Naŭrocki znoŭ unios u polski Siejm zakon, jaki istotna pavialičvaje terminy atrymańnia hramadzianstva — heta treciaja sproba

Prezident Polščy Karol Naŭrocki znoŭ unios u Siejm zakonaprajekt, jaki radykalna pavialičvaje terminy atrymańnia polskaha hramadzianstva.

Dakumient dasłoŭna paŭtaraje prajekty, jakija ŭžo dvojčy ŭnosilisia ŭ parłamient. Spačatku ŭ mai heta zrabili deputaty ad apazicyjnaj partyi «Zakon i Spraviadlivaść». A potym, užo ŭ žniŭni, hety ž tekst Naŭrocki ŭklučyŭ u svoj pakiet zakonaŭ ab dapamozie ŭkraincam i inšym zamiežnikam.

Abiedźvie idei zahłuchli. Prajekt «PiS» atrymaŭ niehatyŭnyja vodhuki ad ekśpiertaŭ, a ŭrad rekamiendavaŭ jaho nie razhladać. Pakiet zakonaŭ Naŭrockaha Siejm taksama nie pryniaŭ. Zamiest hetaha kirujučaja kaalicyja pryniała svoj zakon ab dapamozie ŭkraincam, dzie papraŭki da zakona ab hramadzianstvie nie było. Na dniach zakon byŭ padpisany prezidentam.

Zakonaprajekt Naŭrockaha praduhledžvaje pavieličeńnie nieabchodnaha terminu pražyvańnia ŭ Polščy dla atrymańnia hramadzianstva z 3 hadoŭ na pastajannym dazvole na žycharstva da 10 hadoŭ. Heta značyć, što zvyčajny šlach da hramadzianstva biez usialakich lhot, źviazanych z polskimi karaniami abo šlubam z palakam, budzie składać 15 hadoŭ. Adnak u zakonie zastajecca punkt ab mahčymaści padać na hramadzianstva paśla 10 hadoŭ bieśpierapynnaha pražyvańnia ŭ krainie, što ŭstupaje ŭ supiarečnaść z prezidenckaj papraŭkaj.

«Naša Niva» raskazvała pra prablemy zakonaprajekta. Sama prapanova padoŭžyć termin znachodžańnia pa pastajannym vidzie na žycharstva z 3 hadoŭ da 10 zychodziła ź niapravilnaha pasyłu, što ciapier 3 hadoŭ dla hramadzianstva dastatkova.

Na samaj spravie, pa ahulnym pravile da pastajannaha vidu na žycharstva zamiežniku treba pražyć u Polščy 5 hadoŭ pa časovym. To bok zvyčajny šlach da hramadzianstva bieź ilhot pa polskim pachodžańni, statusu biežanca abo šlubu z polskim hramadzianinam, składaje minimum 8 hadoŭ, a nie 3 hady, jak śćviardžali deputaty ad «PiS», i ciapier kaža Karal Naŭrocki. Atrymlivajecca, kali zakonaprajekt prymuć, standartny šlach da polskaha hramadzianstva moža skłaści 15 hadoŭ zamiest 8, jak ciapier.

Tym nie mienš polski prezident vyrašyŭ znoŭ unieści toj ža zakonaprajekt bieź źmienaŭ. Naŭrocki matyvuje svaju prapanovu tym, što ŭ Polščy nibyta amal samyja karotkija terminy dla atrymańnia hramadzianstva siarod usich jeŭrapiejskich krain. Akramia taho, jon adznačaje, što polski pašpart — heta pryvilej, i jon naležyć tolki tym zamiežnikam, jakija maksimalna intehravalisia ŭ polskaje hramadstva, vyvučyli movu i napitalisia polskaj kulturaj.

Pra pierśpiektyvy inicyjatyvy prezidenta kazać ciažka. Parłamienckaja bolšaść užo dvojčy tarmaziła razhlad hetaha prajekta. Akramia taho, kirujučaja kaalicyja niadaŭna abviaściła, što pracuje nad svaim zakonam ab hramadzianstvie. Jon budzie mierkavać uviadzieńnie abaviazkovaha testu na viedańnie prava, historyi i kultury Polščy, a taksama viedańnie movy na ŭzroŭni B2 — ciapier dla hramadzianstva dastatkova B1. Pry hetym pakul niezrazumieła, ci miarkuje hety prajekt pavieličeńnie terminaŭ pražyvańnia. Kirujučaja kaalicyja źbirajecca vynieści svoj dakumient na šyrokaje palityčnaje abmierkavańnie, kali jon budzie hatovy.

• 3
• 0
• 0
• 4
• 0
• 0
• 4
• 0