Minčuk čatyry hady trymaŭ u rabstvie piensijanieraŭ i prymušaŭ ich prasić miłaścinu. Jany ŭžo pamierli
U 2020 hodzie biełarus zabraŭ u piensijanieraŭ pašparty i zahadaŭ prasić hrošy ŭ minakoŭ kala kram i cerkvaŭ. Usie zdabytki jon zabiraŭ sabie, a paciarpiełych zapužvaŭ śmierciu. Mužčyny pamierli ad zachvorvańniaŭ.
Ciapier mužčyna aryštavany — jaho abvinavačvajuć u ekspłuatacyi ludziej (punkt 2 častki 2 art. 181-1 KK). Pa hetym artykule jamu pahražaje ad 3 da 10 hadoŭ kałonii.
Zhodna sa śledstvam, ź vieraśnia 2020 pa žnivień 2024 hoda 31-hadovy abvinavačany znachodziŭ biazdomnych i prapanoŭvaŭ im pracu na budoŭli i žyllo ŭ Minsku. Kali tyja pahadžalisia, zabiraŭ u ich pašparty i prymušaŭ žabravać kala cerkvaŭ i kram.
Paciarpiełymi ŭ spravie vystupili mužčyny 63 i 69 hadoŭ — žychary Minskaj i Mahiloŭskaj abłaściej. Zamiest budaŭničych instrumientaŭ «načalnik» vydaŭ im płakaty z nadpisami ab dapamozie i invalidnyja vazki. Mužčyna rastłumačyŭ, dzie im treba stajać i jak bolš efiektyŭna vyklikać žal u minakoŭ.
Uvieś dachod paciarpiełyja pavinny byli addavać «haspadaru». U vyniku jon zarabiŭ kala 60 tysiač rubloŭ.
«Mužčyna vykarystaŭ pahrozy, psichałahičny cisk i fizičnuju siłu, kab prymusić padparadkoŭvacca i vychodzić «na kropku» — da kram i cerkvaŭ. Ad ranicy jon advoziŭ ich na «pracu» i zabiraŭ pozna ŭviečary. Štodzionny zarobak tych, chto prosić miłaścinu, składaŭ paradku 100 rubloŭ», — piša pres-słužba prakuratury.
Paviedamlajecca, što ŭvieś čas abvinavačany źbivaŭ piensijanieraŭ i zabaraniaŭ im jeści, pić, kuryć i chadzić u tualet biez dazvołu. Jon taksama ŭstanaviŭ sistemu «adpracoŭki» — kali mužčyny nie źbirali dastatkova hrošaj, jon ich ablivaŭ ledzianoj vadoj i vystaŭlaŭ na bałkon u chałodnaje nadvorje.
Kali «načalnik» pabačyŭ, što piensijanier kuryć padčas žabravańnia, jon advioz jaho da raki i prymusiŭ siadzieć u vadajomie. Kali paciarpiełyja admaŭlalisia vykonvać zadańni, jon pahražaŭ kinuć mužčyn u tuju ž samuju vadu.
Piensijaniery bajalisia źviartacca da milicyi. Da sudu nad katam jany nie dažyli — pamierli ad zachvorvańniaŭ.
Abvinavačany vinu nie pryznaŭ. Akazałasia, što niadaŭna jon byŭ asudžany za avaryju, jakaja pryviała da śmierci čałavieka.
Kamientary