Prezident Čechii: Rasijskija samaloty, jakija parušajuć pavietranuju prastoru krain NATA, treba źbivać
Padstavaj dla rezkaha vykazvańnia ciapierašniaha prezidenta Čechii, a raniej vysokapastaŭlenaha vajskoŭca Pietra Pavieła staŭ učarašni zalot rasijskich samalotaŭ MiH-31K u pavietranuju prastoru Estonii.
«Ja pavinien nazvać heta vielmi biezadkaznymi pavodzinami, bo parušeńnie pavietranaj prastory — heta padstava dla aktyvacyi achoŭnych miechanizmaŭ i, takim čynam, źbićcia takoha samalota. A hetaha nichto ni z našaha boku, ni z rasijskaha nie chacieŭ by», — zajaviŭ Pietr Pavieł u efiry češskaha telebačańnia.
«Na žal, heta pytańnie bałansavańnia na miažy kanfliktu, ale prosta nielha adstupać pierad abliččam zła. Rasija budzie pavodzić siabie tak, jak my joj dazvalajem», — zajaviŭ Pavieł, jaki raniej byŭ kiraŭnikom vajskovaha kamiteta NATA.
Pa słovach palityka, pry takoha rodu «adekvatnym» adkazie Maskva budzie ŭśviedamlać, što pierasiahnuła miažu dapuščalnaha i ździejśniła pamyłku.
Jon nahadaŭ, što Turcyja, jakaja taksama ŭvachodzić u skład NATA, u 2015 hodzie źbiła rasijski samalot Su-24 paśla parušeńnia jaje pavietranaj prastory padčas vajny ŭ Siryi. Tady Kreml nazvaŭ incydent «udaram u śpinu ad pamahatych terarystaŭ» i ŭvioŭ sankcyi suprać Turcyi, adnak paśla vymušany byŭ ich źniać. Zalatać ža na terytoryju Turcyi rasijanie paśla taho aścierahalisia.
Raniej z padobnaj zajavaj vystupiła ministarka abarony Litvy Davile Šakalenie, taksama spasłaŭšysia na prykład Turcyi ŭ 2015 hodzie.
Ciapier čytajuć
«Dla biełaruskich uładaŭ ja, chutčej, mahčymaść, a nie pahroza». Kaleśnikava dała vialikaje intervju Zołatavaj66
Kamientary