«Jany ŭsie siabravali suprać mianie». U Minsku sudziać mužčynu za łžyvyja danosy na kankurentaŭ

Zhodna z materyjałami spravy, z sakavika 2023 hoda pa luty 2024 hoda mužčyna adpraviŭ nie mienš za 18 takich listoŭ. U ich jon papiaredžvaŭ dziaržaŭnyja orhany pra roznyja złačynstvy — ad pieravozki praź miažu narkotykaŭ i zbroi da chabaraŭ padatkovym inśpiektaram.

Na sudzie paciarpiełyja abvinavačańni admaŭlali i nastojvali na tym, što takim čynam mužčyna «źniščaŭ kankurentaŭ». Abvinavačany nie spračaŭsia: historyi jon prydumlaŭ, «ananimki» adpraŭlaŭ, a asnoŭnym matyvam była «pomsta z-za niepryjaznych adnosin». Žurnalisty pabyvali na dvuch pasiadžeńniach.

Kryminalnaja sprava kvalifikavana pa častcy 1 i častcy 2 artykuła 400 KK Biełarusi — heta zaviedama iłžyvyja danosy, u tym liku źviazanyja z abvinavačvańniem u ciažkim abo asabliva ciažkim złačynstvie. Pa hetym artykule mužčynu pahražaje abmiežavańnie abo pazbaŭleńnie voli na termin da 5 hadoŭ.

Abvinavačanamu I. 41 hod, jon bolš za 15 hadoŭ zajmajecca turystyčnym biznesam. Kaliści aktyŭna vaziŭ turystaŭ sam jak supravadžajučy hrup, taksama adkryŭ IP i firmu — PUP «KSAŁ-PROF» (Economim.by, Bytravel.by), asnoŭny profil jakoj — aŭtobusnyja pieravozki ŭ krainy blizkaha zamiežža. Adzin ź jaho turaŭ, jaki skončyŭsia hučnym kanfliktam z turystami.

Padčas suda abvinavačany nieadnarazova paŭtaraŭ, što pryznaje svaju vinu. Kali dajšła čarha da dačy pakazańniaŭ, jon publična paprasiŭ prabačeńnia ŭ prysutnych. Taksama zrabili i jaho blizkija, jakija ŭ kancy pasiadžeńnia cicha źviarnulisia da paciarpiełych sa słovami: «Prabačcie».

Paciarpiełych nie adzin i nie dva, ale najbolš aktyŭna ŭ sudzie vystupajuć pradstaŭniki turahienctva «Kaktus-tur». Zasnavalnik i jaho žonka vyhladajuć dobra padrychtavanymi: trymajuć u rukach tečki z dakumientami, robiać paznaki padčas pasiadžeńnia. Para nie prymie prabačeńnia ad abvinavačanaha i zapatrabuje ŭ sudzie navat bolš vysokija sumy maralnaj škody, čym padčas papiaredniaha śledstva.

«Paśla aznajamleńnia sa spravaj u 10 tamach ja dla siabie šmat što zrazumieŭ», — tak rastłumačyć svajo rašeńnie pavialičyć sumu z 30 tys. da 50 tys. rubloŭ paciarpieły V.

Pazicyja abvinavačańnia: «Stvaraŭ štučnyja pieraškody kankurentam»

Ale vierniemsia da pačatku suda. Advakat pieraličvaje padziačnyja listy na adras abvinavačanaha, a taksama paviedamlaje pra miedycynskaje zaklučeńnie, zhodna ź jakim mužčynu «rekamiendavanyja abśledavańni i źjaŭleńnie na špitalizacyju» ŭ lipieni hetaha hoda. Da spravy dałučajucca raśpiski ad niekalkich paciarpiełych ab tym, što jany nie majuć pretenzij materyjalnaha abo maralnaha charaktaru.

Dziaržaŭny abvinavaŭca začytvaje abvinavačańnie, zhodna ź jakim abvinavačany, zajmajučysia kamiercyjnaj dziejnaściu ŭ śfiery mižnarodnych aŭtobusnych turystyčnych pieravozak i atrymaŭšy dośvied uzajemadziejańnia z roznymi dziaržaŭnymi orhanami i razumieńnie ich paŭnamoctvaŭ i kampietencyj, z sakavika 2023 hoda pa luty 2024 hoda adpraŭlaŭ iłžyvyja danosy (usiaho 18 epizodaŭ).

Pavialičyć

Pazicyja abvinavačańnia ŭ tym, što mužčyna «stvaraŭ na miažy štučnyja pieraškody pieravozčykam i ich klijentam-pasažyram, čym sprabavaŭ spravakavać adtok klijentaŭ u kankurentaŭ». Takim čynam, mierkavaŭ abvinavačany, jon «stvoryć spryjalnyja ŭmovy dla pavieličeńnia ŭłasnaha prybytku».

Paviedamlajecca, što danosy I. drukavaŭ na svaim kampjutary doma i adpraŭlaŭ ich u kanviertach pa pošcie ŭ roznyja dziaržaŭnyja orhany. Listy byli jak ananimnyja, tak i ad vydumanych hramadzian, u tym liku ad žycharoŭ Polščy.

«Supracoŭničali ź im, pakul nie pačalisia pahrozy»

Pra toje, jak iłžyvyja danosy adbilisia na žyćci ludziej, raspaviali na sudzie sami paciarpiełyja. Pieršym na pytańni adkazvaje dyrektar PUP «Kaktus-tur». Jon kaža, što viedaje abvinavačanaha zavočna hadoŭ 15, ale asabista sustrakaŭsia ź im usiaho niekalki razoŭ. Peŭny čas jany paśpieli papracavać razam — u pieryjad, kali paśla kavidu turfirmy aktyŭna adnaŭlali pajezdki ŭ Biełastok i Vilniu.

— U nas u hetaj śfiery tak: kali ŭ kahości mała turystaŭ, kampanii abjadnoŭvajucca i viazuć ludziej u adnym aŭtobusie, kab była niejkaja rentabielnaść, — tłumačyć V. — Abvinavačany spačatku pracavaŭ z «Javašturam», u ich pajšli niejkija razychodžańni, i jany pierastali abjadnoŭvacca. I tady jon prapanavaŭ nam pačać supracoŭnictva. My paličyli, što dla nas heta vyhadnyja ŭmovy. Peŭny čas pracavali razam.

— Pa jakoj pryčynie pierastali supracoŭničać?

— Pajšli razychodžańni. Z boku [abvinavačanaha] pačalisia niejkija zahady-ŭkazańni, što my nie tak pasadzili turystaŭ… Heta było na pavyšanych tanach, treba było iści na ŭsie jaho ŭmovy. I tak jamu nie tak, i hetak drenna. <…> Paśla hetaha pačalisia pahrozy ŭ naš adras, jon pačaŭ havaryć: maŭlaŭ, kali vy nie budziecie vykonvać maje ŭmovy, to na vas buduć danosy ŭ roznyja orhany. Paśla hetaha my paličyli, što dastatkova supracoŭnictva, i parvali adnosiny.

Dziaržabvinavaŭca začytaŭ epizody, jakija datyčacca niepasredna dyrektara «Kaktus-tura». Naprykład, u lutym 2023 hoda dziaržaŭnyja orhany atrymali list pra toje, što jon i jaho žonka pieradali 10 tys. rubloŭ inśpiektaru padatkovaj (epizod №5).

— Takoha nie było, nichto nijakich chabaraŭ nie davaŭ, — kateharyčna admaŭlaje paciarpieły. — Pry hetym u nas była vielmi surjoznaja pravierka, nas vyklikali ŭ padatkovuju inśpiekcyju, praviarali ŭsiu našu dziejnaść.

Nastupny epizod — danos pra ŭtajeńnie dachodu za 2022 hod (epizod №6). Paśla hetaha paviedamleńnia, raspaviadaje paciarpieły, u ofisie byŭ vobšuk.

— Usie tečki, šufladki, kampjutary, telefony — usio było ahledžana, — stomlenym hołasam adkazvaje V.

Taksama ŭ dziaržaŭnyja orhany pastupiła infarmacyja, što kampanija «Kaktus-tur» pieravozić u Litvu ekstremisckija ulotki (epizod №9), a taksama ŭvozić na terytoryju Biełarusi kakain (epizod №11).

— Usio heta nie adpaviadaje rečaisnaści. Mianie pastajanna dapytvali, vyklikali va ŭsie viedamstvy, jakija tolki možna: i HUUS, i MUS, i KDB. Byli pastajannyja dahlady na pahraničnych punktach, zatrymki transpartu ad 7 da 10 hadzin. Raźbirali aŭtobusy, zahaniali ich na renthien, turystaŭ, a taksama supravadžajučych i kiroŭcaŭ adpraŭlali na asabisty nadhlad.

— Dalej epizod №13 — nakont vypłaty zarobku ŭ kanviertach.

— Takoha nikoli nie było. Pravodzilisia pravierki: u mianie byvali DFR, ABEP, taksama apytańnie pravodziŭ inśpiektar padatkovaj. Paciarpieły padkreślivaje, što na pracy kampanii ŭsie hetyja pravierki adbilisia samym balučym čynam.

— My stracili reputacyju, z nami admaŭlalisia supracoŭničać našy partniory (heta zakazčyki turystyčnych aŭtobusaŭ pa maršrutach): jany bajalisia pravierak svaich kampanij. Turysty taksama pra heta čuli, bo padsudny pisaŭ na turystyčnyja partały ad svajho imia šmat niehatyŭnych vodhukaŭ. <…> Nam pryčyniena vielizarnaja škoda — i maralnaja, i materyjalnaja. Davodziłasia pastajanna zajmacca padtrymkaj biznesu, padavać u roznyja viedamstvy dakumienty, utrymlivać turystyčny patok, trymać supracoŭnikaŭ, jakim u takich umovach było vielmi ciažka pracavać. Chtości syšoŭ ź mieniedžaraŭ, chtości zastaŭsia. Tolki ciapier my patrochu vychodzim na raniejšy ŭzrovień, viartajem svaich partnioraŭ.

Biassonnyja nočy — heta adnaznačna. U nas było dva-try rejsy na tydzień u Biełastok i dva rejsy ŭ Vilniu — u roznyja dni. Na kožnaj miažy byli pastajannyja pravierki ź biełaruskaha, litoŭskaha abo polskaha boku. <…> Najčaściej heta adbyvałasia nočču, supravadžajučyja i kiroŭcy pastajanna nam telefanavali, i nam davodziłasia być na suviazi — supakojvać, uhavorvać, padtrymlivać psichałahična. Noč nie śpim, ranicaj ustajom i idziem na pracu. Heta vielmi ciažka.

Pavialičyć

Para prosić sud pryznačyć dla abvinavačanaha strohaje pakarańnie, źviazanaje z pazbaŭleńniem svabody. Taksama imi było padadziena chadajnictva pa maralnaj škodzie na sumu pa 50 tys. rubloŭ na kožnaha (ahulnaja suma — 100 tys.).

U abvinavačanaha pytajuć, ci hatovy jon kampiensavać paciarpiełym maralnuju škodu ŭ takim pamiery.

— Nie, heta nierealnyja sumy, ja ich nie pryznaju, — adkazvaje I. — Ja liču, što vinavaty, ja kajusia ŭ hetym, ale hatovy kampiensavać u razumnych miežach. Ja mahu viarnuć pa 10 tys. rubloŭ kožnamu.

«Ja pytałasia ŭ mytnikaŭ: heta pa liście ci pa zvanku? Jany ŭśmichalisia»

Taksama na sudzie vysłuchali i inšych rabotnikaŭ PUP «Kaktus-tur» — jany ŭvajšli ŭ śpis paciarpiełych ad iłžyvych danosaŭ. Voś što raskazvaje kiroŭca I.:

— Na mianie danieśli, što ja pieravoziŭ praź miažu zbroju i narkotyki. < …> Mianie na miažy pilna praviarali, zahnali aŭtobus na renthien, blizki dahlad, pałovu aŭtobusa razabrali, ničoha nie vyjavili. I heta było nieadnarazova, amal kožny rejs — dahlad i renthien. Heta jak na našaj miažy, tak i na polskaj, litoŭskaj.

Svaje pakazańni taksama daje vychavalnica dziciačaha sada S. — raniej jana pracavała supravadžalnaj hrup u kampanijach «Smart-trevieł» i «Kaktus-tur» i dahetul časam viazie hrupy pa damovie padradu. U dačynieńni da žančyny ŭ spravie fihuruje danos pra niezakonny ŭvoz zbroi.

— Heta durnoje abvinavačańnie: čałaviek nie dumaŭ, što pisaŭ. I mianie nadhladali, i aŭtobus, i maje rečy hladzieli nieadnarazova. Nu što mahli znajści? < …> Ja pytałasia ŭ mytnikaŭ: heta pa liście ci pa zvanku? Jany ŭśmichalisia. A kali ŭžo druhi i treci raz mianie praviarali, ja kažu: «Nu što, znoŭ napisali?» Mnie adkazali: «Nu što ja vam skažu, šukajcie, chto heta robić». Paciarpiełaja kaža, što ŭ jaje nie było nijakich sumnievaŭ, chto moh heta napisać.

— Jon i inšych ludziej tak turbavaŭ. Usie, chto pracavaŭ u hetaj śfiery ŭ turyźmie, viedali pra heta. < …> Ja nie viedaju, navošta jon heta ŭsio rabiŭ. I ludziam žyćcio sapsavaŭ, i sabie ŭrešcie. Mahčyma, heta kankurencyja.

Žančyna prosić sud pryznačyć I. spraviadlivaje pakarańnie, hrašovych pretenzij u jaje niama. Raniej prahučała, što joj, a taksama niekatorym inšym paciarpiełym abvinavačany ŭžo vypłaciŭ kampiensacyju maralnaj škody — pa 800, 1000 i 4000 rubloŭ.

«Mianie raspranali na miažy — stavili, jak Vienieru Miłoskuju ŭ Łuŭry»

Mabyć, emacyjniej za ŭsich na sudzie vystupiła paciarpiełaja Je. — kaliści jana pracavała razam z abvinavačanym, ale paźniej pierajšła ŭ kampaniju «Kaktus-tur».

— Jon mianie zaprasiŭ dzieści 10 hadoŭ tamu — supravadžać hrupy. My pracavali [razam], vielmi dobra pracavali — biez pytańniaŭ. Ale z 2023 hoda pačalisia vielmi niehatyŭnyja momanty z boku I. < …> Jon kazaŭ mnie, što pakładzie ŭvieś turystyčny biźnies, a sam zastaniecca. I kali pačałasia vajna, kali transpartnyja inśpiekcyi pačali spyniać [aŭtobusy inšych turfirm], ja časta ź im razmaŭlała, nahadvała, što ŭ jaho dzieci rastuć. Ja jamu ŭ maci hadžusia, mnie zdavałasia, što jon moža mianie pačuć… Nie vytrymaŭšy, ja pierajšła ŭ PUP «Kaktus-tur». I voś tady pačalisia cikavyja momanty sa mnoj.

Mianie pastajanna na miažy raspranali — stavili, jak Vienieru Miłoskuju ŭ Łuŭry, tolki jana biez ruk, a ja z rukami… Pieršy raz heta było na litoŭskaj miažy.

Na našaj miažy kožny raz, kali ja ŭjazdžała, mnie kazali: «Heta znoŭ vy?» U mianie piać aktaŭ asabistaha dahladu. Ale ja ŭsio heta ciarpieła: dumaju, čałaviek supakoicca, zrazumieje, chaciełasia vieryć u lepšaje. Ale kali da mianie dadomu pryjšli (a ŭ mianie byŭ chvory čałaviek) dva supracoŭniki Zavodskaha i Leninskaha rajonaŭ pa narkakantroli i supraćdziejańniu handlu ludźmi, ja paprasiła, kab mianie pavieźli ŭ Zavodskaje RUUS i ja dała pakazańni. Na što mnie skazali adnaznačna paviedamlać va ŭsie orhany. I tady ŭ nas ź I. pačałasia vajna.

Pa słovach paciarpiełaj, paralelna na sajtach stali źjaŭlacca niehatyŭnyja vodhuki pra jaje pracu: pra toje, što «śvietłavałosaja žančyna piensijnaha ŭzrostu zabyvaje turystaŭ».

— Potym jašče da mianie prychodziŭ Śledčy kamitet u suviazi z tym, što ja pieravožu narkotyki, vialikija sumy hrošaj, infarmacyju dla Polščy mnie źbirajuć «handlary z rynku», što ja maju dvuchpakajovuju kvateru ŭ Biełastoku… Stolki iłžyvaj infarmacyi pra siabie ja nie mahła vytrymać, — uzdychaje žančyna.

Na sudzie paciarpiełaja zajaviła patrabavańnie ab kampiensacyi maralnaj škody na sumu 3 tys. rubloŭ.

— Ja straciła šmat zdaroŭja. Maja siamja — niervy. Ja bajusia za svaju siamju i pa siońniašni dzień. < …> Ja choć i žančyna piensijnaha ŭzrostu, raniej redka ŭžyvała tabletki, a ciapier užyvaju. I ŭ našaj krainie lačeńnie nie tak tanna.

Paśla taho, jak u abvinavačanaha spytali, ci pryznaje jon maralnuju škodu, pamiž im i jaho byłoj supracoŭnicaj adbyŭsia emacyjny dyjałoh.

— Ja pierad vami ŭ čarhovy raz prašu prabačeńnia. Ja hatovy vam uličvajučy toje, što vy paciarpieli, dać 1000 rubloŭ. Mnie šmat kamu davodziłasia kampiensavać… I jašče raz prynošu hłybokija prabačeńni. Prabačcie mianie, kali łaska.

— Mnie hrošy nie tak važnyja. Ja ciabie prasiła, ty pamiataješ kolki? I ciapier pierad tvaimi rodnymi i blizkimi ja ciabie prosta prašu: supakojsia, pačni žyć jak čałaviek, — źviartajecca da svajho byłoha kiraŭnika žančyna.

Abvinavačany: «Skłalisia niepryjaznyja adnosiny ź niekatorymi ludźmi»

Sud pierachodzić da dopytu abvinavačanaha. Raskazvajučy pra siabie i svaju pracu, mužčyna padkreślivaje, što na rynku pasažyrskich pieravozak jon dastatkova daŭno — z 2009 hoda. Zaŭsiody ŭkładvaŭsia ŭ svoj biźnies, «staraŭsia abychodzić klijentaŭ». Padčas i paśla kavidu nastupili ciažkija časy: vizy biełarusam stali davać radziej, patok turystaŭ skaraciŭsia. A jašče na rynku źjavilisia kankurenty.

Pavialičyć

— Ja samastojna arhanizoŭvaŭ hrupy, davaŭ šmat rekłamy, kab pryciahnuć ludziej. Bolšaj stupieńniu majo imia pracavała na mianie, u mianie byŭ pośpiech u hetym. < …> Paźniej na rynku źjaviłasia firma «Kaktus-tur», jakaja taksama pačała hetym zajmacca. My pačali razmaŭlać ź imi. U mianie skłalisia niepryjaznyja adnosiny ź imi, bo jany nie vykonvali svaje damoŭlenaści. < …> Naprykład, my damovilisia abjadnoŭvacca, kali hrupa była niapoŭnaja, kab pajechali nie dva paŭpustyja aŭtobusy, a adzin poŭny. Adnak u apošni momant «Kaktus-tur» kaža: nie, u nas jość svaje aŭtobusy. < …> To-bok jany vielmi mocna padvodzili, pierakładvali strełki na siabie, i mnie stanaviłasia nastolki kryŭdna…

Mužčyna padkreślivaje, što vielmi baluča ŭsprymaŭ niehatyŭ u svoj adras.

— Byŭ taki momant, što ŭsie siabravali suprać mianie, apałčylisia suprać mianie… I ŭ mianie była kryŭda na toje, što mnie kazali dobryja rečy, a pavodzilisia pa adnosinach da mianie drenna.

U abvinavačanaha ŭdakładniajuć: ci mahło niehatyŭnaje staŭleńnie da jaho być źviazana sa čutkami pra toje, što jon piša iłžyvyja danosy (pra heta raspaviali niekalki paciarpiełych)? U adkaz na heta mužčyna zajaŭlaje, što, mahčyma, takim ža čynam pastupali i jaho kankurenty.

— Sprava ŭ tym, što mianie nieadnarazova samoha praviarali i raspranali [na miažy], pry paniatych taksama. < …> Mianie sprabavali złamać, pastavić łbami. Dzieści pravierka była, i mnie kazali, što heta «jany na ciabie». < …> Mianie navat pytali: «Jak vy dumajecie, čamu my vas raździalajem?» Ja kazaŭ: «Mabyć, heta kankurenty».

Na pytańnie, ci jość u abvinavačanaha dakładnyja źviestki pra toje, što inšyja turfirmy praktykavali ŭ adnosinach da jaho niešta padobnaje (heta značyć pisali danosy), mužčyna paciahvaje plačyma.

— U mianie byli padazreńni, kali mianie samoha dahladvali. < …> Tolki na ŭzroŭni čutak.

U sudzie prystupajuć da padrabiaznaha razboru epizodaŭ z materyjałaŭ spravy. Ich šmat, tamu dopyt doŭžycca doŭha. My pryviadziem tolki samyja cikavyja epizody — naprykład, №2: łožny danos napisany na byłoha klijenta abvinavačanaha — pasažyra jaho aŭtobusa. Heta značyć, listy pisalisia nie tolki ŭ adras kankurentaŭ. Voś jak heta tłumačyć abvinavačany:

— Jon časta jeździŭ — amal kožnyja vychadnyja. Vioŭ siabie ŭ aŭtobusie nie vielmi dobra, i pasažyry skardzilisia na jaho. Mnie davodziłasia jaho supakojvać. Jon kazaŭ mnie, što pojdzie ŭ inšuju firmu. Heta mianie častkova zakranała. Jon rekłamiravaŭ «Kaktus-tur» i kazaŭ, što ŭsie pojduć za im. < …> Jon kazaŭ pra mianie drennyja rečy. Ja chacieŭ jamu adpomścić.

Anałahičnaja situacyja apisanaja ŭ epizodzie №15: łožny danos taksama napisany ŭ adras svajoj klijentki.

— Jana prosta ŭsiu pajezdku razdražniała, niervovaja sistema nie vytrymlivała. Paźniej jana pačała pisać vielmi šmat niehatyŭnych vodhukaŭ, što ja «abražany chłopčyk», vielmi prynižalnych u moj adras. Ja sprabavaŭ jaje spynić, a jana nie spyniałasia.

Adnačasova niekalki epizodaŭ, nahadaju, datyčacca mužoŭ i žonak z PUP «Kaktus-tur». Dziaržaŭny abvinavaŭca źviartaje ŭvahu, što ŭ suviazi z chabarnictvam padatkovamu inśpiektaru abvinavačany napisaŭ u Dziaržaŭny sakrataryjat Savieta biaśpieki, Hienieralnuju prakuraturu, Upravu spraŭ prezidenta, KDB, MUS, HUBAZ MUS. Dalej u tyja ž orhany pastupiŭ danos pra schaŭvańnie dachodaŭ pradpryjemstva.

— Niekalki danosaŭ, kab stvaryć jak maha bolš prablem? — udakładniajuć u abvinavačanaha.

— Ja im tak chacieŭ adpomścić, tak, ja ŭsio pisaŭ, — błytana adkazvaje mužčyna.

Anałahičnaja historyja skłałasia z pradstaŭnikami kampanii «Javaštranstur». Abvinavačany tłumačyć, što niekali supracoŭničaŭ ź firmaj — braŭ u ich arendu aŭtobus dla pajezdak u Biełastok. Paźniej pačalisia kanflikty («jany stali stavić umovy»). U vyniku I. taksama vyrašaje adpomścić: nakiravany danosy ab pieradačy chabaraŭ (epizod №8).

Siarod śpisu iłžyvych danosaŭ taksama vyłučajecca epizod №7: danos napisany ŭ adnosinach padatkovamu inśpiektaru pra toje, što jana atrymała chabar u pamiery 2000 rubloŭ.

— Pa dadzienym epizodzie što možacie rastłumačyć?

— Byŭ kamieralny kantrol… U maim vypadku jana vyklikała pasažyraŭ, była hrupa 50 čałaviek, jana amal usich vyklikała. Ja davaŭ tłumačeńni pa pajezdcy. Heta było rehularna. I ŭ mianie ŭźnikli padazreńni, što na mianie chto-to piša. Tamu ja byŭ na jaje [inśpiektara] kryŭdziŭsia i niejkim čynam chacieŭ joj adpomścić.

— Ale heta ž praca inśpiektara — praviarać, — adznačaje dziaržaŭny abvinavaŭca.

— Zhodny, ale ŭ nas było nieparazumieńnie ŭ razmovie. < …> Tak, ja heta pisaŭ i ŭ hetym raskajvajusia. Anałahičnaja situacyja apisana ŭ epizodzie №15: iłžyvy danos taksama napisany ŭ adras svajoj klijentki.

Mužčyna pisaŭ nie tolki pra niezakonnaje pieramiaščeńnie praź miažu narkotykaŭ, zbroi i sproby dać chabar, taksama jon abvinavačvaŭ ludziej u pracy na polskuju raźviedku i supracoŭnictvie z ekstremistami.

— Jana žyli ŭ Polščy, i ja dumaŭ: a čamu jana ŭ Polščy žyvie? Niekatoryja takija ŭ mianie byli zdahadki, — kamientuje čarhovy epizod mužčyna. — Jak ja ŭžo kazaŭ, jany ŭsie razam družyli suprać mianie. Ja dumaŭ, što jany ŭ adnym. Kali my stajali na miažy, jany nie razmaŭlali [z maju], ihnaravali.

Epizod №10 datyčycca pieravozki narkotykaŭ byłoj supracoŭnicaj turfirmy abvinavačanaha (taksama jon napisaŭ, što jana źbiraje infarmacyju pra deputataŭ i pieradaje polskim śpiecsłužbam). Mužčyna padkreślivaje, što i z hetaj žančynaj u jaho byli kanflikty.

— Vy ž mahli jaje prosta zvolnić i nie pracavać ź joj dalej, — udakładniaje dziaržaŭny abvinavaŭca. — Čamu vy vyrašyli pastupić takim čynam? Heta navat nie kankurent.

— Sprava ŭ tym, što jana potym ad inšych firm pačała vazić. Ja chacieŭ adpomścić joj, što jana vaziła, a potym pajšła.

Złačynstvy, u jakich jon abvinavačvaŭ ludziej, źjaŭlajucca ciažkimi abo asabliva ciažkimi i ŭsie hetyja danosy pahražajuć davoli surjoznymi nastupstvami? Heta pravierki, dahlady, pieratrusy.

— Častkova razumieŭ. Razumieŭ, što budzie niejkaja pravierka, tamu i pisaŭ.

— U vas pajezdki sarvalisia, kanflikty byli, pasažyry niepryjemnyja. Ci suadnosicca heta, na vašu dumku, z abvinavačvańniami ŭ asabliva ciažkim złačynstvie?

— Ja zhodny, ja pierabolšvaŭ. Ja [byŭ] va ŭzbudžanym stanie, u paryvie złości, žadańni adpomścić.

— Akramia hetaha, byŭ jašče jaki-niebudź matyŭ? — udakładniaje sudździa.

— Mieŭ na ŭvazie, što, moža być, klijenty viernucca da mianie, jakija pajšli razam sa starejšymi [hrupami].

— Čamu vy vybrali takuju taktyku — pisać danosy — zamiest taho, kab udaskanalvać svaje pasłuhi?

— Ja ŭsio ž udaskanalvaŭ svaje pasłuhi: mnoha novaha prydumaŭ — prahramki, naprykład. I mnie było kryŭdna, što mianie kapijavali. Usio, što ja ni zrablu, u mianie kapijavali.

— Pa ŭsich 18 epizodach źviestki, pra jakija vy pisali, prydumanyja? Byli ci choć najmienšyja padstavy padazravać ludziej?

— Nie, padstaŭ nie było, — paśla nievialikaj paŭzy adkazvaje abvinavačany.

• 0
• 0
• 2
• 3
• 2
• 0
• 4
• 0