Tramp skazaŭ, što ZŠA daviadziecca znoŭ pastaŭlać zbroju Ukrainie. Pientahon adrazu ž abviaściŭ, što ŭžo pačynaje pastaŭki
«Treba, kab jany mahli abaraniacca. Pa ich ciapier vielmi mocna bjuć. Pa ich vielmi mocna bjuć», — skazaŭ prezident ZŠA.
Prezident ZŠA Donald Tramp u paniadziełak skazaŭ, nie ŭdajučysia ŭ padrabiaznaści, što Złučanyja Štaty adpraviać Ukrainie novyja partyi zbroi. Pientahon nieadkładna abviaściŭ, što ŭžo adpraŭlaje jaje, piša Bi-bi-si.
«My źbirajemsia pasłać im jašče kolkaść zbroi. Nam treba heta zrabić. Treba, kab jany mahli abaraniacca. Pa ich ciapier vielmi mocna bjuć. Pa ich vielmi mocna bjuć. Nam daviadziecca adpravić jašče zbroju, tak — abarončaha charaktaru ŭ asnoŭnym. Ale pa ich vielmi, vielmi mocna bjuć. Stolki ludziej hinie ŭ hetaj zavarušcy», — skazaŭ Donald Tramp žurnalistam u Biełym domie i, jak pieradajuć suśvietnyja ahienctvy, paŭtaryŭ, što niezadavoleny pavodzinami Pucina.
Bolš padrabiazna pra hetyja mierkavanyja novyja pastaŭki Tramp nie havaryŭ: heta byŭ karotki abmien pytańniami i adkazami na roznyja temy pierad viačeraj z premjer-ministram Izraila Bińjaminam Nietańjachu.
«Pa rasparadžeńni prezidenta Trampa Ministerstva abarony adpraŭlaje Ukrainie dadatkovyja abarončyja ŭzbrajeńni, kab ukraincy mahli abaraniacca, pakul my pracujem nad dasiahnieńniem tryvałaha miru», — havorycca ŭ zajavie pres-sakratara Pientahona Šona Parnieła, jakaja źjaviłasia na sajcie ministerstva nieŭzabavie paśla zajavy Trampa.
Jakija heta ŭzbrajeńni, Parnieł nie ŭdakładniŭ. Pres-sakratar vajennaha viedamstva ZŠA adnačasova zapeŭniŭ, što revizija vajennaj dapamohi ZŠA pa ŭsim śviecie praciahvajecca. Hetaj revizijaj amierykanskija aficyjnyja asoby tłumačyli prypynieńnie vajennaj dapamohi Ukrainie.
Na minułym tydni stała viadoma — spačatku z presy, a potym z aficyjnych krynic — što Pientahon prypyniŭ adpraŭku zbroi Ukrainie. Zachodniaja presa paviedamlała, što ZŠA prypynili adpraŭku Ukrainie niekatorych vidaŭ zienitnych rakiet i inšych vysokadakładnych bojeprypasaŭ.
U paniadziełak pres-sakratarka Biełaha doma Kerałajn Levit skazała, što paŭza ŭ pastaŭkach Ukrainie źviazanaja ź pierahladam Złučanymi Štatami stratehii vajennych pastavak pa ŭsim śviecie.
«Heta standartnaja pravierka Pientahonam usich uzbrajeńniaŭ, usioj dapamohi i ŭsioj padtrymki, jakuju ZŠA akazvajuć usim krainam i rehijonam śvietu, a nie tolki Ukrainie», — skazała Levit na bryfinhu, paćvierdziŭšy, što revizija pravodzicca pa daručeńni ministra abarony ZŠA Pita Chiehsieta.
«Paŭza ŭziata z metaj analizu, kab pierakanacca, što ŭsio, što Pientahon adpraŭlaje, adpaviadaje intaresam našaj armii», — skazała Levit.
Vydańnie Politico u paniadziełak uviečary paviedamiła sa spasyłkaj na ananimnych aficyjnych asob, što pastaŭki Złučanymi Štatami niekatorych vidaŭ techniki Ukrainie mohuć adnavicca paśla niekalkich sustreč śpiecapasłanca Trampa Kita Kiełaha i ministra abarony Ukrainy Rustema Umierava na hetym i nastupnym tydni.
Praŭda, z publikacyi Politico vynikaje, što pakul havorka idzie tolki pra asobnyja vidy techniki: pavodle słoŭ surazmoŭcaŭ vydańnia, ZŠA dali Ukrainie zrazumieć, što chutka adnavić pastaŭki inžyniernaj techniki i «niekatorych braniamašyn», ale dakładnyja terminy pakul nie nazvanyja.
Kit Kiełah i Rustem Umieraŭ pa płanach sustrenucca na hetym tydni ŭ Rymie na kanfierencyi, pryśviečanaj dapamozie Ukrainie, a zatym jašče dvojčy, na hetym i nastupnym tydni, u Kijevie.
U piatnicu, 4 lipienia, prezident Ukrainy Uładzimir Zialenski pahavaryŭ pa telefonie z Donaldam Trampam i paśla razmovy nazvaŭ jaje «vielmi važnaj i karysnaj».
Zialenski napisaŭ u sacsietkach, što abmierkavaŭ z Trampam rasijskija ŭdary dronami i rakietami i damoviŭsia, što Ukraina i ZŠA «buduć pracavać nad pavieličeńniem abarony nieba».
Ciapier čytajuć
«Hanna adkazała: «Tak!» Vital Hurkoŭ zrabiŭ prapanovu ruki i serca. Chto ž niaviesta?8
Kamientary