Kolki času zajmaje vydača pašparta novaj Biełarusi? Były kalinoviec raskazaŭ, jak atrymlivaŭ dakumient

Kłačko tłumačyć, što dla jaho ŭ historyi z pašpartam novaj Biełarusi hałoŭnaje — idejny składnik:

«U hetym prajekcie ja baču biełaruskuju nacyjanalnuju ideju. Taksama ŭsio, što drenna dla režymu Łukašenki, dobra dla biełarusaŭ, a paśpiachovaja realizacyja hetaha prajekta maksimalna asłablaje režym. Padmiena režymnych instytutaŭ, dakumientaŭ, jakija moža vydavać režym, pryvodzić da jaho słabaści».

Na dumku Alaksandra, ideja pašparta — adna z tych kancepcyj, jakija mohuć abjadnać i natchnić biełarusaŭ. Dla hetaha treba, kab vydavalisia novyja pašparty, praces praciahvaŭsia, i źjaŭlalisia krainy, jakija buduć hety pašpart pryznavać. Taki pośpiech, kaža Kłačko, byŭ by vielmi važny ciapier, kali biełarusy časta stračvajuć nadzieju na lepšaje. I ŭ demakratyčnaj Biełarusi, ličyć Alaksandr, hety pašpart dakładna stanie dziejnym.

«Kali ŭsio atrymajecca, to ŭ pašparta budzie i praktyčnaja funkcyja. Heta budzie nieabchodny dakumient dla nas, biełarusaŭ zamiežža, chto nie atrymaŭ uciakactva, kab možna było jak minimum pierasiakać miežy».

Praces atrymańnia prosty, raskazvaje Kłačko. Dla pačatku treba zajści na sajt belarus-passport.com i nacisnuć na knopku z nadpisam Apply for pre-registration. Dalej sistema paprosić apłacić 7 jeŭra za vieryfikacyju.

Kab vieryfikavać siabie, spatrebicca fatahrafija aficyjnaha biełaruskaha pašparta, praterminavany taksama padydzie. Da jaje treba budzie dadać fota dazvołu na žycharstva ŭ krainie pražyvańnia i sfatahrafavacca samomu.

Paśla vieryfikacyi čałavieku paviedamiać, ci jana projdzienaja paśpiachova. Kali ŭsio dobra, treba budzie zapłacić 90 jeŭra za vyrab pašparta i zarehistravacca na zdaču bijamietryčnych danych — pavodle słoŭ Alaksandra, heta mahčyma zrabić u Vilni, Kijevie i Varšavie.

Sam Kłačko zdavaŭ adbitki palcaŭ u Biełaruskim pašpartnym centry ŭ Vilni. Raskazvaje, što čarhi na zdaču nie było — zaŭvažyŭ tolki jašče adnaho čałavieka. Dalej treba pačakać niekalki pracoŭnych dzion, i pašpart budzie hatovy. U vypadku Alaksandra ad rehistracyi na sajcie da atrymańnia pašparta prajšoŭ tydzień.

Alaksandr kaža, što ŭ hatovym pašparcie «ŭzrovień biełaruskaści zaškalvaje», i dla Kłačko heta važna. Kali paraŭnać hety pašpart z aficyjnym biełaruskim pašpartam, u dziaržaŭnaj viersii dakumienta niama stolkich nacyjanalnych elemientaŭ, jak u pašparcie novaj Biełarusi. Naprykład, na vokładcy novaha pašparta jość Pahonia i elemient słuckaha pojasa, a ŭnutry — himn BNR i biełaruskaja łacinka. Na staronkach pašparta — vyjavy biełaruskich miaścin.

Kłačko znachodzić dla siabie ŭ hetym pašparcie jašče adzin sens. Dla jaho, kali jon jechaŭ vajavać va Ukrainu, šmat u čym było važna dałučycca da histaryčnaj padziei — takaja ž łohika pracuje i tut:

«Pašpartny prajekt — heta nie tolki ideja i praktyčnaje prymianieńnie, bo patencyjna heta trevieł-dakumient i paŭnavartasny biełaruski pašpart. Dla mianie heta taksama vielmi važnaja histaryčnaja padzieja, jakaja ŭžo adbyłasia i ŭvojdzie ŭ historyju niezaležnaj Biełarusi, jak u svoj čas uvajšoŭ pašpart BNR. Uśviedamlaju, što nie ŭsie mianie zrazumiejuć, ale dla mianie heta važna — być datyčnym da histaryčnych pracesaŭ, jakija ŭpłyvajuć na los Biełarusi.

Čym by hety prajekt ni skončyŭsia, jon užo faktyčna realizavany ŭ fizičnym vyhladzie, to-bok dakumient adpaviadaje ŭsim patrabavańniam da standartnaha pašparta luboj krainy śvietu».

• 48
• 3
• 5
• 9
• 0
• 0
• 0
• 2