U Ispanii zahadkava zahinuŭ eks-čynoŭnik MUS Ukrainy ŭ miescy, dzie zabili rasijskaha lotčyka

U ispanskim žyłym kompleksie Cala Alta ŭ Viljachojasie, dzie byŭ zabity rasijski lotčyk Maksim Kuźminaŭ, pry niavyznačanych abstavinach zahinuŭ ukrainiec Ihar Hrušeŭski — były čynoŭnik Departamienta pa baraćbie z arhanizavanaj złačynnaściu MUS Ukrainy, piša «Jeŭrapiejskaja praŭda».

Uviečary 29 červienia Ihar kupaŭsia ŭ basiejnie žyłoha kompleksu, dzie niadaŭna nabyŭ kvateru. Jaho znajšli tvaram uniz u vadzie, biez prykmiet žyćcia. Pieršuju dapamohu sprabavali akazać susiedzi, zatym — miedyki, ale vyratavać jaho nie ŭdałosia.

Jak adznačajecca, 61-hadovy Hrušeŭski byŭ byłym vysokapastaŭlenym čynoŭnikam Departamienta pa baraćbie z arhanizavanaj złačynnaściu MUS Ukrainy, a paźniej — Nacyjanalnaj palicyi. Śmierć vyklikała padazreńni siarod žycharoŭ. Choć na ciele nie było vidavočnych śladoŭ hvałtu, z adnaho vucha išła kroŭ. Žychary miarkujuć, što pryčynaj mahła stać raptoŭnaje spynieńnie serca abo insult, adnak nie vyklučajuć i mahčymaść zabojstva.

Hrušeŭski, jaki nie mieŭ ciesnaha kantaktu z susiedziami, zastavaŭsia dla ich mała viadomym čałaviekam. Tolki paśla incydentu stała viadoma, što jon byŭ źviazany z baraćboj z arhanizavanaj złačynnaściu va Ukrainie.

Jaho imia atrymałasia znajści tolki ŭ archiŭnych ukrainskich rejestrach jurydyčnych asob 1990-ch hadoŭ, dzie jon fihuravaŭ jak kiraŭnik UBAZ u Čarkaskaj i Kiravahradskaj abłaściach. Sam padraździaleńnie było likvidavana ŭ 2015 hodzie ŭ ramkach palicejskaj reformy.

Niekatoryja žychary miarkujuć, što Hrušeŭski moh užo być na piensii i pasialiŭsia ŭ Ispanii.

Hibiel Hrušeŭskaha adbyłasia mienš čym praz paŭtara hoda paśla zabojstva ŭ tym ža kompleksie rasijskaha lotčyka Maksima Kuźminava, jaki źbieh va Ukrainu razam z vajennym viertalotam Mi-8. Tady rasijskija ahienty zabili jaho ŭ padziemnym parkinhu kompleksu.

Padabienstva miesca i abstavinaŭ dźviuch śmierciaŭ vyklikaje padazreńni ŭ mahčymaj datyčnaści rasijskich śpiecsłužbaŭ i da hetaj spravy.

Pakul što aficyjnych vysnoŭ śledstva pra pryčyny śmierci Hrušeŭskaha niama. Sprava Kuźminava, tym časam, dahetul znachodzicca pad hryfam sudovaj tajamnicy.

Varta adznačyć, što ŭ žniŭni 2023 hoda stała viadoma, što viertalot Mi-8 Uzbrojenych sił Rasii apynuŭsia va Ukrainie ŭ vyniku śpiecapieracyi. Piłotam Mi-8 byŭ 28-hadovy Maksim Kuźminaŭ. Jon atrymaŭ uznaharodu — 500 tysiač dołaraŭ u hryŭnievym ekvivalencie.

A 19 lutaha 2024 hoda ŭkrainskaja vajennaja raźviedka paćvierdziła, što Maksima Kuźminava znajšli miortvym u Ispanii.

• 1
• 0
• 1
• 1
• 0
• 2
• 2
• 0