Paśla Isłamskaj revalucyi 1979 hoda ŭłady Irana ličać sabak «niačystymi» žyviołami, a vałodańnie imi — adnym ź simvałaŭ zachodniaha ŭpłyvu na krainu.
Ułady prynamsi 18 haradoŭ Irana ŭviali zabaronu na vyhuł sabak — uśled za stalicaj krainy Tehieranam, dzie takaja zabarona dziejničaje z 2019 hoda. Pry hetym akazalisia zabaronienymi nie tolki prahułki z chatnimi hadavancami, ale i ich pieravozka ŭ asabistym transparcie, piša Bi-bi-si.
Paśla Isłamskaj revalucyi 1979 hoda ŭłady Irana ličać sabak «niačystymi» žyviołami, a vałodańnie imi — adnym ź simvałaŭ zachodniaha ŭpłyvu na krainu.
Iranskija zakony nie zabaraniajuć vałodać sabakami, adnak u apošnija hady aficyjny Tehieran raspačaŭ kroki, jakija stvarajuć značnyja ciažkaści dla haspadaroŭ chatnich hadavancaŭ.
U 2010 hodzie iranskaje Ministerstva kultury i isłamskaj aryjentacyi zabaraniła rekłamu praduktaŭ, pryznačanych dla ŭładalnikaŭ chatnich žyvioł.
U 2014-m deputaty parłamienta Irana pasprabavali pryniać zakon, pa jakim ludzi, jakija vyhulvajuć sabak, pavinny byli padviarhacca štrafam i navat publičnaj łupcoŭcy, ale hetyja miery tady nie atrymali dastatkovaj padtrymki. U 2019 hodzie ŭ Tehieranie byŭ zabaronieny vyhuł sabak, ułady taksama zahadali palicyi adbirać aŭtamabili, u jakich pieravoziać chatnich hadavancaŭ, i zakryvać nielicenzijnyja vieterynarnyja kliniki. Pradstaŭnik uładaŭ horada, dzie zabarona na vyhuł sabak była ŭviedzienaja ŭ niadzielu, zajaviŭ, što suprać parušalnikaŭ «buduć raspačatyja dziejańni jurydyčnaha charaktaru».
«Vyhuł sabak ujaŭlaje pahrozu dla hramadskaha zdaroŭja, spakoju i kamfortu», — skazaŭ žurnalistam prakuror z zachodniaha horada Chamiedan Abas Nadžafi.
Čamu isłamskija zakony ličać sabak «niačystymi»
Havoračy ab niedapuščalnaści vałodańnia sabakami, iranskija kansiervatary spasyłajucca na paniaćcie «nadžasa», heta značyć brud. Pry hetym jany nahadvajuć słovy praroka Muchamieda pra toje, što «anioły nie ŭvachodziać u dom, dzie žyvuć sabaki».
Pa hetym pytańni taksama jość ukaz Viarchoŭnaha lidara Irana ajatały Ali Chamieniei.
Jon zajaviŭ, što praktyka ŭtrymańnia sabak «vartaja asudžeńnia», kali žyvioły nie vykarystoŭvajucca dla vypasu žyvioły, palavańnia abo achovy. Chamieniei dadaŭ, što z punktu hledžańnia isłamskich zakonaŭ vałodańnie sabakami zabaroniena (ličycca charamam), kali heta robicca dla pierajmańnia nieisłamskaj kultury.
Tłumačačy nieabchodnaść zabaronaŭ, ułady Irana śćviardžajuć, što atrymlivajuć skarhi ad miascovych žycharoŭ, zakłapočanych stabilnaściu sacyjalnych asnoŭ, biaśpiekaj i hramadskim zdaroŭjem. Adnak kolkaść uładalnikaŭ sabak pastajanna raście, asabliva siarod haradskoj moładzi. Mnohija ličać heta formaj pratestu suprać iranskich uładaŭ, jakija imknucca abmiežavać asabistuju svabodu ludziej.
Pavodle źviestak źviazanaha ź dziaržavaj infarmahienctva Borna, chatnija žyvioły jość u kožnaha dziasiataha žychara Irana, pry hetym samyja papularnyja — sabaki i katy.
Praciŭniki dziejańniaŭ uładaŭ, u tym liku aktor i scenaryst Miechrab Kasiemchani, kažuć, što zabarony mohuć adbicca na žyćci 12 młn irancaŭ.
«Ci padumali aŭtary hetych narmatyvaŭ ab nastupstvach? — pytajecca Kasiemchani ŭ svaim Instagram. — I pra toje, ci moža naviazvańnie asabistych pieravah niešmatlikaj hrupy takoj vialikaj kolkaści ludziej pryvieści da šyrokaj niezadavolenaści?»
Niahledziačy na ŭviedzienyja za apošnija hady abmiežavańni, ułady daloka nie zaŭsiody zabiaśpiečvajuć ich vykanańnie, i mnohija ŭładalniki sabak praciahvajuć vyhulvać svaich žyvioł u Tehieranie i inšych haradach krainy, piša ahienctva AFP.
Niekatoryja vychodziać na takija prahułki nočču i robiać heta ŭ addalenych rajonach. Inšyja viazuć hadavancaŭ na mašynach, kab vyhulać u biaźludnym miescy.
Takija pavodziny (jak i tajemnyja viečarynki, dzie pjuć ałkahol, i nievykanańnie isłamskaha dres-kodu) — niefarmalny pratest suprać abmiežavańniaŭ asabistaj svabody ŭładami Irana, adznačaje słužba manitorynhu Bi-bi-si.
Jaki Cichanoŭski bolš padabajecca Śviatłanie — Siarhiej-2020 ci Siarhiej-2025?3
Kamientary