Što nasamreč znachodzicca pobač z kurskim plažam, na jakim ad ukrainskich dronaŭ paciarpieli ludzi
U vyniku ataki dronaŭ u Kursku ŭ noč na sieradu zahinuli troje čałaviek. Kiraŭnik vobłaści Alaksandr Chinštejn zajaviŭ, što ŭdar pa haradskim plažy byŭ metanakiravanym i pobač nie było vajennych abjektaŭ. Adnak usiaho ŭ 600 mietrach ad miesca vybuchu znachodzicca filijał navukova-daśledčaha instytuta Ministerstva abarony, što stavić pad sumnieŭ aficyjnuju viersiju, piša ASTRA.
Unačy ŭ sieradu, 9 lipienia, Kursk atakavali BPŁA. 3 čałavieki zahinuli, u tym liku supracoŭnik Rashvardyi, 7 paranienyja, u tym liku piacihadovaje dzicia. Usie jany znachodzilisia padčas nalotu na haradskim plažy.
«Biesprecedentny pa svajoj žorstkaści ŭdar pa mirnym abjekcie. Uletku, u śviata, u miescy, dzie navat blizka niama vajennych abjektaŭ. Dzie adpačyvali ludzi razam ź dziećmi», — napisaŭ vykonvajučy abaviazki hubiernatara Chinštejn.
«Na terytoryi plažu pravodziacca śledčyja dziejańni, kab paćvierdzić fakt terarystyčnaha aktu z boku USU, jakija metanakiravana ŭdaryli pa adpačyvajučych», — dadaŭ prakramloŭski kanał «Ren-TB».
Adnak, jak vyśvietliła ASTRA, 8 lipienia kala 23-j hadziny nad terytoryjaj plaža «Haradski» ŭ Kursku BPŁA byŭ źbity srodkami SPA MA RF. Na plaž upali abłomki ŭžo źbitaha bieśpiłotnika, paćvierdzili krynicy ASTRA. U vyniku padzieńnia abłomkaŭ BPŁA byli paranienyja, u tym liku, Palina Minaškina i jaje piacihadovy syn Anton.
Prykładna ŭ 600 mietrach ad plaža «Haradski» ŭ Kursku znachodzicca filijał 18-ha Centralnaha navukova-daśledčaha instytuta (CNDI) Minabarony Rasii, jaki zajmaje terytoryju ŭ šeść hiektaraŭ, zaŭvažyła «Ahienctva».
18-y CNDI histaryčna zajmaŭsia raspracoŭkaj sistem radyjoraźviedki, dalokaj i spadarožnikavaj suviazi i kadziravańnia. Jon da hetaha času zajmajecca vytvorčaściu radyjołakacyjnaj i radyjonavihacyjnaj aparatury, a taksama dziejnaściu, što zabiaśpiečvaje vajennuju biaśpieku, vynikaje z dadzienych «SPARK-Interfaks». Instytut rehistruje prybory dla radyjotechniki, u tym liku anteny dla sistem radyjomanitorynhu, radyjopielenhacyi i radyjołakacyi, adznačaje «Ahienctva».
Usiaho nad Kurskaj vobłaściu ŭ noč na 9 lipienia źbili 23 BPŁA, paviedamili ranicaj u MA RF.
Ciapier čytajuć
«Dla biełaruskich uładaŭ ja, chutčej, mahčymaść, a nie pahroza». Kaleśnikava dała vialikaje intervju Zołatavaj77
Kamientary