Syny «litoŭskaha špijona» adpravili Łukašenku list. Tym časam uspłyli novyja detali jaho spravy
Siarhiej Botvič, narodžany ŭ Biełarusi hramadzianin Litvy, Francyi i Rasii, vosieńniu 2022‑ha atrymaŭ 13 hadoŭ za «špijanaž». U adroźnieńnie ad mnohich inšych «špijonskich» historyj, Minsk ničoha nie paviedamiŭ pra jaje publična: za što zatrymali, za čym špiehavaŭ. Paśla pieršaj publikacyi «Našaj Nivy» pra jaho na nas vyjšaŭ znajomy Botviča ź niekatorymi padrabiaznaściami toj historyi.
61‑hadovy Siarhiej Botvič adbyvaje svoj 13‑hadovy termin u papraŭčaj kałonii №22 pad Ivacevičami.
Jana była zbudavanaja ŭ takoj hłušy, što źniavolenyja prazvali jaje Vaŭčynyja Nory. Paśla pačatku masavych palityčnych represij u Biełarusi Vaŭčynyja Nory stali miescam, dzie ŭtrymlivalisia i sotni palityčnych źniavolenych. Trymajuć tam i zamiežnych hramadzian, jakich asudzili za «špijanaž» i pa inšych padobnych artykułach.
Siarhieja Botviča zatrymali letam 2021 hoda. I asudzili ŭ kancy 2022 hoda. Tolki praź dziesiać miesiacaŭ paśla suda infarmacyja pra jaho trapiła ŭ ŚMI — praces byŭ zakryty, jak i ŭsie padobnyja spravy ŭ Biełarusi ciapier.
Tolki ciapier, praz čatyry hady paśla zatrymańnia pieršaja infarmacyja pra detali spravy stała viadomaja žurnalistam — kali čałaviek, jaki vyzvaliŭsia z PK-22, pieradaŭ «Našaj Nivie» list, napisany Siarhiejem Botvičam.
Paśla toj publikacyi na nas vyjšaŭ inšy znajomy Botviča, jaki raskazaŭ, što jašče viedaje pra dziejnaść hetaha pradprymalnika ŭ Biełarusi pierad zatrymańniem i niajasnuju rolu vysokapastaŭlenaha siłavika S. u hetaj spravie.
Čytajcie padrabiaznaści: «Ludzi, budźcie pilnyja! U takoj situacyi moža apynucca kožny žychar ES!» Hramadzianin Litvy, asudžany ŭ Biełarusi da 13 hadoŭ za «špijanaž», pieradaŭ list z kałonii
Siarhiej Botvič naradziŭsia ŭ vioscy Novy Dvor u Śvisłackim rajonie Hrodzienskaj vobłaści. Jon skončyŭ Minski instytut zamiežnych movaŭ — ciapier heta Biełaruski dziaržaŭny ŭniviersitet zamiežnych moŭ.
Imavierna, pa miescy svajho pražyvańnia pa stanie na 1991 hod jon staŭ hramadzianinam Rasii, a potym taksama atrymaŭ hramadzianstva Francyi i Litvy. Śfieraj jaho kamiercyjnych intaresaŭ byŭ u asnoŭnym aptovy handal vuhalem.
U 2010‑ch Botvič zacikaviŭsia vytvorčym biznesam na radzimie i staŭ udzielničać u budaŭnictvie nievialikaha zavoda pa pierapracoŭcy niedziełavoj draŭniny ŭ Śvisłackim rajonie. Budaŭnictva zavodzika pačałosia ŭ 2014-m, ale išło sa skrypam. Sam Botvič u hety čas žyŭ u Litvie i byvaŭ u Biełarusi najezdami.
Zavodzik tak i nie zapuściŭsia, a na Botviča ŭ červieni 2018‑ha zaviali kryminalnuju spravu.
Zhodna sa źviestkami z bazaŭ «Kibierpartyzanaŭ», fabuła kryminalnaj spravy suprać mužčyny hučyć tak:
«Botvič Siarhiej… naŭmysna, z karyślivych namieraŭ, nie źbirajučysia vykonvać uziatyja na siabie abaviazacielstvy, šlacham padmanu i złoŭžyvańnia davieram, na padstavie ŭdziełu ŭ inviestycyjnym prajekcie pa budaŭnictvie zavoda pa vytvorčaści vuhalu, zavałodaŭ hrašovymi srodkami TAA «Erabl hrup» (zasnavanaja ŭ kancy 2014‑ha, ciapier u likvidacyi — NN) u sumie 734 tysiač jeŭra».
Vytvorčaść pa hetaj spravie była spynienaja zhodna p. 5 č. 1 st. 246 UPK — chutčej za ŭsio, praz znachodžańnie mužčyny za miažoj. Ale nie tamu, što Botvič uciok. Heta chutčej prosta jurydyčnaja nahoda. U tym 2018-m, pavodle danych bazy «Pasažyrapatok», Botvič 19 razoŭ byvaŭ u Biełarusi, adzin raz u 2019-m, try razy ŭ 2020‑m i adzin — vidać, apošni, — u 2021.
U čym była sutnaść abvinavačvańniaŭ, vystaŭlenych u 2021-m? Dahetul nie było jasnaści. U adzinym pieradadzienym na volu praz «Našu Nivu» liście Botvič śćviardžaje, što staŭ achviaraj pravakacyi.
«Ja byŭ vykradzieny supracoŭnikami KDB Biełarusi i ŭziaty pad vartu 21 červienia 2021 (budučy etničnym biełarusam, ja pryjechaŭ praviedać siastru i naviedać mahiły baćkoŭ i svajakoŭ). Paŭtara hoda trymali ŭ adzinočnaj kamiery. Padviarhali 10‑hadzinnym dopytam (skryžavanym), pakidajučy bieź ježy i pićcia na hety čas pry [maich] chraničnych zachvorvańniach: cukroŭka, posttrambozny sindrom, hipiertanija i padahra», — raskazvaje Botvič u pačatku lista.
Mnie prapanoŭvali, piša jon, «ažyćciavić samaahavor pra nibyta špijonskuju dziejnaść na karyść Litvy i abhavor orhanaŭ dziaržbiaśpieki Litoŭskaj Respubliki. Patrabavali paćvierdzić toj fakt, što nibyta ja źjaŭlajusia supracoŭnikam Departamienta dziaržbieśpieki Litoŭskaj Respubliki. Pa ŭsich dakumientach ja prachodziŭ jak zamiežny raźviedčyk.
Znajomy Botviča raskazaŭ «Našaj Nivie», što historyja, jakaja skončyłasia spravaj ab špijanažy, nakolki jon viedaje, pačałasia za hod da zatrymańnia Botviča, u 2020‑m.
Nibyta ad Botviča šantažom i pad pahrozami kanfiskacyi zavoda, jaki toj buduje, patrabavali hrošy ad imia adnaho z vysokapastaŭlenych biełaruskich siłavikoŭ. Nazaviem jaho S., bo my pakul nie majem mahčymaści paćvierdzić ci abvierhnuć hetuju historyju ź inšych krynic.
I Botvič ich płaciŭ — pieradajučy ich hancu, jaki pryjazdžaŭ u Litvu. (Znajomy Botviča nie viedaje, ci sapraŭdy heta byli ludzi, źviazanyja z S., ci heta byli žuliki, jakija vykarystoŭvali imia S. dla razvodu i šantažu, ci heta byŭ elemient kontrraźviedvalnaj apieracyi abo pravakacyja.)
Pakolki S. byŭ vysokapastaŭlenym aficeram adnaho ź siłavych viedamstvaŭ, Botvič nie znajšoŭ lepšaha varyjanta, čym paskardzicca ŭ KDB. A tyja, pa słovach krynicy «Našaj Nivy», prapanavali Botviču paŭdzielničać u apieratyŭnaj hulni: abviešacca kamierami i dać chabar u Biełarusi, kab jany mahli razabracca z šantažystami. Botvič pahadziŭsia.
Asoby, jakija vydavali siabie za pasylnych ad S., byli zatrymanyja pry atrymańni chabaru ŭ Biełarusi. U padraździaleńni S. byli praviedzienyja vobšuki i aryšty, sam S. źloh u balnicu ź infarktam.
Botvič daŭ pakazańni i viarnuŭsia ŭ Litvu.
S. dakazaŭ svaju nievinavataść i atrymaŭ pavyšeńnie.
Samoha Botviča ŭ 2021 hodzie zaprasiŭ u Biełaruś adzin z čekistaŭ, jakija viali staruju apieracyju, kab, nibyta, Botvič dapoŭniŭ svaje minułahodnija pakazańni.
«Ci nie budzie S. mnie pomścić? Ja razumieju, što takoje čałaviek pry jaho pasadzie ŭ Biełarusi», — pytaŭsia Botvič.
«Z vami ničoha nie zdarycca, pad našy harantyi», — u takim duchu adkazali jamu z KDB.
Botvič, jak bačna z bazy «Pasažyrapatok», pryjechaŭ ź Litvy ŭ Biełaruś na hetuju sustreču na aŭtamabili «Mazeraci». Ale pa prybyćci byŭ zatrymany i źmieščany ŭ SIZA pa artykule «špijanaž».
Dalejšaje raźvićcio padziej u interpretacyi Botviča my viedajem ź jaho pieršaha lista.
«Nibyta ad majho imia praz Telehram sprabavali raźvieści maju žonku Volhu i paćvierdzić fakt majoj pracy ŭ LR VSD. U pryvatnaści, prasili (ad majho imia) pierasłać u Biełaruś moj słužbovy telefon, a taksama paćvierdzić fakt znajomstva ź niejkim Tomasam. Na ščaście, maja žonka ŭsio abvierhła. Adnak biełaruskija śpiecsłužby vykarystali hety incydent, kab pa-svojmu interpretavać hety fakt. U pryvatnaści, jany śćviardžajuć, što ja nastolki zakanśpiravany supracoŭnik, što navat žonka nie ŭ kursie majoj prynaležnaści da LR VSD, — pisaŭ jon. — 27 krasavika 2022 hoda na pamiežnym pierachodzie «Pryvałka» zatrymali hramadzianina Litvy Valancina Kazłoŭskaha i jon ahavaryŭ mianie, śćviardžajučy, što ja źjaŭlajusia supracoŭnikam litoŭskaj śpiecsłužby. Taksama Kazłoŭski byŭ papiaredžany, što nie pavinien raskazvać pra hety fakt u Litvie».
Ciapier Botvič biez suviazi sa svajakami — jany pražyvajuć za miažoj, a jon adbyvaje svoj hihancki termin u Voŭčych Norach.
Dva byłyja viaźni, jakija siadzieli ŭ PK-22, raskazali «Našaj Nivie», što Botviča abviaścili «złosnym parušalnikam režymu», jamu abmiežavanaja mahčymaść zakupak u kramie.
Botvič — dyjabietyk. Byłyja viaźni raskazali, što jon pracuje na ŭčastku nizkakvalifikavanaj pracy, pad adkrytym niebam, i ŭ luboje nadvorje piłuje doški dvuručnaj piłoj ci čyścić pravady i kabieli na kalarovy mietał. Budyniny, u jakim možna schavacca ci choć časova pahrecca zimoj, na toj pramzonie niama — pamiaškańnie, u jakim viaźni pierapranajucca, zamykajecca na zamok da viečara.
Ludzi, jakija siadzieli ŭ adnoj kałonii z Botvičam, kažuć pra kiepski stan jaho zdaroŭja.
«Naša Niva» źviazałasia sa svajakami Botviča. Jany admaŭlajucca razmaŭlać z žurnalistam i kamientavać abstaviny jahonaj kryminalnaj spravy. Ale ad znajomaha siamji nam stała viadoma, što syny Botviča niadaŭna źviarnulisia ŭ Administracyju prezidenta Litvy i ŭ administracyju Łukašenki, dzie ich listy pryniali i zarehistravali.
Troje synoŭ Botviča źviartajucca da Łukašenki, apielujučy da jahonych baćkoŭskich pačućciaŭ, spadziajucca, što jon zrazumieje kłopat dziaciej ab losie ichnaha baćki.
Voś tekst hetaha zvarotu, jon padpisany Danielusam Botvičam, Uiljamam Słužmanam i Dźmitryjem Botvičam.
«Pavažany spadaru prezident,
My, syny Siarhieja Ivanaviča Botviča, źviartajemsia da Vas z hłybokaj čałaviečaj prośbaj pierahledzieć abstaviny spravy i ŭmovy jaho ŭtrymańnia.
Naš baćka znachodzicca ŭ papraŭčaj kałonii №22 u Bresckaj vobłaści. My jak jahonyja syny adčuvajem rospač i biezdapamožnaść, pakolki nam praktyčna niemahčyma źviazacca ź im, a infarmacyja ab jaho stanie mocna abmiežavanaja.
My nie zajmajem palityčnaj pazicyi — naša prośba vyklučna humanitarnaja. My zakłapočanyja jaho zdaroŭjem, maralnym i fizičnym stanam, umovami ŭtrymańnia.
Uličvajučy jahony ŭzrost, siamiejnyja abstaviny, a taksama toje, što adzin ź jahonych synoŭ źjaŭlajecca niepaŭnaletnim, prosim vas jak kiraŭnika dziaržavy i baćku prajavić spahadu i razhledzieć mahčymaść:
— pierahladu spravy ŭ bolš adkrytym i spraviadlivym paradku,
— abo chacia b źmiakčeńnia ŭmoŭ utrymańnia, pieravodu ŭ inšuju ŭstanovu,
— abo pamiłavańnia pavodle humanitarnych mierkavańniaŭ.
My vierym u moc čałaviečnaści dy spraviadlivaści i spadziajomsia, što vy źvierniecie ŭvahu na hetuju prośbu, zasnavanuju na lubovi da baćki i žadańni dapamahčy jamu vyžyć.
Z pavahaj i nadziejaj».
* * *
U ciažki dla Biełarusi čas «Naša Niva» zastajecca hołasam usich biełarusaŭ, niezaležna ad taho, chto jany i dzie žyvuć, i pieradusim hołasam tych, chto nie moža havaryć unutry krainy.
Naša praca niemahčymaja biez vašaj padtrymki. Ci vy biełarusy, ci vy litoŭcy: kali vy pračytali hety artykuł i vam važna toje, što my robim, padtrymajcie nas praz Patreon, praz Pejpoł, abo pieradaŭšy danat Redakcyi lubym inšym zručnym dla vas sposabam, praz tych redaktaraŭ i žurnalistaŭ «Našaj Nivy», jakich vy viedajecie asabista.
A jašče — padkazvajcie nam, na što źviarnuć uvahu, i pieradavajcie infarmacyju znutry Biełarusi praz sakretny čat u telehramie @nn_editor abo na mejł [email protected]. Abo ŭ Sihnał ci inšym sposabam tym z redaktaraŭ i žurnalistaŭ «NN», jakich viedajecie asabista.
«Naša Niva» — bastyjon biełaruščyny
PADTRYMAĆ
Kamientary
Dažie syny skorieje sohłasny s tiem, sudia po piśmu, čto eto tak i było.