Kolki treba adkładać u miesiac, kab kupić kvateru pa novaj sistemie budaŭničych źbieražeńniaŭ
Na hetym tydni Biełarusbank zapuściŭ novuju dziaržaŭnuju prahramu budaŭničych źbieražeńniaŭ zamiest papiaredniaj.
Ekśpiert pa žyłoj nieruchomaści Natalla Litoŭskaja ŭ svaim telehram-kanale pryviała padliki, kolki treba budzie adkładać štomiesiac, kab kupić žyllo pa novaj prahramie.
Jak nahadvaje Office Life, u čym sutnaść źmianieńniaŭ u nastupnym. Pa raniejšaj sistemie budźbieražeńniaŭ pakupnik moh zakinuć čverć ad koštu kvatery na rachunak u Biełarusbanku na 19 miesiacaŭ i zatym uziać kredyt na astatnija 75%. Papaŭniać hety rachunak było nielha, tamu bolš papularnym varyjantam było nazapasić patrebnuju sumu za 36 miesiacaŭ i zatym užo skarystacca kredytam.
A što ciapier? U novaj prahramie dziejničajuć try nakaplalnyja płany: na 26, 38 i 62 miesiacy. Da ich dadali «premiju» ad dziaržavy ŭ pamiery 10% ad staŭki refinansavańnia. Praduhledžany roznyja praporcyi suadnosin ułasnych srodkaŭ da kredytnych: 30/70, 40/60, 50/50. Kredyt vydajecca pad staŭku refinansavańnia plus 1%. Pahasić kredyt treba za 7, 10 i 15 hadoŭ adpaviedna.
U novaj sistemie dziejničaje i terytaryjalny pryncyp. Naprykład, u Minsku i Minskim rajonie źbirać na kvateru možna tolki pa pryncypie 50/50.
Na dumku Natalli Litoŭskaj, novyja ŭmovy dla minčan i žycharoŭ Minskaha rajona «žorstkija».
— Kali na paŭkvatery nakapili za 24 miesiacy, jašče praz 2 miesiacy vydaduć kredyt na 7 hadoŭ. Kali za 36 miesiacaŭ, pa zakančeńni 38 miesiacaŭ vydaduć kredyt na 10 hadoŭ. Kali za 60 miesiacaŭ, kredyt praz 62 miesiacy daduć na 15 hadoŭ, — robić raskład na ličbach ekśpiert i tut ža adznačaje: — Tak, hrošy źbirajucca pad pracent, ale heta staŭka refinansavańnia minus 2 p. p. i plus premija ad dziaržavy ŭ vyhladzie 10% ad SR. Zaraz heta ŭ vyniku 8,725%. Hrošy nibyta abaronieny ad inflacyi. Ale žyllo my ličym u dalarach, a devalvacyi mienš pradkazalnyja. Jak i ich pamier.
Ekśpiert miarkuje, što ŭ hetych abstavinach samym papularnym budzie varyjant źbirać na kvateru na praciahu 36 miesiacaŭ.
Naprykład, treba nakapić $50 tys. Dapuścim, što da kanca 2028-ha — pačatku 2029‑ha heta budzie 200 tys. rubloŭ. Značyć, kožny miesiac u skarbonku pa novaj sistemie treba budzie adkładać kala 4900 rubloŭ.
U rehijonach umovy bolš łajalnyja, ale i dachody tam nižejšyja.
Ciapier čytajuć
Pieršaja viasna na voli. Nina i Uładzimir Łabkovičy raskazali pra svaju historyju kachańnia i žyćcio paśla turmy5
Kamientary