Daradca Naŭsiedy: Kančatkovaje rašeńnie pa achovie Cichanoŭskaj jašče nie pryniataje
U Litvie praciahvajucca dyskusii nakont uzroŭniu achovy lidarki biełaruskaj demakratyčnaj apazicyi Śviatłany Cichanoŭskaj. Jak paviedamiła hałoŭnaja daradca prezidenta Litvy pa źniešniaj palitycy Asta Skajshirycie, rašeńnie ab poŭnym źmianieńni režymu achovy pakul nie pryniata, choć z kastryčnika achova Cichanoŭskaj była źmienšana.
«Nakolki ja razumieju, kančatkovyja rašeńni va ŭradzie byccam by nie pryniatyja, jašče viadziecca dyskusija, vyrašajecca», — skazała Skajshirycie ŭ aŭtorak radyjostancyi «Žinių radijas», piša LRT.
Pavodle jaje słoŭ, prezident Hitanas Naŭsieda prytrymlivajecca mierkavańnia, što Cichanoŭskaja pavinna być i nadalej pad achovaj, a ŭzrovień i mietady achovy pavinny vyznačać adpaviednyja słužby.
Daradca zajaviła, što rašeńnie nakont achovy Cichanoŭskaj pavinna być palityčnym.
«Vyklučna da techničnych aśpiektaŭ my nie možam jaho zvodzić, ale technična heta pavinna być pravilnaje, dobraje rašeńnie», — skazała Skajshirycie.
Pavodle jaje, aficyjny status Cichanoŭskaj u Litvie zastajecca raniejšym, jana maje ŭ krainie status hościa, i pa-raniejšamu dziejničaje akredytacyja Biełaruskaha demakratyčnaha pradstaŭnictva, vydadzienaja Ministerstvam zamiežnych spraŭ.
«Vidać, urad, prymajučy adpaviednyja rašeńni, budzie ŭličvać uvieś hety kompleks pryčyn», — adznačyła daradca Naŭsiedy.
Litva źniziła ŭzrovień achovy Cichanoŭskaj i jaje pracoŭnych pamiaškańniaŭ z 1 kastryčnika.
Čynoŭniki śćviardžajuć, što zamiest Słužby achovy kiraŭnictva ciapier achovu budzie ažyćciaŭlać Biuro kryminalnaj palicyi Litvy.
Źmieny ŭ achovie aznačajuć, što dom i ofis Cichanoŭskaj zastajucca pad achovaj, adnak lidar biełaruskaj apazicyi straciła asabistuju achovu ŭ Litvie i za miažoj, piša vydańnie.
U adkaz na mierkavańnie, što Cichanoŭskaja moža pierajechać u Polšču, Skajshirycie skazała: «Spadarynia Cichanoŭskaja — svabodnaja asoba i nie znachodzicca ŭ turmie. Viadoma, kali b jana chacieła, jana mahła b razhladać niejkija inšyja varyjanty, adnak naša sprava — zabiaśpiečyć, kab jana ŭ Litvie adčuvała siabie ŭ biaśpiecy».
Prychilniki źmianšeńnia režymu achovy Cichanoŭskaj śćviardžajuć, što jon źmienieny ŭ adkaz na ŭzrovień pahrozy i źviazany z techničnymi pryčynami.
Krytyki padazrajuć, što rašeńnie było palityčnym, i takim rašeńniem prynižajecca status lidara apazicyi.
Sam Ofis Cichanoŭskaj śćviardžaje, što praciahvaje dziejnaść, niahledziačy na źmienieny režym achovy, ale ŭ fizičnych pamiaškańniach pakul pracuje tolki častka supracoŭnikaŭ.
Jany zajaŭlajuć, što paśla rašeńnia Litvy kolkaść pahroz pavialičyłasia, piša vydańnie.
Ciapier čytajuć
Bondarava dakałupałasia da vierša «Vaviorka» ŭ prahramie dziciačych sadkoŭ. Što ź im nie tak?1
Kamientary