Dziarždep i raźviedka ZŠA prapanujuć Trampu siłaj pamianiać uładu ŭ Vieniesuele

Marka Rubia ličyć Madura nielehitymnym kiraŭnikom Vieniesueły, padazravanym u narkatrafiku, a taksama kiraŭnikom złačynnaj terarystyčnaj hrupoŭki, što pahražaje ZŠA. Jon abapirajecca na raźvieddannyja CRU i abvinavačvańnie Ministerstva justycyi ZŠA ŭ spravie ab narkatrafiku 2020 hoda. Idei Rubia taksama padtrymlivajuć dyrektar CRU Džon Retklif i daradca pa ŭnutranaj palitycy Styvien Miler.

Dla samoha Rubia, syna kubinskich emihrantaŭ, źmiena režymu ŭ Vieniesuele maje asabistaje značeńnie — heta asłabić sajuźnikaŭ Kuby i pryciahnie da Respublikanskaj partyi hałasy kubinskich i vieniesuelskich emihrantaŭ u Fłarydzie.

Aficyjna Bieły dom hetuju infarmacyju nie kamientuje.

ZŠA ŭžo pavialičyli ŭznaharodu da $50 miljonaŭ za infarmacyju, jakaja dapamoža aryštavać Madura. Dziarždep padkreślivaje, što Madura chavajecca ad amierykanskaha pravasudździa i pahražaje biaśpiecy rehijonu.

Pientahon razhladaje vajennyja scenary suprać Vieniesueły, ale kančatkovaha dazvołu na heta pakul niama. U toj ža čas prezident ZŠA Donald Tramp adkryta havoryć pra mahčymuju vajennuju kampaniju ŭ Karybskim rehijonie i zajaviŭ, što ZŠA ŭžo dziejničajuć suprać vieniesuelskich «terarystaŭ i narkakartelaŭ».

U lipieni Tramp padpisaŭ sakretnaje rasparadžeńnie, jakoje dazvalaje prymianiać siłu suprać narkakartelaŭ. Pientahon pavialičyŭ kolkaść vojskaŭ u rehijonie na 6500 čałaviek i sabraŭ fłot u Karybskim mory. Za apošnija tydni amierykanskija vajskoŭcy nanosili ŭdary pa łodkach, źviazanych z narkatrafikam, pry hetym zahinuli nie mienš za 17 čałaviek.

Adnačasova ZŠA rychtujuć palityčnuju źmienu režymu. U mai Rubia sustreŭsia ź vieniesuelskimi apazicyjanierami, paśla čaho byŭ raspracavany płan dziejańniaŭ na pieršyja 100 hadzin paśla sychodu Madura, u tym liku pieradača ŭłady Edmunda Hansalesu, kandydatu ŭ prezidenty na vybarach 2024 hoda. Raniej Tramp taksama padtrymlivaŭ sproby apazicyi adchilić Madura ad ułady, ale biezvynikova.

Ź mižnarodna-pravavoha punktu hledžańnia, umiašańnie ŭ spravy inšaj krainy biez zhody ŭrada abo Rady Biaśpieki AAN ličycca niezakonnym. Ale administracyja Džo Bajdena raniej pryznała Hansalesa lehitymnym prezidentam. Kali jon paprosić dapamohi, heta moža stać jurydyčnaj padstavaj dla vajennych dziejańniaŭ. Amierykanski čynoŭnik paraŭnaŭ mahčymuju siłavuju źmienu ŭ Vieniesuele z apieracyjaj ZŠA ŭ Panamie ŭ 1989 hodzie suprać dyktatara Manuela Narjehi.

• 12
• 0
• 1
• 0
• 0
• 0
• 0
• 0