Bobi Kałade (Bobby Kolade) pieratvaraje staroje adzieńnie ŭ novyja kalekcyi. Jaho brend Buzigahill — heta nie prosta moda, a vyklik spažyvieckaj kultury. Jon pryniaŭ pryncypovaje rašeńnie vykarystoŭvać tolki adzieńnie sekand-chend.
Pavodle acenak, va ŭsim śviecie štohod pradajecca ad 80 da 150 miljardaŭ adzinak adzieńnia. Paličycie sami, kolki futbołak, pižam, kašul, pinžakoŭ i par škarpetak vy sami kuplajecie štohod. Pryčym z rostam zamožnaści krain Treciaha śvietu spažyvańnie adzieńnia i vopratki praciahvaje raści. Jak piša Spiegel.de, pavodle prahnozu kansałtynhavaj kampanii McKinsey, spažyvańnie tkanin tekstylnaj pramysłovaściu ŭ najbližejšyja piać hadoŭ vyraście prykładna na 63% — da 102 miljonaŭ ton na hod.
Mižnarodny kansultatyŭny kamitet pa pytańniach bavoŭny (International Cotton Advisory Committee) padličyŭ: dla vytvorčaści adnaho kiłahrama tekstylu ŭ siarednim patrabujecca bolš za 9000 litraŭ vady.
Tolki na bavoŭnu, nieabchodnuju dla adnoj pary džynsaŭ vahoj 800 hramaŭ, spatrebicca kala 7000 litraŭ, a na zvyčajnuju futbołku (150 hramaŭ) — prykładna 1350 litraŭ. Razam heta bolš jak piaćdziasiat zapoŭnienych vannaŭ — i heta biez uliku vady, što raschodujecca na pašyŭ, apracoŭku tkaniny i transpartavańnia.
Usio heta — tolki dla taho, kab u vyniku adzieńnie apynułasia na tekstylnych zvałkach: častku spalvajuć, jašče bolš paharšajučy stan atmaśfiery, a astatniaje spakoŭvajuć u vializnyja ciuki i adpraŭlajuć za miažu — u krainy, dzie heta stanovicca prablemaj dla miascovaha nasielnictva. Naprykład, u Uhandu, kudy, pavodle źviestak brytanskaj niaŭradavaj arhanizacyi WasteAid, štohod traplaje bolš za 90 000 ton užyvanaha adzieńnia.
Zamiest fast fashion — second hand
Bolšaść staroha adzieńnia, što traplaje ŭ krainy Hłabalnaha Poŭdnia, pachodzić z kantejnieraŭ dla zboru adzieńnia ŭ Jeŭrapiejskim sajuzie. U siarednim adzin jeŭrapiejec štohod vykidvaje kala 11 kiłahramaŭ adzieńnia — hod-dva pachodzić i vykidvaje. Najbujniejšymi eksparciorami sekand-chendu ŭ miežach ES stali Hiermanija, Niderłandy, Polšča i Italija.
Bobi Kałade (Bobby Kolade), dyzajnier z Uhandy, pierakanany, što śvietu siońnia patrebnyja nie novyja kalekcyi, a sposaby spravicca z nastupstvami masavaha spažyvańnia. Jak i mnohija inšyja maładyja madeljery, jon pryniaŭ pryncypovaje rašeńnie nie vykarystoŭvać novych tkanin u svajoj marcy. Adnak, u adroźnieńnie ad tych, chto pracuje z reštkami bujnych modnych brendaŭ (deadstock), Kałade vykarystoŭvaje toje, što ŭ Uhandzie nazyvajuć «mivumba» — užyvanaje adzieńnie, impartavanaje z krain Hłabalnaj Poŭnačy.
Svaje materyjały jon źbiraje na rynku Owino u centry Kampały. Siarod kupaŭ sekand-chendu dyzajnier razam z kamandaj znachodzić sapraŭdnyja skarby. Akramia tkaniny dla svaich kalekcyj, jon vykarystoŭvaje i staryja hadzińniki, ź jakich potym vyrablaje ŭpryhažeńni.
Adnak hałoŭny pradukt jahonaj marki Buzigahill, zasnavanaj u 2022 hodzie, — mienavita adzieńnie. Toje, što zachodniaje hramadstva ličyć śmiećciem, Kałade pieratvaraje ŭ formu pratestu suprać fast fashion.
Kožny jahony vyrab atrymlivaje śpiecyjalny «pašpart», dzie paznačana pachodžańnie materyjałaŭ, ich skład i hod stvareńnia rečy. Kali jeŭrapiejskija brendy padajuć takuju praktyku jak elemient prazrystaści, kab pryciahnuć spažyŭcoŭ, to Kałade robić heta tamu, što vieryć u važnaść sumlennaści i adkrytaści.
Na Bierlinskim tydni mody dyzajnier prezientavaŭ kalekcyju, u jakoj spartyŭny styl pieraplatajecca z kłasikaj: džynsy dapoŭnieny ełastyčnym pojasam, a štany atrymlivajuć abšłahi, jak u trenirovačnych madelach.
Jon vykarystoŭvaje bijaraskładalnyja materyjały na asnovie kruchmału i žełacinu, kab nadać formu vierchniaj častcy adzieńnia, viaža sukienki-sietki z machry starych futbołak.
«My robim usio sami. Kožnaja reč unikalnaja, bo kožny materyjał, znojdzieny na rynku Owino, isnuje tolki ŭ adnym asobniku. Navat kali kroj u maksi-sukienki z šaści kašulaŭ paŭtarajecca, vynik nikoli nie byvaje adnolkavy», — adznačaje dyzajnier.
Dapamoha raźvićciu z vykarystańniem ihołki i nitki
Bobi Kałade ŭžo vypuściŭ adzinaccać kalekcyj pad nazvaj «Return to Sender» («Viartańnie adrasatu»). Hety słohan maje padvojny sens. Z adnaho boku, jon adsyłaje da chvali viartańniaŭ internet-zakupaŭ u krainach nakštałt Hiermanii, dzie amal pałova nabytaha adzieńnia viartajecca pradaŭcam.
Z druhoha — heta iraničny kamientar da źjavy, jakuju krytyki nazyvajuć «śmiećcievym kałanijalizmam»: kali krainy Hłabalnaha Poŭnačy pieranosiać prablemu adkidaŭ na Hłabalny Poŭdzień.
Ułady Uhandy ŭžo sprabavali abmiežavać abo całkam zabaranić impart sekand-chendu — i ŭ 2016, i ŭ 2023 hodzie. Ale zaležnaść ad hetaj haliny zanadta vialikaja: jana zabiaśpiečvaje pracoŭnyja miescy, prynosić padatkovyja pastupleńni i kormić dziasiatki tysiač ludziej.
Ekśpierty śćviardžajuć: choć impart užyvanaha adzieńnia sapraŭdy škodzić raźvićciu miascovaj pramysłovaści, jaho zabarona, chutčej za ŭsio, tolki adkryje rynak dla tannaj pradukcyi z Kitaja.
Pavodle Kałade, žyćcio staroha adzieńnia nie pavinna zakančvacca na pieraprodažy. Jon choča, kab ludzi, jakija pracujuć u hetaj halinie, mieli nie prosta vypadkovuju pracu, a sapraŭdnuju mahčymaść raźvivacca i stvarać novaje.
Tamu jaho marka, dzie ciapier pracuje 35 čałaviek, — heta miesca dla tych, chto choča mieć hodnuju i źmiastoŭnuju rolu ŭ suśvietnym handli starym adzieńniem.
Jak kaža sam dyzajnier: «Heta vybar nas usich — nie zastavacca ŭvieś čas na samym nizie łancuha sekand-chendu».
Ciapier čytajuć
Cichanoŭski patłumačyŭ, čamu jon tak pavodziŭ siabie ŭ Ńju-Jorku69
Kamientary
----
Nie baču vopratki ni na adnyym fotazdymku.
Dzie toj "hałoŭny pradukt"?!
uchvalny padychod