«Pastavili pierad faktam: albo płacim, albo zastajemsia». Hrupa turystaŭ z-za zakrytaj miažy mieła prablemy ź viartańniem damoŭ
U noč z 11 na 12 vieraśnia Polšča zakryła ŭsie punkty propusku na miažy ź Biełaruśsiu. Turfirmy padładžvajucca pad novyja abstaviny i pierabudoŭvajuć maršruty. Ale adkrytym zastałosia pytańnie: a chto pavinien pakryvać dadatkovyja vydatki na darohu? Ź im u redakcyju vydańnia «Anłajnier» źviarnułasia turystyčnaja hrupa, jakaja znachodzicca ŭ darozie prosta ciapier.
Pa słovach turystaŭ, jany kupili i całkam apłacili 10‑dzionny tur «Jeŭrapiejskija pryhody» ŭ kampanii «Błakitnaja ptuška». Jon pavinien byŭ praciahnucca z 7 pa 17 vieraśnia. Ale prosta padčas pajezdki zakryłasia miaža z Polščaj, praź jakuju prachodziŭ maršrut.
«Na šlachu dadomu nas pierasadzili ŭ aŭtobus inšaha pieravozčyka, kab my mahli dajechać da Minska praz Łatviju. Za heta paprasili dapłacić pa 70 jeŭra z čałavieka. Naturalna, my admovilisia, bo tur całkam apłačany i ŭ damovie nie było paznačana, što my pavinny vyjazdžać mienavita praz Polšču. U vyniku pałova aŭtobusa padpisała dadatkovaje pahadnieńnie ab dapłacie, a druhaja — nie.
Atrymlivajecca, turystaŭ pastavili pierad faktam: albo my płacim jašče raz, albo zastajemsia biez mahčymaści dajechać dadomu. Pry hetym turfirma ad kamientaroŭ uchilajecca. U vyniku biez supravadžalnika nas davieźli da łatvijskaj miažy, dzie akazałasia, što hety aŭtobus pierasiačy jaje nie moža. Kiroŭcy prapanavali pierasieści ŭ inšyja aŭtobusy, dapłaciŭšy jašče pa 50 jeŭra».
Tak i zrabili turysty, jakija chacieli chutka dabracca dadomu. Usim astatnim prapanavali pačakać.
Astatniaja hrupa turystaŭ znachodzicca na łatvijskaj miažy z nočy 17 vieraśnia.
«Dahetul siadzim u aŭtobusie, jaki nie moža prajści miažu. Chtości zapłaciŭ dadatkova 50 jeŭra i pajechaŭ u Minsk, kahości padsadzili ŭ inšy turystyčny aŭtobus. Ciapier źjaviŭsia supravadžalnik ad inšaj hrupy, sprabuje vyrašać pytańni. Nibyta zabraniravali 7 miescaŭ na pakinutych ludziej na rejsavy aŭtobus. Čakajem. Apłačvać ničoha nie treba».
Adkaz turfirmy: «Pra fors-mažornyja abstaviny papiaredzili za 5 dzion»
Žurnalisty źviazalisia i z samoj kampanijaj «Błakitnaja ptuška». Tam raskazali, što z hrupy ŭ 53 čałavieki pieravozčyku častkova kampiensavali vydatki tolki 13. Havorka idzie pra tyja samyja 70 jeŭra za darohu, jak pieršapačatkova mierkavałasia, da Minska.
Čamu turystaŭ stali pierasadžvać na rejsavyja aŭtobusy? U turfirmie tłumačać heta tym, što aŭtobus byŭ arandavanym i ŭ kiroŭcaŭ nie było biełaruskich viz.
«Siońnia pa raskładzie da 22:00 apošnija členy hrupy pavinny viarnucca ŭ Minsk na rejsavym aŭtobusie, mnohija ŭžo vyjechali ŭ bok stalicy. Pa zakonie «Ab turyźmie» Respubliki Biełaruś i pa praviłach akazańnia turystyčnych pasłuh, zaćvierdžanych Savietam Ministraŭ, u vypadku ŭźniknieńnia fors-mažornaj situacyi turystyčnaja kampanija pavinna prykłaści raznastajnyja namahańni pa viartańni turystaŭ u krainu, što my i robim. Ale turysty pavinny apłacić vydatki.
Na žal, na hety momant hetaja ŭmova nie vykonvajecca, vydatki całkam lahli na nas. My pavieźli ich u abjezd 2000 kiłamietraŭ zadarma».
Jak raskazaŭ dyrektar turfirmy, u takuju ž situacyju trapili jašče piać hrup, ale składanaści ŭźnikli tolki z adnoj ź ich. Bo pra zakryćcio miežaŭ było viadoma raniej, za niekalki dzion da viartańnia ŭsich turystaŭ paprasili zapoŭnić ankietu dla pierasiačeńnia łatvijskaj miažy — zrabić heta nieabchodna minimum za 48 hadzin da ŭjezdu.
«Za 5 dzion da viartańnia my papiaredzili turystaŭ, što, mahčyma, miaža nie budzie adkrytaja, kab na ŭsialaki vypadak pakinuli zapas hrošaj. Taksama jany viedali, što źmienicca maršrut: usie zapaŭniali ankiety dla Łatvii. Tamu niečakanaściu dla ich heta nie było.
Akramia taho, my prapanavali padpisać dadatkovaje pahadnieńnie spačatku pra dapłatu za darohu, a potym ź infarmacyjaj pra toje, što jany admaŭlajucca płacić. Nikoha vysadžvać z aŭtobusa ci pakidać na miažy my, viadoma, nie płanavali. Ale turysty nie stali heta rabić».
Jak śćviardžaje dyrektar kampanii, jany nakiravali piać listoŭ u aficyjnyja orhany Litvy z prośbaj ab dazvole pierasiačy miažu na aŭtobusie na polskich numarach, na jakim turysty padarožničali pieršapačatkova. Adnak atrymali admovu. Tamu na praciahu niekalkich sutak prapracoŭvali alternatyŭnyja varyjanty zvarotnaj darohi.
Na hety momant usie vydatki kampanija ŭziała na siabie.
Ci možna vieźci ź ES u Biełaruś bolš za 60 jeŭra najaŭnymi? Adkazali ŭ mytni Litvy
MZS pahražaje «mierami, praduhledžanymi zakonam» polskim furam, jakija zaviśli ŭ Biełarusi
Łahistyčnyja kampanii znajšli alternatyvu zakrytaj miažy pamiž Polščaj i Biełaruśsiu
Biełaruska atrymała polskuju vizu, ale nie pačała pa joj jeździć da zakryćcia miažy. Ci puściać jaje ciapier u ES?
«Dumaŭ, miažu zakryjuć tolki na ŭjezd». Biełarus raskazaŭ, jak viartaŭsia na aŭtamabili ź Jeŭrasajuza
Ciapier čytajuć
«Čakaju tavar užo 13 dzion». Što pišuć klijenty ab prablemach Wildberries6
Kamientary
U hetaj "Błakitnaja ptuška".
Reštki źmien u zakanadaŭstvie pačatku 1990-ch.
Ale astatniaja dakumientacyja, dahavary i h.d., jak zvyčajna, na ruskaj.