Śpiavak, muzyka, kampazitar i pradprymalnik Piatro Klujeŭ da lutaha 2022 hoda byŭ udzielnikam hurtu ŁSP, vakalistam jakoha źjaŭlajecca viciabčuk Aleh Saŭčanka. Z pačatkam poŭnamaštabnaj vajny va Ukrainie jon «admoviŭsia ad viadomaści ŭ Rašcy» i pierabraŭsia ŭ Jeŭrasajuz.
Apošnim jarkim publičnym vystupam Klujeva možna ličyć kaladny kvaternik Marharyty Laŭčuk u 2023 hodzie.
Viasnoj 2024‑ha znajomyja Piatra ŭvohule pačali panikavać: «čałaviek źnik!» A potym vyśvietliłasia, što Klujeŭ zaloh na dno pa pryčynie hrašovych pazyk, jakija nie moh addać. I vystupy ŭ jaho zdaralisia, ale amal padpolna, kab tyja, kamu jon vinny hrošy, nie pryjšli pa ich.
Sam Piatro ŭsio admaŭlaŭ. «U mianie niama dostupu da niekatorych sacsietak, i tamu ja nie moh vyjści na suviaź», — zajaŭlaŭ tvorca. Praŭda, jak daviedałasia «Naša Niva», niekatorym jon dahetul nie viarnuŭ pazyki.
Što jašče adbyvajecca ciapier u žyćci Piatra?

U svaim tyktoku Klujeŭ pryznajecca, što ź pierajezdam u Jeŭropu jamu było nialohka, chaciełasia adyści ad paznavalnaści vyklučna pa ŁSP, tym bolš, što hrupa praciahvaje hastralavać pa Rasii. Piatro, u svaju čarhu, pisaŭ novyja pieśni i ŭ 2024 hodzie vypuściŭ albom Punk's Line svajho prajekta Love Machine.
Pry hetym, jak zaŭvažajuć kamientatary, uvieś svoj błoh jon napaŭniaje kantentam, tak ci inakš zaviazanym na ŁSP: «Jak ja paznajomiŭsia z Aleham ŁSP», «Sakret, jaki viedali tolki ŭdzielniki ŁSP», «Kali ŁSP vystupić u Jeŭropie».
Darečy, na solnym kancercie ŭ Varšavie, jaki zapłanavany na krasavik 2026 hoda, Piatro płanuje hrać u tym liku chity, stvoranyja dla ŁSP — naprykład, «Maleńkaha prynca», dla jakoha Klujeŭ napisaŭ muzyku.
Klujeŭ časam vystupaje z papularnym repieram z Ukrainy T-fest. U volny ž čas lubić padychodzić da vuličnych muzykaŭ u Varšavie ŭ vobrazie rabočaha z prapanovaj syhrać paru akordaŭ — i kali pačynaje śpiavać svaje i čužyja pieśni, ździŭlaje ŭzroŭniem vykanańnia tych, chto jaho nie viedaje.
Akramia taho, apošnija piać miesiacaŭ Piatro pracavaŭ nad sajtam ArtGo — jon dazvalaje aŭtamatyzavać pracu pamiž zamoŭcam i artystami.
Tak, za 6 tysiač jeŭra vy možacie zaprasić da siabie na dzień narodzinaŭ śpiavačku Leru Jaskievič, adrazu abraŭšy patrebnuju datu ŭ kalendary. Za 500 jeŭra — komika Antona Dziubajłu, a za dźvie tysiačy jeŭra (za hadzinu) — samoha Piatra Klujeva. Ścipłym jaho nazvać ciažka: sam siabie jon apisvaje jak «najlepšaha pop-muzyku ŭsich časoŭ» i «lehiendu».
Prasoŭvaje sajt Klujeŭ na polskaj movie — vialikuju častku malenstva jon pražyŭ u Polščy, bo tam vučyłasia jaho maci. Tamu jon dobra vałodaje movaj i navat vykładaŭ jaje niejki čas u padpolnym Licei imia Jakuba Kołasa ŭ Minsku.

Paet Vital Ryžkoŭ pra zvańnie seks-simvała paezii, batł z Najdzionavym, Karža i Cichanoŭskuju
Top artystaŭ novaj chvali, jakija robiać pieśni pa-biełarusku
Illa Čarapko-Samachvałaŭ, jaki pakidaje «Piatlu prychilnaści», usio ž prymie ŭdzieł u vosieńskim tury
Jon byŭ pieršym biełarusam na «Jeŭrabačańni» i zorkaj, jakuju viedała ŭsia kraina — Michaił Finbierh
Kamientary