Ministra kultury Čarnieckaha zavieźli ŭ ivacevickuju kałoniju i pakazali śpiektakl
U papraŭčaj kałonii №22 u Ivacevickim rajonie asudžanyja pastavili śpiektakl pavodle pjesy Alaksieja Dudarava «Radavyja». Hladzieć jaho pryjechaŭ ministr kultury Rusłan Čarniecki.
Pierad pačatkam śpiektakla ministru kultury Rusłanu Čarnieckamu, kiraŭnictvu Biełaruskaha sajuza kiniematahrafistaŭ, Nacyjanalnaj kinastudyi «Biełaruśfilm», Departamienta vykanańnia pakarańniaŭ MUS, a taksama, jak śćviardžaje Biełta, svajakam asudžanych pakazali łakacyi, jakija źniavolenyja padrychtavali «razam z histaryčnymi rekanstruktarami i rabotnikami Ivacevickaha historyka-krajaznaŭčaha muzieja».
Kožnaja placoŭka pakazvała roznyja baki dziejnaści partyzanaŭ u tyle voraha. Byli pakazany partyzanskaja škoła, sanitarnaja pałatka, padpolnaja drukarnia kamsamolskaj haziety «Zaria» i padryŭ varožaha ciahnika, piša Biełta.
Na terytoryi kałonii źniavolenyja navat vyryli akopy.
Režysior pastanoŭki, staršynia kamisii pa prafiesijnaj adukacyi dla moładzi Biełaruskaha sajuza kiniematahrafistaŭ Ihar Piatroŭ raspavioŭ, čamu mienavita pjesa «Radavyja» była abranaja dla pastanoŭki. «My doŭha padbirali materyjał. Patrebna była aktualnaja pjesa. A siońnia asabliva važnaja patryjatyčnaja tematyka. Tamu byŭ zrobleny vybar na karyść pjesy «Šarahovyja», — skazaŭ režysior.
Ministr kultury vysoka acaniŭ śpiektakl, paviedamlaje Biełta. Jon źviarnuŭ uvahu na toje, što asudžanyja byli ščyrymi na scenie – i «heta hałoŭnaje, tamu što hladač moža daravać usio, akramia falšy».
Rusłan Čarniecki taksama dadaŭ, što asudžanyja z zadavalnieńniem uzialisia za realizacyju prajekta histaryčnaj rekanstrukcyi i śpiektakla.
«Kali ty bačyš taki vydatny vynik, to serca radujecca. Treba praciahvać takija inicyjatyvy. My prykładziem usie namahańni, kab jak maha bolš asudžanych z roznych kałonij uciahnuć u takija prajekty. Jany dapamahajuć sacyjalizacyi ludziej, pryščaplajuć kaštoŭnaści. Heta pavinna dapamahčy padapiečnym kałonij niešta ŭśviadomić», — skazaŭ ministr kultury.
Namieśnik načalnika DVP Uładzisłaŭ Mandryk adznačyŭ, što supracoŭniki departamienta i asudžanyja praz rekanstrukcyju i śpiektakl chacieli skazać dziakuj prodkam. «U nas, aficeraŭ, i ŭ śpieckantynhienta adnolkavaja acenka padziej Vialikaj Ajčynnaj vajny. My ŭsie razumiejem, čaho kaštavała Pieramoha. Ažyjataž byŭ vialiki, bolš za 80 čałaviek vykazali žadańnie paŭdzielničać u rekanstrukcyi», — skazaŭ Uładzisłaŭ Mandryk.
Ciapier čytajuć
«Stajać na svaim, kožny nakolki moža!» Vialikaja hutarka z Natallaj Dulinaj pra hopnikaŭ z HUBAZiKa, Kaleśnikavu i što tam u kaho ŭ kałonii13
Kamientary