«Samaja niaŭdałaja viza dla imihracyi». Ci chvalujucca ajcišniki z-za novaha ŭkaza Trampa?
Tramp ustanaviŭ zbor $100 tysiač za rabočyja vizy ZŠA dla zamiežnikaŭ. Ci panikujuć biełarusy, jakija źbirajucca pierajazdžać u Štaty, raźbiraŭsia Devby.io.
Donald Tramp padpisaŭ ukaz ab reformie prahramy H-1B, jakaja dazvalaje amierykanskim kampanijam najmać vysokakvalifikavanych zamiežnych śpiecyjalistaŭ. Jon budzie prymianiacca tolki da novych zajavak, ale kampanijam daviadziecca płacić za kožnaha zajaŭnika pa 100 tysiač dalaraŭ u hod na praciahu šaści hadoŭ. Da hetaha času sukupnyja zbory za H-1B nie pieravyšali $1500.
Pavodle viersii Biełaha doma, reforma H-1B nakiravana suprać «złoŭžyvańniaŭ» i abaraniaje amierykanskich rabotnikaŭ ad vyciaśnieńnia z rynku. Ekśpierty krytykujuć reformu, zajaŭlajučy, što hety ŭkaz naškodzić technałahičnym kampanijam i kankurentazdolnaści ZŠA.
U toj ža čas nie ŭsia IT-supolnaść dramatyzuje zabaronny taryf. U dyskusijach na nizavym uzroŭni časta hučyć mierkavańnie, što H-1B nie vielmi karysnaja dla imihracyi ŭ ZŠA, tamu jaje abmiežavańnie nie katastrofa.
«Vizy talentaŭ — cudoŭnyja alternatyvy»
«Amierykanskija startapy nikoli pa H-1B i nie rełakavali. Startapy najmajuć vydalena ŭ krainach, dzie zarobki nievysokija, i na hetym raźvivajucca. A H-1B u cełym samaja niaŭdałaja viza dla pierajezdu z usich umoŭna pracoŭnych», — tak zapiarečyła rekruter biełaruskaha pachodžańnia na ałarmiscki dopis kalehi-markietołaha pad nazvaj «Rełakacyja ŭ Amieryku skončana».
Maŭlaŭ, dla bolšaści kampanij 100K za vizu — heta zanadta doraha, vizy buduć vydavacca ŭ vyklučnych vypadkach, imihracyjnyja dźviery ŭ Amieryku faktyčna začynilisia. Dyk kudy pajeduć tyja, chto nie trapiŭ u ZŠA?
Pad dopisam — vialikaja dyskusija. U tezisa pra toje, što H-B1 nie šlach dla imihracyi, šmat łajkaŭ + padtrymlivajučyja kamientary. Udzielniki supolnaści zhadžajucca, što «H-1B — heta faktyčna sučasnaje rabstva» i što dla imihracyi lepš padychodzić O-1, jana ž «viza talentaŭ», ci «viza Ejnštejna». Choć naohuł-ta i jana nie adnosicca da liku imihracyjnych, adnak daje bolšuju hnutkaść u adnosinach z pracadaŭcami.
- «O 1‑B i EB-1 — vizy talentaŭ, cudoŭnyja alternatyvy. U tym liku možna adkryć svajo LLC. Žyć i pracavać», — paŭtaraje tezis pra «sučasnaje rabstva» inšy kamientatar.
- «Pierapościli navinu z demakratyčnych ŚMI. A toje, što ŭ hetaj vizy hadavaja kvota 65000, jakuju na 95% vybirali Indyja, Kitaj i inšaja Paŭdniova-Uschodniaja Azija, zabylisia paznačyć, — łajecca treci ŭdzielnik supolnaści. — Pryčym vybirali bodyšopy, jakija potym prosta pierapradajuć ludziej, tak što tam taksama łatareja: prachodzili 400 tysiač zajavak na 65 tysiač viz. I hetaja viza hadoŭ 10 jak pierastała pracavać dla zvyčajnych raspracoŭščykaŭ, a zvyčajnyja kampanii i startapy pierastali jaje afarmlać — kamu treba čakać supracoŭnika hod, dy jašče i ŭ łatarei ŭdzielničać?».
«Chočacie pierajechać pa vizie talentaŭ? Pažadana paskorycca»
Žurnalisty spytali dvuch ajcišnikaŭ-biełarusaŭ, jakija prama zaraz rychtujucca da pierajezdu ŭ Štaty, što jany dumajuć pra hety ŭkaz Trampa i ci nie mianiaje jon ich płany. Akazałasia, što ŭkaz ničoha nie mianiaje, adnak ahulny antymihracyjny trend vyklikaje niepakoj i zahadvaje paskorycca.
— Padtrymlivaju, — raptam ustaŭ na bok Trampa daśviedčany inžynier rodam ź Biełarusi, jaki pracuje nad atrymańniem vizy talentaŭ EB-1. — Biahučaje rašeńnie — vynik złoŭžyvańniaŭ nieimihracyjnymi vizami, da liku jakich adnosicca H-B1. Ich atrymlivajuć, kab zastacca ŭ ZŠA, niahledziačy na toje, što termin pracy pa hetych vizach nie idzie ŭ zalik imihracyjnych pracesaŭ. Jość imihracyjnyja vizy, ich nichto nie admianiaŭ.
Jašče adzin biełarus, jaki zaraz robić druhuju sprobu atrymać imihracyjnuju vizu i źjechać u ZŠA (pieršaja nie ŭdałasia), ličyć, što ŭkaz Trampa byŭ całkam čakany i što jon dadaje tryvohi. Zrešty, pracoŭnaja viza ŭsio roŭna nie było dla jaho varyjantam.
— Čamu ja nie razhladaju pracoŭnuju vizu? Bo maja śpiecyjalizacyja (ja nie raspracoŭščyk) nie zapatrabavana na amierykanskim rynku nastolki, kab za maju rełakacyju płaciła niejkaja kampanija. Hety šlach bolš padychodzić dla raspracoŭščykaŭ abo mocnych mieniedžaraŭ. A voś pad vizu talentaŭ EB-1 maje navyki i vopyt padychodziać, tak jak ja sumiaščaju niekalki rolaŭ, ułasna techničnyja i adukacyjnuju.
Płany na pierajezd u Amieryku apošnija naviny nie ŭpłyvajuć, ale prymušajuć paskorycca. Tamu što — chto viedaje — u nastupny raz mohuć pastrožyć praviły dla atrymańnia vizy talentaŭ. Pamiatajecie, viasnoj chadzili čutki, što hramadzianam Biełarusi mohuć zabaranić ujezd pa imihracyjnych i turystyčnych vizach? Jany nie paćvierdzilisia, ale, pakul Tramp va ŭładzie, usiakaje moža adbycca.
Miarkujučy pa čatach, vizu talentaŭ zaraz atrymać značna składaniej, čym raniej.
Voś i ŭ mianie była adna admova, i my z advakatam navat nie zrazumieli čamu: padstaŭ było dastatkova, i ŭsie dokazy jak byccam byli ŭ paradku. Prosta viza talentaŭ — heta zaŭsiody supiersubjektyŭnaja historyja: tvoj los, pa sutnaści, vyrašaje aficer, jaki čytaje tvoj kiejs.
Znachodziačysia ŭ ZŠA, upłyvać na hety praces jak byccam krychu lahčej, tamu mnohija jeduć u ZŠA pa turystyčnaj vizie abo pa nieimihracyjnaj «vizie talentaŭ» O-1, jakaja patrabuje pracadaŭcy, i tam užo mianiajuć svoj status.
Zrazumieła, što dalej budzie tolki horš, tamu tym, chto ŭpeŭnieny ŭ svaim namiery pierajechać i atrymać imihracyjny status, treba rabić heta ŭžo zaraz.
Kamientary
Roźnica ŭ kulturach: dla našaha jeŭrapiejskaha čałavieka davier - heta asnova znosin. Padmanuŭ - ty złodziej. U indusaŭ, jak i bolšaści azijackich kultur, - padmanuŭ, značyć, małajčyna. Znajšoŭ jak. Daloka pojdzieš.