Vilenski sud adfutboliŭ Bałkunca, jaki skardziŭsia litoŭskim uładam na Viačorku i Matolku
Jon chacieŭ, kab Litva rasśledavała ŭzłom «Hajuna», ale jaho zajavu adchilili.
Palityk Dźmitryj Bałkuniec apublikavaŭ vyznačeńnie Vilenskaha akruhovaha suda, jakoje stavić kropku ŭ jaho pierapiscy ź litoŭskimi ŭładami nakont prajekta «Biełaruski Hajun».
U lutym 2025 hoda Bałkuniec i Rusłan Chazin (były rabotnik «Hrodna Azota», u 2012-m źjechaŭ u Sankt-Pieciarburh, žyŭ u Rasii) napisali ŭ hienieralnuju prakuraturu Litvy z prośbaj hruntoŭna rasśledavać uzłom prajekta «Biełaruski Hajun» Antona Matolki. Jany paviedamlali litoŭskim siłavikam, što da jaho dziejnaści moža być datyčny Franak Viačorka.
Łohika Bałkunca i Chazina była ŭ tym, što prajekt «Biełaruski Hajun» nibyta stvaraŭsia litoŭskaj jurydyčnaj asobaj BNR100 Consortium, a značyć, chaj Litva i raźbirajecca z usimi, datyčnymi da jaho.
Papiarovaja vajna išła niekalki miesiacaŭ.
Palicejski kamisaryjat dadatkova apytaŭ zajaŭnikaŭ i admoviŭsia pačać dasudovaje śledstva. Tady Bałkuniec i Chazin paskardzilisia ŭ prakuraturu. Znoŭ mima. Narešcie Bałkuniec i Chazin pajšli ŭ Vilenski haradski ŭčastkovy sud — abskardžvać rašeńnie prakurora.
Sudździa častkova stała na ich bok i paprasiła prakuraturu i palicejskich usio ž razabracca ŭ spravie. Heta nie spadabałasia ŭžo prakuroru — i jon napisaŭ skarhu ŭ vyšejstajačy sud.
I voś 3 červienia 2025 hoda Vilenski akruhovy sud pastaviŭ kropku ŭ pytańni.
«Zajaŭniki śćviardžajuć, što pradstaŭniki BNR100 Consortium mahli być datyčnymi da ździajśnieńnia złačynnaj dziei, ale jany nie pradjavili nijakija abjektyŭnyja dadzienyja, jakija mohuć heta paćvierdzić. Adny tolki subjektyŭnyja razvahi zajaŭnikaŭ nie dazvalajuć rabić takuju vysnovu, — havorycca ŭ dakumiencie. — Sud vyrašyŭ, što niama nijakich źviestak pra toje, što złačynnaje dziejańnie mahło być ździejśniena na terytoryi Litvy, albo hramadzianami Litvy, albo tymi, chto pastajanna žyvie ŭ Litvie».
Zajava Bałkunca i Chazina kančatkova adchilena, abskardžvać jaje niemahčyma.
Kamientary
Čamu ŭsie miedyja maŭčać pra Matolku, a ŭmoŭnaha Piatruchina ŭsioj kodłaj “vykryvajuć” pry luboj nahodzie?