U niaroŭnym bai syšlisia dźvie arhanizacyi, jakija zajmajucca adnym i tym ža. Tolki voś adzin z pałkoŭ aktyŭna padtrymlivaje dziaržava.
U Rasii «Bieśśmiarotny połk» padaŭ u sud na «Bieśśmiarotny połk». Usio z-za brenda i tavarnaha znaka.
Pazoŭ padaŭ «Bieśśmiarotny połk Rasii». Heta, možna skazać, fłahmanskaja arhanizacyja, jakaja i zajmajecca maršami z partretami ŭdzielnikaŭ vajny. Hety «Bieśśmiarotny połk» karystajecca poŭnaj padtrymkaj dziaržavy i kuryrujecca z Administracyi prezidenta Rasii. Hadavy biudžet hałaŭnoj arhanizacyi składaje až 1,2 miljona dalaraŭ. Uznačalvaje arhanizacyju Natalla Šadryna, jakaja była davieranaj asobaj Uładzimira Pucina na apošnich vybarach, piša «JEŽ».
Adkazčykam u sudzie staŭ «Bieśśmiarotny połk — Maskva», źviazany z eks-deputatam i biznesmienam Mikałajem Ziamcovym. Hetaja arhanizacyja kudy biadniejšaja — biudžet da 250 tysiač dalaraŭ u hod — i nie karystajecca takoj padtrymkaj dziaržavy.
Cikava, što «Bieśśmiarotny połk Rasii» pieršapačatkova arandavaŭ u maskoŭskaj arhanizacyi tavarnyja znaki ŭ vyhladzie zorak-značkoŭ, ale potym niejak pierarehistravaŭ ich na siabie. Ciapier jany patrabujuć pazbavić «Bieśśmiarotny połk — Maskva» ŭsich pravoŭ na hetyja tavarnyja znaki pad padstavaj, što arhanizacyja ich nie vykarystoŭvaje.
Cikava, što ŭ rehijonach Rasii jość i inšyja «Bieśśmiarotnyja pałki». Na pieršynstvo pretenduje tomskaja arhanizacyja, stvoranaja miascovymi žurnalistami.
Adzin z aŭtaraŭ idei Siarhiej Łapiankoŭ ličyć, što «ŭmiašańnie ŭładaŭ vyradziła pieršapačatkovy sens akcyi, i jana pieratvaryłasia ŭ całkam štučnuju». U tomskaj arhanizacyi jość pravy na svaje tavarnyja znaki. Za jakimi, całkam mahčyma, nieŭzabavie taksama pryjduć.
«Bieśśmiarotny połk» staŭ adnoj z klučavych prapahandysckich akcyj u Rasii. Ideołahi «ruskaha śvietu» sprabujuć ekspartavać hetuju ideju i ŭ inšyja krainy.
U Biełarusi da apošniaha času jany sustrakali surjoznaje supraciŭleńnie z boku ŭładaŭ, jakija ŭ procivahu prydumali svaju akcyju «Biełaruś pamiataje». Nie tak daŭno Łukašenku navat daviałosia apraŭdvacca pierad Pucinym za zabaronu «Bieśśmiarotnaha pałka».
Kamientary