Žančyna, u jakoj pamierła dačka, praz sacsietki šukaje biełaruski śvitšot, jak byŭ u dziciaci. Vytvorca taksama adhuknuŭsia
Paśla trahičnaj straty 20‑hadovaj dački, jakaja raptoŭna pamierła ad tromba, maci praz sacsietki pačała šukać ružovy śvitšot ad Mark Formelle — lubimuju reč dziaŭčyny. Post vyklikaŭ vialiki rezanans: karystalniki pačali masava dzialicca spačuvańniami, prapanovami i historyjami ŭłasnaj straty. Da pošukaŭ dałučyŭsia i sam brend, jaki ŭžo źniaŭ hetuju reč z vytvorčaści.
Karystalnica Threads ź nikam anna.atai apublikavała ščymlivy dopis, u jakim raskazała pra śmierć svajoj 20‑hadovaj dački.
«21 maja pamierła maja dačka. Joj było 20 hadoŭ, razumnica, pryhažunia, pamierła raptoŭna ad tromba ŭ mozhu. U jaje była lubimaja reč, śvitšot Mark Formelle. Jana nasiła jaho ŭvieś čas. Zaraz hety śvitšot u mianie. Ale pakolki jon byŭ lubimaj rečču, jon raściahnuŭsia, dzie-nidzie dzirački, dzie-nidzie plamy, jakija nie admyvajucca. Ja chaču kupić taki ž».
Žančyna piša, što źviartałasia niepasredna da kampanii Mark Formelle, ale tam paviedamili, što madel bolš nie vypuskajecca.
«Ale ja ŭpeŭniena, što dzieści ŭ śviecie jość taki jašče choć by adzin. Niejkija nieraspradadzienyja reštki, ci chtości kupiŭ i nie nosić, ci zavalaŭsia dzieści na składzie. Uvohule, budu ŭdziačnaja, kali znojdziecca. Ja kuplu», — napisała jana.
Post staŭ virusnym, za dvoje sutak sabraŭ 17 tysiač łajkaŭ i tysiaču kamientaroŭ. Ludzi pačali dapamahać u pošukach — prapanoŭvali svaje padobnyja śvitšoty, dzialilisia spasyłkami, vykazvali spačuvańni i słovy padtrymki. Mnohija raskazvali pra svaje straty, sprabujučy padtrymać žančynu.
«Maje ščyryja spačuvańni. Ja straciła syna ŭ 2021. Anieŭryzma. 29 hadoŭ. Serca kryvioj ablivajecca…»
«Ja dahetul zachoŭvaju staruju tatavu bajku. Nie myła, nie apracoŭvała. 12 hadoŭ prajšło. Prosta składziena i lažyć u šafie».
«Dziakuj, što vy pišacie. I ja płaču, kali čytaju heta…»
«Na majo 17‑hodździe tata padaryŭ mnie niejki dezadarant. Ja potym jaho jašče dva hady zachoŭvała i nie karystałasia, kab choć niejkaja pamiać zastałasia. Tata pamior praz try tydni paśla majho dnia naradžeńnia. Abdymaju Vas».
«Vitaju! Vielmi supieražyvaju Vam. U mianie ŭ rodnym horadzie, zdajecca, zastaŭsia taki ž śvitšot».
«Znajšła taki na Kufary».
«Vielmi škada Vas i Vašu dačku. 15 maja ja pieraniesła insult, i mnie było ŭsiaho 35. Chaču padtrymać Vas i mocna-mocna abdymaju», — pišuć słovy padtrymki kamientatary.
Na zvarot adhuknuŭsia i sam brend Mark Formelle. Kampanija pakinuła kamientar pad postam: «Vašaje paviedamleńnie nie moža pakinuć abyjakavym. Niama słoŭ, jakija mahli b suciešyć u takoj stracie. My ščyra raździalajem vaš bol i kranuty tym, što častka vašaj historyi źviazana z našym brendam. I dla nas heta stanie spravaj honaru — znajści toj samy śvitšot u znak pamiaci, ciepłyni i našaj padtrymki. My napisali vam u asabistyja paviedamleńni».
Kamientary