Jak ciapier možna vyjechać i zajechać u Jeŭrasajuz, kali polskaja miaža zakrytaja?
Polšča całkam spyniła ruch na miažy ź Biełaruśsiu ŭ suviazi z vučeńniami «Zachad-2025». Mnohija biełarusy zastalisia ŭ Jeŭrasajuzie nie viedajučy, jak viartacca nazad. Niekatoryja navat paśpieli zakazać aŭtavoz dla viartańnia svajoj mašyny ŭ Biełaruś.
Ludzi nie viedali, što rabić z mašynami
U najbolš składanaj situacyi apynulisia biełarusy, jakija zastalisia ŭ Jeŭrasajuzie na aŭto ź biełaruskimi numarami i nie paśpieli viarnucca ŭ Biełaruś praz Polšču.
Zapyt «ci možna viarnucca mašynaj ź biełaruskaj rehistracyjaj praź Litvu» byŭ adnym z samych papularnych u pryhraničnych čatach.
Pry hetym dla niekatorych źjaŭlałasia navinoj, što jechać na biełaruskaj mašynie praź Litvu mohuć tolki tyja, chto maje litoŭski VNŽ, vizu abo hramadzianstva adnoj z krain Jeŭrasajuza.
Lubaja viza, vydadzienaja nie Litvoj, jak i VNŽ inšych krain, nie dajuć prava na prajezd pa terytoryi Litvy na aŭto ź biełaruskaj prapiskaj.
Tamu dla tych, chto nie maje hramadzianstva ES, vizy abo VNŽ Litvy zakryćcio miažy Polščaj stała sapraŭdnaj prablemaj.
Adnak u piatnicy stała viadoma, što litoŭski bok vyrašyŭ dazvolić mašynam ź biełaruskimi numarami, jakija viartajucca ŭ Biełaruś, pierasiakać svaju miažu. Hetaje praviła budzie dziejničać časova, na pieryjad zakryćcia miažy Polščaj.
Takim čynam viarnucca ŭ Biełaruś praź Litvu dazvolili ŭsim, chto nie paśpieŭ zrabić heta praz Polšču niezaležna ad typu vizy i VNŽ.
Ale vyjechać ź Biełarusi praź Litvu na aŭto ź biełaruskimi numarami pa-raniejšamu mohuć tolki hramadzianie ES, a taksama ŭłaśniki vizy abo VNŽ, vydanych Litvoj.
Z Łatvijaj — bieź pieramien
Z Łatvijaj składaniej, bo tam prajezd na mašynie ź biełaruskimi numarami zabaronieny dla ŭsich biez vyklučeńniaŭ. I Łatvija ŭ adroźnieńnie ad Litvy na nijakija pasłableńni nie pajšła.
Da taho ž z 1 vieraśnia dziejničajuć novyja praviły ŭjezdu ŭ Łatviju. Biełarusam treba nie paźniej čym za 48 hadzin da ŭjezdu (u tym liku tranzitnaha) zapoŭnić śpiecyjalnuju elektronnuju ankietu z asabistymi danymi i maršrutam.
Vyklučeńnie tolki dla tych, chto maje DNŽ abo vizu, vydadzienyja Łatvijaj.
Najaŭnaść DNŽ (časovaha ci pastajannaha) luboj ź inšych krain ES nie vyzvalaje ad abaviazku zapaŭniać ankietu za 48 hadzin da pryjezdu ŭ Łatviju.
Kolki kaštuje viarnuć mašynu aŭtavozam?
Pakolki dakładnaja data, kali moža być adnoŭleny ruch praź biełaruska-polskuju miažu, nieviadomaja, a pra mahčymaść vyjezdu praź Litvu abvieścili tolki ŭ piatnicu, mnohija ŭ pryhraničnych čatach pačali cikavicca, kolki budzie kaštavać dastavić aŭto z Polščy ŭ Biełaruś na łafiecie abo aŭtavozam.
Da zakryćcia miažy za dastaŭku mašyny z takich łakacyj, jak Kłajpieda, Maryjampale, Varšava, pieravozčyki brali pa 600-700 jeŭra. Tamu viartańnie samomu na aŭtobusie, a mašyny pieravozčykam — heta davoli istotnaja suma.
Niahledziačy na toje, što Litva davoli chutka dazvoliła viartacca praz svaju terytoryju, u čatach užo byli ludzi, jakija paśpieli damovicca na vyvaz mašyny aŭtavozam.
Adzin z karystalnikaŭ pryhraničnaha čata, jaki byŭ vymušany šukać dastaŭku aŭto aŭtavozam, padzialiŭsia svajoj historyjaj.
Siamja nie paśpieła viarnucca z adpačynku praz zatrymku samalota i zachrasła ŭ Varšavie z mašynaj na biełaruskaj rehistracyi. Šenhienskija vizy ŭ ich byli da 14 vieraśnia, tamu času na pryniaćcio rašeńnia było niašmat.
«Zadača: źjechać, zabraŭšy z saboj mašynu, i nie atrymać ban u Šenhien», — pisaŭ karystalnik.
Pamiž Turcyjaj i aŭtavozam
Dalej jon pryvodziŭ dva varyjanty z pralikami, jak možna vykanać hetuju zadaču. Pieršy — jechać praz Turcyju na mašynie, albo adpravić aŭto nazad u Biełaruś aŭtavozam, a samim viartacca aŭtobusam praź Litvu.
Pa padlikach biełarusa, vydatki na takoje vymušanaje padarožža praz Turcyju na siamju z troch čałaviek skłali b kala 1850 jeŭra.
Tamu vybrali druhi varyjant: jechać samim aŭtobusam praź Litvu, a mašynu pakinuć na parkoŭcy pad Varšavaj.
Paźniej u tym ža čacie karystalnik adpisaŭ spravazdaču, što znajšoŭ pieravozčyka za 600 jeŭra, ź jakim jedzie zaklučać damovu.
Miarkujučy pa kolkaści zapytaŭ na atrymańnie kantaktaŭ pieravozčykaŭ, ludziej, jakija apynulisia ŭ padobnaj situacyi, było niamała, ale pasłableńni z boku Litvy zrabili hety zapyt nieaktualnym.
U nievyznačanaj situacyi byli i turysty, jakija adpravilisia ŭ aŭtobusny tur pa Jeŭropie. Ale i dla ich situacyja taksama vyrašyłasia pazityŭna. Tym bolš u adroźnieńnie ad lehkavych aŭto aŭtobusy prapuskaje nie tolki Litva, ale i Łatvija.
Tamu asnoŭnaja prablema ciapier nie ŭ tych, chto nie paśpieŭ viarnucca ŭ Biełaruś ź Jeŭrasajuza, a ŭ tych, chto nie paśpieŭ viarnucca ź Biełarusi ŭ ES.
Tak, naprykład, za 30 chvilin da zakryćcia PP «Brest», u elektronnaj čarzie na vyjezd ź Biełarusi ŭ Polšču było zarehistravana 1280 mašyn.
Tym nie mienš, na pavieličeńnie čerhaŭ na miažy z Łatvijaj i Litvoj heta nie paŭpłyvała. Vyjezdu ŭ Litvu ŭ Kamiennym Łozie i Bieniakoniach čakaje mienš za 100 aŭtamabilaŭ. Na miažy z Łatvijaj čarhi ź lehkavych aŭta ŭvohule niama.
Jak vyjechać u Polšču?
Bližejšy šlach u Polšču lažyć praź Litvu, a bližejšyja bilety ź Minska abo Hrodna jość tolki na 22—23 vieraśnia. Ceny ad 200 rubloŭ.
Ale dabracca da Litvy i paśla pry nieabchodnaści da Polščy možna našmat chutčej. Tak, na sajcie ecolines.net jość bilety pa maršrucie Minsk — Ryha za 80 jeŭra (kala 284 rub.). Aŭtobus jedzie praź Bieniakoni.
Na sajcie «Atłas» bližejšyja kvitki ŭ Ryhu z vyjezdam na 16 vieraśnia. Cana — 240 rubloŭ.
Taksama ŭ Ecolines možna nabyć kvitki ź Minska ŭ Varšavu za 130 jeŭra ź pierasadkaj u Vilni. Bližejšyja volnyja miescy jość na 16 vieraśnia. Mierkavany čas pajezdki — sutki.
Kali mohuć adkryć miažu?
Choć samo zakryćcio polski bok nazyvaje časovym, ministr unutranych spraŭ i administracyi Polščy Marcin Kiarvinski patłumačyŭ: «Pamiežnyja pierachody buduć adkrytyja tolki tady, kali my budziem na 100% upeŭnienyja, što dla Polščy, dla polskich hramadzian heta nie ŭjaŭlaje nijakaj pahrozy».
Ciapier čytajuć
«U vyniku jon skazaŭ mnie: «Chopić mianie šantažavać, ja chaču palubavacca hetymi drevami». Aksana Kołb raskazała, pra što razmaŭlała sa Statkievičam na miažy88
Kamientary