U Biełym domie ŭračysta praviali ź dziaržaŭnaj słužby Iłana Maska. Tramp padaryŭ jamu załaty kluč
Prezident ZŠA Donald Tramp pravioŭ pres-kanfierencyju ŭ Avalnym kabiniecie z nahody sychodu Iłona Maska z pasady kiraŭnika Departamienta efiektyŭnaści ŭrada (DOGE) i ŭručyŭ jamu simvaličny załaty kluč u futlary z vyjavaj Biełaha doma.
Tramp zajaviŭ, što takoha padarunka jon udastojvaje tolki pa-sapraŭdnamu asablivych ludziej. Mask na heta jamu adkazaŭ, što i paśla adstaŭki zastaniecca «siabram i daradcam» prezidenta i spadziajecca praciahvać kansultavać jaho, kali heta budzie patrebna.
«Iłan nasamreč nie sychodzić. Jon budzie prychodzić i sychodzić. U mianie jość adčuvańnie, što heta jahonaja sprava, i ja dumaju, što jon jašče zrobić šmat čaho», — zajaviŭ pry hetym Donald Tramp.
Mask adznačyŭ, što ŭsio jašče spadziajecca na skaračeńnie dziaržaŭnych vydatkaŭ na tryljon dołaraŭ. Raniej jon abiacaŭ źmienšyć vydatki biudžetu na dva tryljony, ale paźniej źniziŭ hety prahnoz.
Darečy, na pres-kanfierencyju Mask pryjšoŭ ź siniakom pad pravym vokam. Jon patłumačyŭ jahonaje pachodžańnie siamiejnymi abstavinami: «Moj syn Iks udaryŭ mianie kułakom. Navat piacihadovaje dzicia moža heta zrabić».
Paśla paviedamleńnia pra svaju adstaŭku Iłan Mask u intervju skazaŭ, što adčuvaje siabie «troški zahnanym u kut», bo, z adnaho boku, «nie choča adkryta vystupać suprać administracyi» Trampa, ale i «nie choča brać na siabie adkaznaść za ŭsio, što jana robić».
Akurat da adstaŭki Iłana Maska vydańnie The New York Times apublikavała materyjał, u jakim śćviardžajecca, što padčas aktyŭnaha ŭdziełu ŭ pieradvybarčaj kampanii Donalda Trampa Iłan Mask užyvaŭ narkotyki ŭ značna bolšych kolkaściach, čym ličyłasia raniej.
U minułym hodzie vydańnie The Wall Street Journal užo pisała pra toje, što Mask złoŭžyvaje niekatorymi lekavymi srodkami. Sam jon śćviardžaŭ, što prymaje kietamin u małych dozach pa recepcie lekara i kazaŭ, što «kali pierabrać — pracavać niemahčyma».
Adnak, pavodle NYT, na samoj spravie jon užyvaŭ kietamin značna čaściej i navat sam pryznavaŭsia, što z-za hetaha ŭ jaho źjavilisia prablemy z mačavym puzyrom. Śviedki raskazvali, što Mask nibyta zaŭsiody nasiŭ z saboj skrynačku z tabletkami — kala 20 roznych vidaŭ, u tym liku tabletki, padobnyja na Aderał, jaki źjaŭlajecca stymulataram.
Usio heta adbyvałasia na fonie jaho aktyŭnaj palityčnaj dziejnaści: jon rehularna źjaŭlaŭsia na mitynhach i navat raspracoŭvaŭ płan reformy fiederalnaj biurakratyi. Hazieta taksama adznačaje, što kampanija SpaceX, jakaja pracuje ź Pientahonam, abaviazanaja pravodzić vypadkovyja testy na narkotyki siarod supracoŭnikaŭ. Ale, pavodle śviedčańniaŭ, Mask zahadzia daviedvaŭsia pra hetyja pravierki.
«Moj termin paŭnamoctvaŭ padychodzić da kanca». Iłan Mask pakidaje administracyju Trampa
Iłan Mask vystupiŭ z vostraj krytykaj novaha zakona, prapanavanaha Trampam
Iłan Mask vyrašyŭ adyści ad palityki i viarnucca da svaich prajektaŭ u kosmasie
Mask paabiacaŭ nadalej mienš pracavać u administracyi Trampa i bolš — u svaich kampanijach
Mask hatovy pakinuć pasadu, bo «stamiŭsia ad napadak levych»
«Ja chaču spraviadlivaści — i dla žančyn, i dla siabie». Ščyraja hutarka z Andrejem Stryžakom pra skandał z dykpikami, zaležnaści i budučyniu16
Kamientary