Što heta za redkaziamielnyja mietały, za jakija Tramp raźjušyŭsia na Kitaj

Jakija pastaŭki abmiežavaŭ Kitaj i čamu jany važnyja

Havorka idzie pra redkaziamielnyja mietały — hrupu chimičnych elemientaŭ, jakija, niahledziačy na svaju nazvu, nie źjaŭlajucca redkimi ŭ ziamnoj kary. Adnak ich zdabyča — składany i darahi praces, bo jany raśsiejanyja siarod inšych parod i minierałaŭ.

Miescaŭ z vysokaj kancentracyjaj najbolš zapatrabavanych elemientaŭ vielmi mała, i adno z takich znachodzicca ŭ paŭdniovym Kitai. Mienavita tamu kraina na siońnia zabiaśpiečvaje kala 90% suśvietnych pastavak hetych resursaŭ.

Adzin z najvažniejšych takich elemientaŭ — dysprozij. Kali paraŭnoŭvać technałahičnuju industryju ź piakarniaj, dysprozij byŭ by jak razrychlalnik dla ciesta: jon vykarystoŭvajecca ŭ nievialikich kolkaściach, ale bieź jaho niemahčyma stvaryć ruchaviki dla elektramabilaŭ, vietranyja turbiny, vajskovuju techniku i abstalavańnie dla vytvorčaści čypaŭ.

Što kankretna zrabiŭ Kitaj?

Ministerstva handlu Kitaja značna ŭzmacniła isnujučy ekspartny kantrol, piša The Wall Street Journal. Ciapier lubaja kampanija — kitajskaja ci zamiežnaja — pavinna atrymać dazvoł ad uładaŭ KNR na ekspart luboj pradukcyi, kali bolš za 0,1% jaje koštu składajuć redkaziamielnyja elemienty.

Taksama byŭ pašyrany śpis zabaronienych dla ekspartu redkaziamielnych elemientaŭ, a ich pastaŭki dla vykarystańnia ŭ vajskovych metach za miažoj byli całkam zabaronienyja. Adnačasova Piekin uvioŭ partovyja zbory dla amierykanskich sudoŭ i pačaŭ antymanapolnaje rasśledavańnie ŭ dačynieńni da kampanii Qualcomm. Usio heta — častka kampanii ŭ adkaz na handlovyja abmiežavańni z boku Vašynhtona.

Pavialičyć

Jakija kampanii paciarpiać?

Jakija kankretna pradukty zakranuć novyja praviły, pakul nie jasna. Pad udaram mohuć apynucca jak sama syravina (čystyja redkaziamielnyja mietały), tak i pradukty ich pieršasnaj apracoŭki, pieradusim mahutnyja redkaziamielnyja mahnity. Akramia taho, abmiežavańni mohuć zakranuć i lubyja bolš składanyja kampanienty, u składzie jakich jość hetyja elemienty. Chutčej za ŭsio, Piekin naŭmysna pakidaje farmuloŭki tumannymi, kab zachavać hnutkaść na pieramovach sa Štatami.

Analityki z Capital Economics miarkujuć, što hatovyja spažyvieckija tavary, takija, jak noŭtbuki i smartfony, chutčej za ŭsio, nie dasiahnuć ustanoŭlenaha paroha ŭ 0,1%. Adnak pramiežkavyja tavary, naprykład, ruchaviki, mohuć jaho pieravysić.

Kitaj zajaviŭ, što budzie asabliva ŭvažliva kantralavać ekspart pradukcyi, pryznačanaj dla stvareńnia pieradavych čypaŭ abo padtrymki daśledavańniaŭ u halinie štučnaha intelektu. Heta pramy ŭdar pa amierykanskich lidarach, takich jak Nvidia.

Analityki bačać u novych praviłach jašče adnu schavanuju pahrozu. Pad udaram mohuć apynucca navat takija hihanty, jak Boeing — kampanii, jakija pracujuć adnačasova i na vajskovy, i na hramadzianski rynak. Ekśpierty miarkujuć, što im mohuć całkam pierakryć dostup da resursaŭ, navat dla vytvorčaści vyklučna hramadzianskaj pradukcyi.

Ci pojdzie Kitaj da kanca i što mohuć zrabić ZŠA?

Mnohija analityki ličać, što hetyja abmiežavańni — taktyka, jakuju abraŭ Piekin napiaredadni pieramovaŭ, choć niekatoryja zabarony, musić, zastanucca ŭ doŭhaterminovaj pierśpiektyvie. U adkaz Donald Tramp pryhraziŭ uviadzieńniem 100% mytaŭ na kitajskija tavary i dapuściŭ, što moža admianić sustreču ź Si Czińpinam.

U ZŠA taksama jość svaje ryčahi ŭpłyvu: jany vyrablajuć čypy dla štučnaha intelektu i pramysłovuju pradukcyju, naprykład, reaktyŭnyja ruchaviki, jakija Kitaj pakul nie zdolny asvoić samastojna.

Razumiejučy svaju ŭraźlivaść, Vašynhton pačaŭ dziejničać, kab pazbavicca ad kitajskaj zaležnaści. Jon buduje ŭłasny, poŭny łancužok pastavak — nie prosta dla zdabyčy syraviny, a mienavita dla vytvorčaści redkaziamielnych mahnitaŭ. Radoviščy redkaziamielnych elemientaŭ jość i za miežami Kitaja, adnak hałoŭnaja prablema nie ŭ samoj zdabyčy, a ŭ ich dalejšaj apracoŭcy.

Kitaj źjaŭlajecca amal manapalistam va ŭsim technałahičnym łancužku — ad uzbahačeńnia rudy da vytvorčaści hatovych mahnitaŭ. Kab stvaryć z nula ŭłasnuju infrastrukturu, supastaŭnuju z kitajskaj, ZŠA spatrebiacca hady.

• 2
• 0
• 3
• 2
• 4
• 1
• 1
• 0