Śpikier Siejma Litvy pra šyrokaje vykarystańnie ruskaj movy ŭ Vilni: Z hetaj prablemaj nielha mirycca
Jak ličyć śpikier Siejma Saulus Skviarnialis, maštaby vykarystańnia ruskaj movy ŭ stalicy Litvy — surjoznaja prablema, jakuju nielha nie zaŭvažać.
Niahledziačy na toj fakt, što, pavodle słoŭ palityka, na hetaj movie časta razmaŭlajuć pierajechaŭšyja ŭ Litvu biełarusy i ŭciekačy z Ukrainy, lidar sajuza demakrataŭ «U imia Litvy» zapeŭnivaje — nieabchodna realizavać prahramu intehracyi, jakaja ŭklučała b abaviazkovaje vałodańnie dziaržaŭnaj litoŭskaj movaj, piša Delfi.lt.
«Napeŭna, heta treba zrabić, prosta vyjšaŭšy prahulacca, asabliva ŭ centr Vilni, i heta (častaje vykarystańnie ruskaj movy) sapraŭdy možna vyrazna adčuć. Na žal, heta tak», — skazaŭ S. Skviarnialis u sieradu ŭ efiry Žinių radijas.
«Ja dumaju, što pierš za ŭsio nam treba vielmi dakładna vyznačycca z tymi ludźmi, jakija hatovy tut žyć, zastacca, jakija pryjechali pa roznych pryčynach — jak ź Biełarusi abo Ukrainy, tak i ź inšych krain — i bačać tut svaju budučyniu i budučyniu svaich siemjaŭ, heta pavinna być vielmi mocnaja prahrama intehracyi.
Što vałodańnie dziaržaŭnaj movaj — heta nieabchodnaść, i heta źviazana z sacyjalnymi harantyjami, roznymi sacyjalnymi dapamohami, mahčymaściu pracavać u peŭnych śfierach. Im prosta treba ŭśviadomić, što bieź intehracyi, biez vałodańnia dziaržaŭnaj movaj tut niama pierśpiektyŭ, i z hetym nielha mirycca», — zajaviŭ śpikier Siejma.
S. Skviarnialis pryznaje, što paśla niepryznanych Zachadam prezidenckich vybaraŭ u Biełarusi ŭ 2020 hodzie i pačatku ŭvarvańnia Rasii va Ukrainu ŭ lutym 2022 hoda ŭ Litvu prybyło niamała hramadzian hetych krain. Tamu, adznačyŭ palityk, staŭleńnie da vykarystańnia movy tut było niekalki bolš libieralnym. Adnak, praciahnuŭ jon, dziaržaŭnaja mova pavinna vałodać adpaviednym statusam.
«Dumaju, hetuju prablemu taksama nielha ihnaravać, bo maštab davoli vialiki. I znoŭ ža, treba havaryć pra toje, što dziaržaŭnaja mova pavinna vałodać statusam u dziaržavie i pavinna być abaroniena va ŭsich śfierach žyćcia», — dadaŭ kiraŭnik parłamienta.
Apošnim časam razharelisia dyskusii nakont vykarystańnia ruskaj movy ŭ Vilni. Padstavaj dla ich staŭ post u Facebook žurnalista Edmundasa Jakiłajcisa, jaki zajaviŭ, što maštab vykarystańnia ruskaj movy ŭ stalicy nieprymalny, i padniaŭ pytańnie ab tym, jak budzie ažyćciaŭlacca viartańnie stalicy.
Ciapier čytajuć
«Ja chaču spraviadlivaści — i dla žančyn, i dla siabie». Ščyraja hutarka z Andrejem Stryžakom pra skandał z dykpikami, zaležnaści i budučyniu61
Kamientary