym liku kiravanyja z adlehłaści.

Padčas ahladu noŭtbuka minčanki znajšli staronku na servisie dla eratyčnych tranślacyj ź jaje akaŭntam, u jaki byŭ vykanany ŭvachod. U infarmacyi profilu było skazana, što ahulny čas anłajn skłaŭ 10 283 hadziny 37 chvilin 31 siekundu (heta bolš za 420 sutak, kali tranślavać bieśpierapynna).

Praŭda, za jaki heta pieryjad, u rašeńni suda nie havorycca. U akaŭncie byŭ taksama paznačany dachod — 378 021 dalar. Ź ich 42 dalary značylisia niavypłačanymi. Paśla «ahladu» siłaviki vydalili jaho.

Žančynu sudzili pavodle č. 2 art. 343 KK (Tranślacyja parnahrafičnych materyjałaŭ, učynienaja z karyślivych mierkavańniaŭ asobaj, jakaja dasiahnuła vasiamnaccacihadovaha ŭzrostu).

Na momant pačatku pasiedžańniaŭ Alena była ciažarnaja i pracavała śpiecyjalistkaj adździeła prodažaŭ adnoj ź minskich arhanizacyj. Žančynu nie zatrymlivali, jana była na voli pad asabistym paručalnictvam.

Padčas pracesu byłaja madel častkova pryznała vinu i čystasardečna raskajałasia, havorycca ŭ sudovym dakumiencie. Jana nie admaŭlała, što mieła znosiny praz sajt z roznymi ludźmi i tranślavała im parnahrafičnyja sceny. Alena taksama paviedamiła, što akaŭntaŭ u jaje było dva, imi karystałasia tolki jana, nikomu parolaŭ nie pieradavała.

Adnak svoj dachod biełaruska acaniła značna bolš ścipła. Alena tak apisała ekanomiku «pracy»: nieznajomyja «danacili» joj praz sajt, paśla administracyja placoŭki pieraličvała kryptavalutu na kašalki madeli. A dalej «nieznajomyja asoby» dapamahali pieravodzić dachod u najaŭnyja dalary. Pavodle Aleny, takim čynam jana atrymała kala 15 tysiač dalaraŭ.

Na pasiedžańni taksama vystupiŭ śviedka Viktar, jaki, vidavočna, zdavaŭ Alenie kvateru. Jon zajaviŭ, što žyllo naležyć jaho maci, a ŭ joj žyli znajomyja žančyny (rola druhoj u hetaj historyi niajasnaja). Viktar adznačyŭ, što nichto nie pytaŭ u jaho dazvołu na zdymku videa ŭ kvatery. Pra ŭsio, što zdaryłasia, jon daviedaŭsia ad susiedziaŭ užo paśla taho, jak tudy ź pieratrusam pryjšli siłaviki.

Ekśpiert praanalizavaŭ videazapisy z udziełam Aleny i kanstatavaŭ, što heta parnahrafija. Sud paličyŭ jaje vinu dakazanaj, a pakazańni žančyny «što da niazhody z sumaj atrymanaha dachodu» — nieabhruntavanymi, «bo jany abviarhajucca piśmovymi materyjałami spravy».

U vyniku jaje asudzili na dva hady pazbaŭleńnia voli, ale z adterminoŭkaj na dva hady.

Sud pastanaviŭ zabrać u dachod dziaržavy ŭsiu sumu, jakuju paličyŭ zarobkam, — 378 020 dalaraŭ. Jaje pieraličyli ŭ biełaruskija rubli pavodle najmienšaha kursa Nacbanka, jaki adnosicca da pieryjadu jaje pracy — atrymałasia 797 056 rubloŭ. Miarkujučy z abmiennaha kursu, havorka išła pra studzień 2020 hoda (dakładnyja daty ŭ rašeńni schavanyja).

Praŭda, samich hetych hrošaj, vidać, nichto nie bačyŭ: u prysudzie skazana, što «nazvanyja hrašovyja srodki nie byli vyjaŭlenyja i kanfiskavanyja padčas papiaredniaha rasśledavańnia». Tym nie mienš žančyna abaviazanaja vypłacić ich dziaržavie.

Dla «zabiaśpiečańnia vykanańnia prysudu» pad aryštam pakinuli jaje bankaŭskija rachunki, a taksama smartfon, fien i elektraščypcy. «Pracoŭny» noŭtbuk pastanavili zabrać va ŭłasnaść dziaržavy (i ścierci ŭsiu infarmacyju), a seks-cacki — źniščyć.

• 0
• 4
• 4
• 44
• 2
• 0
• 10
• 0