«Bolš za 600 stabalnych vynikaŭ». Siońnia stanuć viadomyja vyniki pieršaha CE
Siońnia stanuć viadomyja vyniki centralizavanaha ekzamiena ad 26 maja pa 14 profilnych vučebnych pradmietach, piša BiełTA.
U centralizavanym ekzamienie pa 14 profilnych vučebnych pradmietach, jaki adbyŭsia 26 maja, uziali ŭdzieł 56,9 tys. vypusknikoŭ škoł.
«Udzielniki ekzamiena pakazali dastatkova dobryja vyniki. Maksimalna mahčymy vynik — 100 bałaŭ pa profilnych vučebnych pradmietach u asnoŭny dzień praviadzieńnia CE zmahli atrymać 622 vučni, u 2024 hodzie takich było 636. Stabalniki jość pa 13 vučebnych pradmietach. Bolš za ŭsio maksimalnych vynikaŭ pa matematycy — 175. Nie zmahli spravicca z ekzamienacyjnaj rabotaj (atrymali nul bałaŭ) 64 vypuskniki, u 2024 hodzie takich taksama było 64 čałavieki», — raskazali ŭ Minadukacyi.
Siarednija bały pa ŭsich vučebnych pradmietach pieravysili adznaku ŭ piaćdziasiat bałaŭ. Tak, siaredni bał pa matematycy skłaŭ 60,9 bała, pa chimii — 63,4, pa historyi Biełarusi — 65,9, pa hramadaznaŭstvie — 58,7, pa fizicy — 65,9.
«Kolkaść vypusknikoŭ, jakija pa vynikach CE atrymali adznaki 9 i 10, dobra kareluje ŭ pracentnych suadnosinach z hadavymi školnymi adznakami. Kolkaść vypusknikoŭ, jakija pa vynikach CE atrymali niezdavalniajučyja adznaki, niaznačnaja. Tyja vypuskniki, jakija nie zmahli ŭziać udzieł u centralizavanym ekzamienie ŭ asnoŭnyja terminy, zmohuć prajści jaho ŭ reziervovyja dni», — dadali ŭ ministerstvie.
Sioleta reziervovymi dniami praviadzieńnia CE vyznačanyja 21 i 23 červienia, jakija sumieščanyja z reziervovymi dniami centralizavanaha teściravańnia.
Infarmacyju pra vyniki CE možna atrymać u asabistym kabiniecie na sajcie Respublikanskaha instytuta kantrolu viedaŭ.
Ciapier čytajuć
«Jak tolki čujuć pra Rasiju — dyk usio… U čym prablema?» U Minsku nie chočuć zdavać kvateru čałavieku z rasijskim pašpartam16
Kamientary