Jany śćviardžajuć, što efiekt bačny ŭžo praz čatyry dni.
Pra toje, što kivi — krynica vitaminaŭ, viadoma daŭno. Adnak, jak piša Onet.pl, daśledavańnie, praviedzienaje ŭ Novaj Ziełandyi na bazie Univiersiteta Otaha, pakazała, što ŭžo praz čatyry dni spažyvańnia žoŭtaha kivi (Actinidia chinensis) možna zaŭvažyć jaho ŭpłyŭ na palapšeńnie nastroju.
U daśledavańni brali ŭdzieł try hrupy ludziej. Udzielniki adnoj źjadali pa dva žoŭtyja kivi kožny dzień. Druhaja hrupa prymała 250 mh vitaminu C u vyhladzie dabaŭki, a treciaja atrymlivała płaceba — rečyva bieź vitaminu C.
Usich udzielnikaŭ (ich było 155, ź ich 63% — žančyny) abjadnoŭvaŭ nizki ŭzrovień vitaminu C u kryvi. Ich uzrost — ad 18 da 35 hadoŭ. Daśledavańnie ciahnułasia 8 tydniaŭ: dva tydni da i paśla asnoŭnaj fazy byli fazami ŭvodu i «vymyvańnia», kali ŭdzielniki ničoha nie prymali, ale prachodzili abśledavańni. Astatnija čatyry tydni — heta pieryjad spažyvańnia kivi abo pryjom preparataŭ.
Kožnyja dva tydni navukoŭcy rabili analiz kryvi, a taksama aceńvali nastroj, ahulnaje samaadčuvańnie i žyćciovuju enierhiju ŭdzielnikaŭ. Akramia taho, sami ŭdzielniki kožnyja dva dni zanosili danyja pra son, nastroj, aktyŭnaść i samaadčuvańnie ŭ ankietu na smartfonie.
Atrymanyja vyniki pa-sapraŭdnamu ździvili navukoŭcaŭ. Ludzi, jakija jeli kivi, adčuli palapšeńnie nastroju i pryliŭ enierhii ŭžo praz čatyry dni. Najmacniejšy efiekt naziraŭsia praz 14—16 dzion. Tyja, chto prymaŭ vitamin C u tabletkach, adčuvali nievialikaje palapšeńnie da 12 dnia, ale jano nie mieła statystyčnaj značnaści ŭ paraŭnańni z hrupaj płaceba.
Navukoŭcy pryjšli da vysnovy, što kivi moža spryjać palapšeńniu nastroju navat u ludziej ź psichałahična stabilnym stanam. Pavodle ich mierkavańnia, taki efiekt źviazany nie tolki z vysokim utrymańniem vitaminu C, ale i ź inšymi karysnymi kampanientami, što źmiaščajucca ŭ hetaj sadavinie — klatčatkaj, folijevaj kisłatoj i kalijem.
Adnak, jak adznačajuć niekatoryja ekśpierty, atrymanyja vyniki treba aceńvać krytyčna. U pieršuju čarhu z-za taho, što finansavańnie daśledavańnia išło nie tolki z boku Univiersiteta Otaha, ale i ad najbujniejšaha ŭ śviecie pastaŭščyka kivi — kampanii Zespri International. Heta stavić pad pytańnie niezaležnaść daśledavańnia.
Ciapier čytajuć
Adstaŭny padpałkoŭnik milicyi adsudziŭ kvateru ŭ svajoj dački. Hučnaja siamiejnaja historyja z Bresta7
Kamientary