U Rasii raspracavali sistemu ananimnaha adsočvańnia pieramiaščeńnia ludziej i abjektaŭ bieź bijamietryi
Technałohija zasnavana na vykarystańni śpiecyjalnaj niabačnaj farby, jakaja nanosicca na adzieńnie ci pradmiet. Śpiecyjalnyja kamiery fiksujuć mietki i pieradajuć źviestki dla apracoŭki.
Siońnia manitorynh ludziej u asnoŭnym źviazany z vykarystańniem bijamietryi — raspaznavańnia tvaraŭ, adbitkaŭ palcaŭ, hołasu. Što tyčycca roznych pradmietaŭ, to vykarystoŭvajucca tradycyjnyja štrych-kody ci QR-kody, što nie zaŭsiody zručna.
Rasijskaja kampanija BPA Technologies prapanavała novaje rašeńnie, jakoje dazvalaje ananimna adsočvać pieramiaščeńnie jak ludziej, tak i pradmietaŭ. Dla hetaha vykarystoŭvajecca śpiecyjalnaja farba-mietka. Jana nie bačnaja čałaviečamu voku, ale lohka zdymajecca śpiecyjalizavanymi kamierami.
Choć skład farby nie raskryvajecca, raspracoŭščyki zapeŭnivajuć, što jana biaśpiečnaja dla čałavieka i navakolnaha asiarodździa, ustojlivaja da źniešnich uździejańniaŭ i nie ścirajecca pry kantakcie.
Kamiery sčytvajuć mietku, pieradajuć danyja ŭ analityčny modul, dzie štučny intelekt stvaraje ličbavy profil pieramiaščeńniaŭ u realnym časie.
Raspracoŭščyki raskazvajuć, što ich sistema moža być karysnaja ŭ roźničnym handli, łahistycy, transparcie, na składach, u ofisach i na pramysłovych abjektach. Jana dapamahaje identyfikavać i manitoryć abjekty (techniku, supracoŭnikaŭ i inšaje), ličyć naviedvalnikaŭ, kantralavać zahružanaść pamiaškańniaŭ, pasažyrapatok a taksama vyjaŭlaje niestandartnyja situacyi — usio ŭ realnym časie i biez vykarystańnia bijamietryi.
Jak adznačajecca na sajcie kampanii, BPA Vision zdolnaja stvarać dakładnyja scenaryi ŭzajemadziejańnia z naviedvalnikami i z supracoŭnikami, vyjaŭlać zakanamiernaści i kiravać biznes-pracesami biez parušeńnia kanfidencyjalnaści. Mietad efiektyŭny tam, dzie niemahčyma ci niepažadana vykarystoŭvać bijamietryju — naprykład, u handlovych załach abo ofisnych centrach.
Ekśpierty źviartajuć uvahu na toje, što novaja sistema nie padpadaje pad dziejańnie rasijskaha zakona ab bijamietryi, bo nie źbiraje piersanalnych danych. Mietki — heta tolki indyvidualnyja numary biez pryviazki da imia ci indyvidualnych źviestak, tamu technałohija farmalna zakonnaja.
Adnak jurysty i śpiecyjalisty bačać i słabaści: u suviazi z tym, što mietka nanosicca na adzieńnie, jano moža być pieradadziena inšaj asobie, isnuje ryzyka jaje rasšyfroŭki i padrobki. Akramia hetaha niebiaśpieku ŭjaŭlaje ŭciečka danych z baz, dzie moža zachoŭvacca suviaź pamiž unikalnym numaram i imiem kankretnaha supracoŭnika. Taksama isnuje niebiaśpieka, što pracadaŭca vykarystaje sistemu dla kantrolu za miežami pracoŭnaha miesca, što ŭžo zakranaje asabistaje žyćcio.
Skandał u «Jeŭraopcie». 96‑hadovamu dziadulu nie dazvolili prysieści na kresła kala kasy20
Kamientary
Jakaja biaśpieka, kali za taboj sočać?