U čaćvier u stalicy Abjadnanych Arabskich Emirataŭ prezident Azierbajdžana Ilcham Alijeŭ i premjer-ministr Armienii Nikoł Pašynian upieršyniu pravodziać dvuchbakovuju sustreču biez pasiarednikaŭ i nie na palach mižnarodnych samitaŭ. Ekśpierty kažuć, što sustreča ŭ Abu-Dabi moža stać novaj sprobaj dźviuch krain damovicca — i zrabić heta biez pasiarednictva Rasii.
Bi-bi-si raźbirałasia, pra što buduć havaryć dva lidary i nakolki daloka da miru pamiž imi.
Na sustrečy ŭ Abu-Dabi budzie abmiarkoŭvacca adkryćcio kamunikacyj pamiž dźviuma krainami, demarkacyja miažy i inšyja pytańni, što zastajucca niavyrašanymi, ličyć historyk Žyrajr Liparycian — ideołah prymireńnia z Azierbajdžanam i Turcyjaj, da mierkavańnia jakoha prysłuchoŭvajecca ŭrad Armienii.
Armienija i Azierbajdžan varahavali bolš za tryccać hadoŭ z-za Nahornaha Karabacha, ale ciapier jany jaho navat nie abmiarkoŭvajuć.
U 2020—2023 hadach Azierbajdžan adnaviŭ kantrol nad terytoryjaj, karabachskija armianie ŭciakli ŭ Armieniju, a Jerevan admoviŭsia ad pretenzij na rehijon.
Ale pamiž dźviuma krainami zastalisia surjoznyja razychodžańni.
Adno ź ich — pytańnie pra darohu, jakaja pavinna złučyć terytoryju Azierbajdžana ź jaho ekskłavam Nachičevańniu.
Mienavita hetaja tema stanie asnoŭnym pradmietam abmierkavańnia ŭ Abu-Dabi, ličyć armianski palitołah Tyhran Hryharjan.
Baku patrabuje pradastavić jamu «Zanhiezurski kalidor» — bieśpierapynnaje złučeńnie praz Armieniju ŭ Nachičevań.
Rasija bačyła siabie ŭ hetym pracesie pasiarednikam, jaki vyjhraje ad adkryćcia rehijanalnych kamunikacyj, i ŭ pieramovach aktyŭna ŭdzielničaŭ vice-premjer RF Alaksiej Aviarčuk. Maskva chacieła, kab darohu praz Armieniju kantralavała pamiežnaja słužba FSB RF.
U Jerevanie nastojvali, što taki scenaryj supiarečyć suvierenitetu Armienii — i što hruzy, jakija prachodziać praź jaje terytoryju, pavinny prachodzić pravierku. Pašynian taksama nie chacieŭ udziełu FSB u prajekcie.
Jak alternatyvu jon prapanuje prajekt «Pierakryžavańnie śvietu» — adkryćcio miežaŭ z Azierbajdžanam i Turcyjaj, što stvoryć najkaraciejšy maršrut pamiž Marmurovym i Kaśpijskim morami, a taksama pamiž Čornym moram i Piersidskim zalivam.
Adnosiny Baku z Kramlom mocna sapsavalisia za apošni hod, i ciapier tam taksama nie chočuć udziełu Rasii ŭ adkryćci kamunikacyj.
«Azierbajdžan, padajecca, bolš nie bačyć miesca dla Rasii ŭ zabieśpiačeńni suviazi pamiž asnoŭnaj terytoryjaj Azierbajdžana i Nachičevańniu praz terytoryju Armienii. Heta stvaraje mahčymaść dla abodvuch bakoŭ prasunucca ŭ abmierkavańni pytańnia kamunikacyj», — ličyć Zaur Šyryjeŭ, navukovy supracoŭnik Bierlinskaha centra Karniehi pa vyvučeńni Rasii i Jeŭrazii.
Źmiena padychodu robić aktualnymi kampramisy, jakija prapanoŭvała Armienija — naprykład, pryciahnieńnie mižnarodnaj achoŭnaj kampanii dla pravierki hruzaŭ.
Prama ciapier baki abmiarkoŭvajuć z Vašynhtonam realizacyju takoha varyjantu pry ŭdziele amierykanskaj kampanii, pisała rehijanalnaja ekśpiertka Alesia Vartanian. Pra heta ž paviedamlaŭ žurnalist Tatuł Akapian, jaki pieršym apublikavaŭ datu i miesca sustrečy Pašyniana z Alijevym.
Jerevan i Baku aficyjna nie paćviardžali hetuju infarmacyju.
Pra rolu ZŠA ŭ pracesie kaža i toje, što ŭ aŭtorak dziaržaŭny sakratar ZŠA Marka Rubia skazaŭ, što spadziajecca na chutkaje padpisańnie mirnaj damovy pamiž bakami.
Jašče viasnoj armianski dypłamat, jaki havaryŭ na ŭmovach ananimnaści, raspaviadaŭ Bi-bi-si, što Jerevan sprabavaŭ pradstavić Biełamu domu zaviaršeńnie armiana-azierbajdžanskaha kanfliktu jak mahčymaść prademanstravać vydatnyja miratvorčyja zdolnaści Donalda Trampa.
Turcyja taksama zacikaŭlena ŭ adkryćci miežaŭ pamiž dźviuma krainami.
U červieni Pašynian ździejśniŭ histaryčny vizit u Stambuł pa zaprašeńni prezidenta Redžepa Taipa Erdahana.
Paśla hetaha ŭ presie źjavilisia paviedamleńni pra abmierkavańnie kampramisnaha varyjanta darohi praz Armieniju.
«Ankara choča zaklučeńnia mirnaha dahavora i adkryćcia daroh ź pierśpiektyvaj na toje, što hety dahavor adkryje novuju eru ŭ hieapalitycy Paŭdniovaha Kaŭkaza», — adznačaje Šudžat Achmiedzade, niezaležny daśledčyk z Baku. Ale jon padkreślivaje, što Ankara nie budzie dziejničać nasupierak intaresam Azierbajdžana.
Kali kamunikacyi buduć adkryty biez udziełu Maskvy, heta stanie vielizarnym udaram pa rasijskim upłyvie na Paŭdniovym Kaŭkazie, adznačaje Tyhran Hryharjan.
Ciapier čytajuć
Alimpijski čempijon Aramnaŭ: Nam vyhadnaja praciahłaja vajna, i Vova dy Saša ŭ joj pieramohuć24
Kamientary