Zahavaryła adna z dačok Pucina: Čałaviek, jaki zabraŭ miljony žyćciaŭ i razburyŭ majo
Łuiza Rozava, mierkavanaja dačka Uładzimira Pucina, da hetaha času žyła byccam u cieni, upieršyniu adkryta raspaviadaje pra svaju siamju i žyćcio ŭ francuzskaj emihracyi. Bild sabraŭ jaje najvažniejšyja zajavy.
Łuiza Rozava naradziłasia 3 sakavika 2003 hoda ŭ Sankt-Pieciarburhu jak Lizavieta Kryvanohich. Jaje maci, mahčyma, była kachankaj Pucina i paśla naradžeńnia dziaŭčyny niečakana razbahacieła. Sama Łuiza skončyła mastackuju akademiju ŭ Paryžy i ładziła antyvajennyja vystavy, ale nikoli prama nie kamientavała vajnu va Ukrainie i mahčymaje svajactva z Pucinym. Taksama viadoma, što ŭ jaje śviedčańni ab naradžeńni pustaja hrafa «baćka», ale ŭkazana imia pa baćku «Uładzimiraŭna».
Apošnija hady Łuiza zaŭsiody sačyła za tym, kab u sacsietkach nie pakazvać poŭnaściu svoj tvar. Ciapier jana ŭpieršyniu vykłała adkrytyja sełfi i napisała ŭ adnym z pastoŭ:
«Tak cudoŭna znoŭ pakazać śvietu svoj tvar. Heta kožny dzień nahadvaje mnie, kim ja naradziłasia i chto razburyŭ majo žyćcio. Čałaviek, jaki adabraŭ miljony žyćciaŭ i razburyŭ majo».
Pry hetym imia Pucina jana prama nie nazyvaje.
Da hetaha rasijskaja apazicyja nieadnarazova krytykavała Rozavu za publičnaje žyćcio ŭ sacsietkach z elemientami raskošy: jana publikavała fota ŭ dyzajnierskaj vopratcy, lotała na pryvatnych samalotach, pracavała dydžejem u modnych kłubach.
Paśla lutaha 2022 hoda, pa jaje słovach, jana pakinuła Rasiju, razarvała ŭsie sacyjalnyja suviazi i ciapier žyvie ŭ «załatoj kletcy»: «Ja nie mahu prajścisia pa lubimym Pieciarburhu. Nie mahu pabyvać u lubimych miescach i ŭstanovach»
Ab prablemach ukrainskich i rasijskich siemjaŭ u hetaj vajnie jana pry hetym nie skazała ni słova. Ale i za miežami Rasii joj praciahvali nahadvać pra minułaje: tak, u červieni rasijskaja mastačka ŭ emihracyi Naścia Radzivonava admoviłasia ad supracoŭnictva z paryžskimi halerejami, u jakich antyvajennaje mastactva kuryravała Rozava — mienavita taja, chto nibyta nažyłasia na rasijskim režymie.
Ciapier Łuiza ŭpieršyniu adreahavała na heta pramymi słovami:
«Ja sapraŭdy vinavataja ŭ dziejańniach svajoj siamji, jakaja mianie navat nie čuje?»
U červieni Bild pahutaryŭ sa studentami akademii ICART, jakuju Rozava paśpiachova skončyła, a taksama z mastakami, jakija viedali jaje pa pracy ŭ halerejach. Dumka ŭsich pra jaje była chutčej stanoŭčaja: «Vielmi miłaja dziaŭčyna. Ci vinavata jana ŭ tym, chto jaje baćki?»
Ciapier, u paryžskaj emihracyi, Łuiza Rozava imkniecca źmianić svoj imidž. U Instagram jana asudžaje vajnu va Ukrainie i krytykuje kult brendaŭ, jaki charakterny dzieciam elity: «Lnianaja kašula biez łahatypa moža pieradać bolš praŭdy, čym dyzajnierskaja šoŭkavaja sukienka».
Ciapier čytajuć
Stancyju mietro na praśpiekcie Pieramožcaŭ pieradumali budavać?5
Kamientary