MZS Biełarusi admianiŭ žyvuju čarhu pa apastyl u Minsku. Ciapier treba zapisvacca zahadzia

Hałoŭnaje konsulskaje ŭpraŭleńnie MZS Biełarusi z 19 žniŭnia admianiła žyvuju čarhu na padaču dakumientaŭ na apastyl. Ciapier usie naviedvalniki — i tyja, chto prynosić svaje dakumienty sam, i tyja, chto źviartajecca pa davieranaści — pavinny papiarednie zapisacca.

U HKU apastylujuć akty hramadzianskaha stanu, u tym liku paśviedčańni ab naradžeńni i šlubie, a taksama daviedki ab niesudzimaści. Hetyja dakumienty časta patrebnyja biełarusam dla lehalizacyi ŭ inšych krainach.

Siońnia ŭ tematyčnym čacie ludzi raskazvajuć, što MZS raptoŭna ŭvioŭ papiaredni zapis. Niekatorym pašancavała — jany zmahli zapisacca na 22 žniŭnia. Ale chtości atrymaŭ zapis až na 20 vieraśnia.

Jak raskazaŭ devby.io čałaviek, jaki chadziŭ učora va ŭpraŭleńnie, MZS sapraŭdy spyniła pryjom dakumientaŭ na apastyl pa žyvoj čarzie. Hety čałaviek sam učora paśpieŭ zaskočyć litaralna ŭ apošni vahon.

«Učora była apošniaja mahčymaść zrabić apastyl pa žyvoj čarzie. Ja pryjechaŭ a 7-j ranicy, užo było čałaviek z 60. Supracoŭniki MZS skazali, što z zaŭtrašniaha dnia prymać dakumienty buduć tolki pa papiarednim zapisie.

Ale ŭčora jašče dziejničaŭ raniejšy paradak. To-bok ludzi pryjazdžajuć da 6-7 ranicy i składajuć papiarovy śpis. Supracoŭniki jaho zabirajuć i potym zapuskajuć naviedvalnikaŭ pa čarzie. Ja adstajaŭ da 12.30, padaŭ svoj dakumient, zapłaciŭ 210 rubloŭ (zbor za apastylavańnie adnaho dakumienta — 5 BV). U toj ža dzień z 15.00 da 16.00 mnie vydali dakumient ź pierakładam.

Kali b ja pryjšoŭ siońnia, to pryjšłosia b čakać. Tak, učora zapisvali na 18 vieraśnia. Nie, tut niama błytaniny. Reč u tym, što papiaredni zapis i raniej isnavaŭ — ale tolki dla tych, chto padajecca pa davieranaści. Ciapier ža papiaredni zapis raspaŭsiudžvajecca na ŭsich», — raskazaŭ vidavočca.

U Hałoŭnym konsulskim upraŭleńni ludziam kažuć, što pryjom dakumientaŭ ciapier robicca pa papiarednim zapisie. Jon viadziecca pa budniach, akramia sierady, z 9.00 da 10.00. Pryjom dakumientaŭ — z 8.00 da 10.30 (pa sieradach — z 11.00 da 13.00).

Nie vyklučana, što ŭviadzieńnie papiaredniaha zapisu źviazana z ažyjatažam. Jaho mahła vyklikać situacyja u Polščy, dzie ZAHSy paśla tumannaha lista ad MUS stali patrabavać apastyl na biełaruskich paśviedčańniach ab naradžeńni i šlubie. Ale ŭčora ŭ MUS patłumačyli, što ZAHSy niapravilna interpretavali list, i apastyl pa ahulnym pravile nie patrebny.

MZS užo ŭvodziŭ papiaredni zapis na apastyl niekalki hadoŭ tamu, kali kala budynka vystrojvałasia vielizarnaja čarha z achvotnych. Adzin čas ludzi navat arhanizoŭvali ŭłasnuju čarhu — zapisvalisia ŭ śpiecyjalny sšytak. Papiaredni elektronny zapis na apastyl dziejničaje ŭ Ministerstvie adukacyi, dzie apastylujuć atestaty i dypłomy.

• 0
• 0
• 0
• 2
• 0
• 0
• 2
• 0