Apošnija miesiacy ź Jeŭropy ŭ Biełaruś amal nie honiać śviežyja aŭto. Voś u čym pryčyna

Prodažy skaracilisia ŭ niekalki razoŭ

Niahledziačy na toje, što na mytnym składzie pad Minskam chapaje śviežych luksavych aŭto ź Jeŭropy, dla šerahovych pradaŭcoŭ viasna — pačatak leta 2025 hoda nie samy lepšy pieryjad. 

Na nizkija prodažy skardziacca ŭsie — ad pierahonščykaŭ i firm-pasiarednikaŭ da aŭkcyjonnych placovak, jakija zatočanyja na pracu z klijentami ź Biełarusi i Ukrainy.

Pa słovach pradstaŭnika adnoj z aŭkcyjonnych placovak, dzie asnoŭnyja klijenty — pakupniki ź Biełarusi, za apošnija niekalki miesiacaŭ prodažy skaracilisia ŭ niekalki razoŭ. 

Na sajcie inšaj placoŭki niadaŭna źjaviłasia infarmacyja pra źnižeńnie stavak na dastaŭku mašyn ź Vilni ŭ Minsku, što taksama pakazvaje na toje, što popyt padaje.

Čamu tak adbyvajecca?

Adnoj z asnoŭnych pryčyn nazyvajuć rost kursa jeŭra adnosna dalara. 

Kali pa stanie na 1 krasavika adzin jeŭra kaštavaŭ 1,05 dalara, to ŭžo u kancy miesiaca jon vyras da 1,14. Ciapier jeŭra kaštuje bolš za 1,15 dalara. 

Pavialičyć

Za apošnija niekalki miesiacaŭ jeŭra padaražeŭ adnosna dalara pryblizna na 10%. Adpaviedna, nastolki ž dla biełarusaŭ padaraželi mašyny ź Jeŭropy.

Sam aŭtamabil, dastaŭka i navat mytnyja płaciažy pryviazanyja da jeŭra, a mašyny ŭ Biełarusi tradycyjna pradajuć za dalary, choć u vypadku z mašynami ź Jeŭropy dalaravaha składnika ŭ ich cenaŭtvareńni niama.

U vyniku ŭmoŭny VW Passat B8 ź Jeŭropy, jaki z usimi vydatkami kaštuje ad 16 tysiač jeŭra, u pieršyja dni viasny abychodziŭsia mienš čym u 17 tysiač dalaraŭ. Toj samy aŭtamabil, pryhnany ŭ mai abo ciapier, abychodzicca ŭžo ŭ 18 400 dalaraŭ. Roźnica składaje amal 1 500 dalaraŭ.

Praz heta śviežy pryhon, jak i kupla aŭto na zamovu, stali mienš vyhadnymi, bo biełaruski rynak patrymanych aŭto z šerahu pryčyn nie chutka reahuje na kurs jeŭra.

Rynak śviežapryhnanych mašyn i biez taho pieranasyčany, kab pradaŭcy mahli pavyšać ceny. I navat pradaŭšy aŭtamabil, pierahonščyki nie śpiašajucca jechać u Jeŭropu pa novy, bo nie fakt, što atrymajecca pradać u plus mašynu, pryviezienuju pa novym kursie. 

Aproč taho, jość šmat mašyn sa Štataŭ, na cenaŭtvareńnie jakich nijak nie ŭpłyvaje ŭmacavańnie jeŭra. Taksama treba ŭličvać, što praz sankcyjnyja abmiežavańni mnohija vymušana pieraklučylisia na aŭto z Karei i Kitaja, tamu jeŭrapiejski kirunak ciapier značna prasieŭ.

Za takija hrošy možna adrazu kupić mašynu ŭ Biełarusi

Pierahonščyk, jaki zajmajecca mašynami ź Jeŭropy na zamovu, kaža, što za apošnija miesiacy kolkaść achvotnych pryhnać aŭto ź Jeŭropy skaraciłasia pracentaŭ na 70—80. Kažuć, što za takija hrošy možna adrazu kupić mašynu ŭ Biełarusi.

Jašče adna pryčyna, čamu aŭtapierahonny biznes užo nie toj, — niemahčymaść pierapradavać mašyny na Rasiju.

Za vyklučeńniem premijalnych aŭto va ŭzroście da troch hadoŭ razmytnieńnie aŭto praź Biełaruś nie maje sensu praź nieabchodnaść rasijanam płacić za takija aŭto kamiercyjny ŭtylzbor, kali z momantu mytnaha afarmleńnia prajšło mienš za 12 miesiacaŭ.

Admietna, što na tych, chto pracuje na rasijskim kirunku, umacavańnie jeŭra adnosna dalara nijak nie ŭpłyvaje. Pryčym nie z-za taho, što 10% dla pakupnikoŭ, jakija mohuć sabie dazvolić darahija aŭto, nie hrošy.

Reč u tym, što kali ŭ Biełarusi mašyny pradajuć za dalary, to ŭ Rasii — za rasijskija rubli. A rasijski rubiel za apošnija miesiacy adnosna jeŭra nie tolki nie patańnieŭ, a naadvarot — umacavaŭsia.

Pavialičyć

Kali na pačatku viasny za 1 jeŭra davali kala 95 rasijskich rubloŭ, to bližej da siaredziny maja kurs apuściŭsia da 90 rubloŭ za jeŭra.

• 5
• 0
• 5
• 3
• 0
• 1
• 0
• 1