Abmierkavańnie hienpłana Minska vyklikała ažyjataž. Što prapanoŭvali haradžanie i jakija atrymali adkazy?

Znos siadzib u Čyrvonaj Słabadzie

Žychary vulicy Čyrvonaja Słabada, dzie pa płanie praduhledžany znos starych damoŭ, prasili nie zaciahvać praces: budynki sastarełyja i patrabujuć ramontu. U adkaz im rastłumačyli: kali na praciahu troch hadoŭ paśla zaćviardžeńnia płana pracy nie pačnucca, to ŭłaśniki zmohuć rekanstrujavać žyllo, navat z pavieličeńniem ahulnaj płoščy.

U Dražni šmatpaviarchoviki zamiest dač?

Pavodle staroha i novaha hienpłanaŭ na miescy dačnaha tavarystva ŭ Dražni chočuć pabudavać šmatkvaternyja damy. Žychary prapanavali pakinuć terytoryju pad siadzibnuju zabudovu. Hałoŭny architektar «Minskhrada» Alaksandr Akienćjeŭ rastłumačyŭ: zrabić heta niemahčyma. Normy parušanyja, učastki zanadta maleńkija, niama pažarnych prajezdaŭ, a ščylnaja zabudova nie dazvalaje vyrašyć prablemy skaračeńniem nadziełaŭ. Tut patrebna poŭnaja pierabudova, tamu ŭ hienpłanie ŭčastak u budučyni zabudujuć šmatpaviarchovikami. Pry hetym znosić damy prosta ciapier nie buduć.

Małapaviarchovuju zabudovu zachavajuć?

Mnohija minčanie prasili zachavać 2—3-paviarchovyja damy. Uzhadali prahramu rekanstrukcyi małapaviarchovikaŭ, raspracavanuju jašče ŭ 2005 hodzie, jakaja tak i nie zapracavała ŭ poŭnuju siłu. Alaksandr Akienćjeŭ adznačyŭ, što pytańnie zasłuhoŭvaje asobnaj uvahi, i adkazam žycharam mahła b stać abnoŭlenaja schiema rekanstrukcyi z zachavańniem častki damoŭ.

Pramzona kala zavułka S. Kavaleŭskaj

Haradžanie prapanoŭvali źmianić jaje na žyłuju. Čynoŭniki nahadali: pytańnie vynasu pradpryjemstvaŭ z hetaj zony razhladałasia na ŭzroŭni kiraŭnika dziaržavy, ale toj nie padtrymaŭ hetuju ideju. Terytoryja zastaniecca vytvorčaj.

Što budzie ź Sielhaspasiołkam?

Zvaroty pastupili ad žycharoŭ pryvatnaha siektara ŭ Sielhaspasiołku, a taksama na vulicach Bresckaj, Sievastopalskaj, Husoŭskaha i Ł. Biady. Pavodle dziejučych płanaŭ, asnoŭnaja častka siadzib tam zachoŭvajecca, a znos zakranaje ŭ asnoŭnym damy ŭzdoŭž mahistralaŭ. Bo inviestaraŭ na rekanstrukcyju pakul nie znajšłosia, ludzi prasili pierahledzieć płany i zachavać pryvatny siektar. Čynoŭniki paabiacali dadatkova praanalizavać hetyja terytoryi.

Bolš hramadskich abjektaŭ

Niekatoryja minčanie vykazali ideju ŭščylniać zabudovu nie žyllom, a budynkami hramadskaha pryznačeńnia. Staršynia kamiteta architektury i horadabudaŭnictva Minharvykankama Viktar Hućko rastłumačyŭ: situacyja źmianiłasia. Kali raniej pad kramy i servis prajektavali asobnyja budynki, to ciapier hetyja funkcyi čaściej vykonvajuć ubudavanyja pamiaškańni ŭ žyłych damach. Pa handlovych abjektach normy navat pieravykananyja, tamu žyllo zastajecca ŭ pryjarytecie.

A što z parkami i zialonymi zonami?

Žychary Minska prasili ŭładkavać parki, naprykład, na vornych ziemlach pamiž Sucharava i Malinaŭkaj, a taksama zrabić zialony kalidor pamiž Kałodziščami-2 i budučym rajonam Zialony Bor. Čynoŭniki adznačyli: prapanovy šmat u čym źviazany z asabistaj zručnaściu, ale horad pavinien zachoŭvać bałans pamiž ahulnymi i indyvidualnymi intaresami, tamu nie ŭsie inicyjatyvy pryznali abhruntavanymi.

Pašyreńnie miežaŭ horada

Hučali prapanovy ŭklučyć u skład Minska Kopišča, Ścikleva, Hatava, Baraŭlany i Sienicu. Čynoŭniki rastłumačyli: takija rašeńni mahčymyja tolki pry adabreńni kiraŭnika dziaržavy i najaŭnaści ekanamičnych padstaŭ. Pakul u hetym niama nieabchodnaści. Pry hetym razryŭ va ŭzroŭni sacyjalnych standartaŭ pamiž stalicaj i małymi pasieliščami zastajecca, i ŭmovy dla kamfortnaha žyćcia tam treba padciahvać.

• 1
• 0
• 0
• 3
• 1
• 0
• 1
• 0