Novy samalot Airbus A330-200 raźličany na 281 pasažyra.
Avijakampanija «Biełavija» paviedamiła, što ich fłot upieršyniu papoŭniŭsia novym typam samalota — Airbus A330-200.
«Biełavija» anansuje, što heta daść mahčymaść ździajśniać dalokamahistralnyja rejsy i adkryvać novyja maršruty.
Dalokaść palotu Airbus A330-200 — da 12 tysiač kiłamietraŭ. U Boeing 737-8, jakija raniej byli ŭ fłocie avijakampanii, — 6570 kiłamietraŭ, u dva razy mieniej.
Novy samalot raźličany na 281 pasažyra: 18 miescaŭ u biznes-kłasie i 263 u «ekanomie».
Niuans u tym, što hety samalot dastaŭleny ŭ abychod sankcyj. Usiaho «Biełavija» rychtuje da palotaŭ try samaloty Airbus A330-200. Jany ŭžo atrymali rehistracyjnyja numary EW-587PD, EW-588PD i EW-589PD, pisała «Biuro» ŭ niadaŭnim rasśledavańni.
Sa śniežnia 2021 hoda dziaržaŭnaja avijakampanija «Biełavija» znachodzicca pad sankcyjami ES, a sa žniŭnia 2023 hoda — pad sankcyjami ZŠA. Kab pryhnać u Biełaruś samaloty Airbus, była vykarystanaja schiema abychodu sankcyj z udziełam firmy-prakładki. Naziralniki za samalotami sfatahrafavali pavietranyja sudny, kali jany tolki prybyli ŭ Nacyjanalny aeraport Minsk u žniŭni minułaha hoda.
Na ich vidać nadpis Onur Air i sinija chvasty z palmami. I heta nie vypadkova. Niekatory čas hetyja pavietranyja sudny vykarystoŭvalisia avijakampanijaj Saudi Arabian Airlines, čyje samaloty majuć jakraz taki sinija chvasty z palmami.
U sakaviku 2020 hoda samaloty byli pieradadzienyja tureckaj kampanii Onur Air, jakaja praz dva hady abviaściła pra bankructva. Ź listapada i śniežnia 2023 hoda ŭsie try samaloty naležać hambijskaj kampanii Magic Air. Mienavita hetaja kampanija dastaviła samaloty ŭ Minsk.
Kamientary