Daśledčyki: štučny intelekt pašyraje razryŭ pamiž «zorkami» i astatnimi

Isnuje mierkavańnie, što štučny intelekt (ŠI) zraŭnaje šancy pamiž supracoŭnikami, dajučy kožnamu instrumienty, kab pracavać na ŭzroŭni najlepšych. Adnak daśledavańnie dacenta Škoły mieniedžmientu Techaskaha ŭniviersiteta Mećju Koła (Matthew Call), pra jakoje jon raskazaŭ na staronkach The Wall Street Journal, pakazvajuć, što hetaja ahulnapryniataja dumka pamyłkovaja. Naadvarot, mienavita «zorki» atrymlivajuć najbolšuju vyhadu ad ŠI, i prorva pamiž najlepšymi i nienajlepšymi kadrami raście.

Dla kampanij heta prablema. Taki razryŭ moža vyklikać napružanaść u kalektyvie, padryvać kamandny duch i, u vyniku, škodzić sumiesnaj pracy, jakaja źjaŭlajecca ruchavikom pośpiechu.

Čamu dośvied uzmacniaje pieravahi ad ŠI?

Daśledčyk prapanuje razhledzieć typovuju arhanizacyju. Kali tam źjaŭlajecca novy instrumient (pašyranyja funkcyi Excel, składanyja sistemy kiravańnia ŭzajemaadnosinami z klijentami abo mahutnyja analityčnyja płatformy), jaki abiacaje zrabić usich bolš pradukcyjnymi, mienavita «zorki» pieršymi prasiakajuć jaho detali, znachodziać schavanyja mahčymaści i kreatyŭnyja sposaby prymianieńnia. U toj ža čas zvyčajnyja supracoŭniki, jak praviła, abmiažoŭvajucca bazavymi funkcyjami.

Pavodle Koła, z ŠI atrymlivajecca toje samaje, ale jašče vyjaŭniej. «Zorki» vykarystoŭvajuć svaju hłybokuju prafiesijnuju ekśpiertyzu, kab atrymać ad sistem ŠI pryncypova bolš karyści i, što važna, zaŭvažyć bolš pamyłak, čym zvyčajnyja vykanaŭcy.

U jakaści prykładu Koł pryvodzić vobraz «zornaha» kansultanta. Taki śpiecyjalist nie budzie prasić ŠI prosta «praanalizavać rynak». Dziakujučy svajmu dośviedu jon zadaść bolš dakładnyja i metanakiravanyja pytańni pra dynamiku kankurencyi, rehulavańnie i barjery. Hłybokaja ekśpiertyza dazvalaje jamu ŭdakładniać zapyty i nie prymać pieršy ž vynik, a vypytać u ŠI čym bolš. Heta viadzie da bolš dakładnych i karysnych rašeńniaŭ.

Akramia taho, daśledavańni, na jakija spasyłajecca aŭtar, pakazvajuć, što supracoŭniki z bolšaj ekśpiertnaściu značna lepš raspaznajuć, kali rekamiendacyi ŠI słušnyja, a kali — pamyłkovyja.

U «zorak» jość jašče adna pieravaha: jany ŭ cełym pracujuć bolš sistematyčna, jany bolš arhanizavanyja i ŭdumlivyja adnosna taho, jak padyści da vykanańnia zadač u paraŭnańni sa zvyčajnym rabotnikam.

Daśledavańni paćviardžajuć, što mienavita takija arhanizavanyja ludzi atrymlivajuć značna lepšyja vyniki ad instrumientaŭ ŠI, jany najlepš reahujuć na vyraznyja i strukturavanyja zapyty.

Dadatkovy bonus

Staŭleńnie kiraŭnictva, jak adznačaje Koł, tolki ŭzmacniaje hetyja pieravahi. Reputacyja i status dajuć «zorkam» aŭtanomiju dla ekśpierymientaŭ. Pakul zvyčajnyja supracoŭniki čakajuć aficyjnych instrukcyj, bajučysia pamylicca, «zorki» ŭžo testujuć miežy technałohii i stvarajuć piersanalizavanyja pracoŭnyja pracesy. Kali ich ekśpierymient pojdzie nie tak, im, chutčej za ŭsio, heta darujuć.

Akramia taho, uźnikaje pytańnie pryznańnia zasłuh. Daśledčyk źviartaje ŭvahu, što ludzi z vysokim statusam tradycyjna atrymlivajuć niepraparcyjna vialikaje pryznańnie. Heta značyć, što kali dapamoha ŠI niezaŭvažnaja, pracu «zorki» paličać dokazam jaje hienijalnaści.

Kali ž vyklučny vynik pakaža zvyčajny supracoŭnik, mnohija padumajuć, što ŭsiu pracu zrabiŭ ŠI. Na dumku Koła, heta stvaraje zahannaje koła, u jakim zvyčajnyja supracoŭniki pazbaŭlajucca pryznańnia, navat kali paśpiachova vykarystoŭvajuć novyja technałohii.

Jak zraŭnać šancy

Kab nie dać ŠI pieratvaryć «zorak» u niebažycharoŭ, Mećju Koł prapanuje kampanijam try stratehii.

Pa-pieršaje, jon raić zaachvočvać usich ekśpierymientavać z ŠI. Razumnyja kiraŭniki pavinny stvaryć «piasočnicy», dzie supracoŭniki zmohuć testavać instrumienty biez strachu pamylicca, i ŭkaranić prahramy ŭzajemnaha navučańnia, jakija abjadnoŭvajuć zvyčajnych vykanaŭcaŭ z tymi, chto pieršym asvoiŭ technałohiju.

Što jašče važniej, jany pavinny inviestavać u navučańnie ŠI-piśmiennaści, jakaja vychodzić za ramki bazavaha vykarystańnia instrumientaŭ i ŭklučaje ŭ siabie pracu z zapytami (prompt-inžynirynh), acenku vynikaŭ i stratehičnaje delehavańnie zadač. Meta nie ŭ tym, kab likvidavać pieravahu «zorak» u ekśpiertyzie, a ŭ tym, kab navučyć navykam, jakija možna zasvoić i jakija mohuć zraŭnać šancy.

Pa-druhoje, nieabchodna raspaŭsiudžvać, multyplikavać viedy. Zamiest taho, kab dazvalać «zorkam» chavać svaje adkryćci, kampanii pavinny zrabić abmien viedami standartnaj praktykaj. Kali adzin supracoŭnik znachodzić efiektyŭny pracoŭny praces z ŠI, jaho treba zafiksavać i zrabić dastupnym dla ŭsioj kamandy.

I, narešcie, Koł zaklikaje pierapracavać sistemy acenki, kab uličvać pracu, dapoŭnienuju ŠI. Kampanii pavinny raspracavać kryteryi, jakija spraviadliva aceńvajuć pracu z dapamohaj ŠI niezaležna ad ciapierašniaha statusa vykanaŭcy. I jany pavinny navučać kiraŭnikoŭ raspaznavać, kali praduziataść moža skažać ich acenku pradukcyjnaści supracoŭnika. Varta razhledzieć mahčymaść ukaranieńnia praktyk «prazrystaści ŠI», kali kamandy dzielacca tym, jak jany vykarystoŭvajuć instrumienty ŠI, robiačy jaho dapamohu bačnaj, a nie schavanaj.

Biez hetych sistemnych źmien, papiaredžvaje daśledčyk, ŠI ryzykuje stvaryć dvuchuzroŭnievuju pracoŭnuju siłu, dzie nievialikaja hrupa adryvajecca pa jakaści svajoj pracy, a astatnija ŭsio bolš adstajuć.

• 4
• 1
• 1
• 2
• 1
• 1
• 1
• 0