Minadukacyi Polščy ŭskładniła pastupleńnie va ŭniviersitety mnohim zamiežnikam

Ministerstva navuki i vyšejšaj adukacyi Polščy vydała pastanovu, jakaja moža zabłakavać pryjom va ŭniviersitety mnohich zamiežnych abituryjentaŭ. Dla paćvierdžańnia viedańnia polskaj abo inšaj movy na patrebnym uzroŭni ciapier patrabujucca siertyfikaty, jakija zamiežniki nie paśpiavajuć atrymać svoječasova. Inicyjatyŭnaja hrupa ŭžo skłała pietycyju z prośbaj adkłaści ŭstupleńnie ŭ siłu pastanovy, piša Most.

Čamu abituryjenty nie paśpiavajuć padrychtavać dakumienty

Z 1 lipienia 2025 hoda ŭ Polščy ŭstupiŭ u siłu Zakon ab likvidacyi parušeńniaŭ u vizavaj sistemie. Adna ź mieraŭ datyčyłasia pryjomu zamiežnikaŭ u polskija VNU.

Jany pavinny paćvierdzić vałodańnie movaj, na jakoj budzie prachodzić navučańnie, na ŭzroŭni nie nižej za B2.

Ale ŭ hetym zakonie nie było skazana, jakim sposabam treba paćviardžać viedańnie. Dla hetaha patrabavałasia pryniać asobnuju pastanovu Ministerstva adukacyi. Adnak da pačatku pryjomnaj kampanii nijakich tłumačeńniaŭ ad ministerstva jašče nie było.

Tady Kanfierencyja rektaraŭ polskich VNU (KRASP) zaklikała ministra, narešcie, unieści jasnaść u praviły naboru zamiežnikaŭ. Naprykład, dazvolić VNU pravodzić unutranyja testy dla vyznačeńnia ŭzroŭniu viedaŭ.

Pra zvarot rektaraŭ stała viadoma 29 lipienia. A ŭžo 30 lipienia ministr navuki i vyšejšaj adukacyi Marcin Kulasiek padpisaŭ pastanovu, u jakoj pieraličanyja sposaby, jak možna paćvierdzić viedańnie movy dla pastupleńnia va ŭniviersitet. I siarod ich niama ni ŭnutranych testaŭ VNU, ni navat dakumientaŭ ab siaredniaj abo siaredniaj śpiecyjalnaj adukacyi, atrymanych u polskich navučalnych ustanovach. Tamu navat abituryjenty, jakija zdavali ekzamien na atestat stałaści ŭ polskaj škole, nie mohuć paćvierdzić hetym, što viedajuć polskuju movu na dastatkovym uzroŭni.

— Heta poŭnaje admaŭleńnie ŭ pryznańni ich namahańniaŭ i dasiahnieńniaŭ, — kaža Darja, biełaruska, jakaja raspaviała pra prablemu.

Prablemy navat u tych, chto ŭžo apłaciŭ navučańnie

Kab paćvierdzić viedańnie polskaj movy na ŭzroŭni nie nižej B2, zamiežnikam treba mieć siertyfikat dziaržaŭnaha ekzamienu abo siertyfikaty ECL i TELC. Taksama ŭ śpisie jość niekatoryja inšyja dakumienty, ale jany datyčacca vielmi vuzkaj kolkaści abituryjentaŭ, naprykład, tych, chto skončyŭ padrychtoŭčy (nulovy) kurs VNU abo inšy ŭniviersitet. Dla atrymańnia adukacyi na movie, adroznaj ad polskaj, pieralik dakumientaŭ trochi inšy.

Vierahodna, vyklučajučy VNU ź sistemy acenki viedaŭ, Ministerstva adukacyi pajšło nasustrač MZS — heta viedamstva ličyła, što VNU, jak zacikaŭlenaja bok, nie mohuć sami praviarać viedy, i dla hetaha patrebny staronnija instytuty. Heta vyklučyć złoŭžyvańni, jakija byli vyjaŭleny ŭ asobnych VNU, što aktyŭna nabirali zamiežnikaŭ na płatnaje navučańnie.

Prablema ŭ tym, što ekzamieny na viedańnie movy pravodziacca nie tak časta. Naprykład, dziaržaŭny ekzamien pa polskaj — tolki niekalki razoŭ na hod, i na jaho treba zahadzia zapisvacca. Prajści TELC praściej, ale nieviadoma, ci chopić usim miescaŭ. A pastanova, padpisanaja 30 lipienia, była apublikavana 31-ha, a ŭstupiła ŭ siłu 1 žniŭnia — to-bok bieź pierachodnaha pieryjadu.

Ciapier, pavodle słoŭ Darji, mnohija maładyja ludzi nie mohuć atrymać kančatkovaha paćviardžeńnia ab zaličeńni, navat kali jany ŭžo zdali ŭsie ŭnutranyja ŭstupnyja ekzamieny i apłacili navučańnie.

Abituryjenty skłali pietycyju

Abituryjenty ŭžo skłali pietycyju z patrabavańniem pieranieści ŭstupleńnie novych praviłaŭ na nastupny hod, a pakul pryznavać unutranyja testy VNU.

Aŭtary pietycyi ličać, što vychad novych praviłaŭ užo paśla pačatku pryjomnaj kampanii parušaje asnoŭny pryncyp prava — što zakon nie maje zvarotnaj siły. Jany źviarnuli ŭvahu Ministerstva adukacyi, što mnohija abituryjenty nie paśpiavajuć zdać dziaržaŭny ekzamien, kab paćvierdzić moŭny ŭzrovień.

• 2
• 0
• 0
• 4
• 2
• 2
• 6
• 0