«Jon sapraŭdy jak mała chto zasłužyŭ jaje» — Milinkievič pra premiju dla Pačobuta
«Premija Sacharava ŭzmocnić šancy Pačobuta na vyzvaleńnie i dapamoža inšym palitviaźniam».
Kolišni łaŭreat premii Sacharava, były kandydat na prezidenty, a ciapier daradca Śviatłany Cichanoŭskaj Alaksandr Milinkievič pavinšavaŭ Andžeja Pačobuta z uznaharodaj.
«Jon sapraŭdy jak mała chto zasłužyŭ jaje. Ja jaho viedaju tysiaču hadoŭ. My z adnaho horadu. My razam adradžali polskaść i biełaruskaść u Horadni. Heta čałaviek adradžeńnia, vielmi śmieły, mužny čałaviek, čałaviek idei, kaštoŭnaściaŭ. I ja dumaju, što jon zasłužyŭ hetuju premiju, i jana, biezumoŭna, uzmocnić jaho šansy na toje, kab być vyzvalenym, jak i dapamoža inšym biełaruskim palitviaźniam».
Milikievič u razmovie sa «Svabodaj» padkreślivaje, što Łukašenka nie vyzvalaje palitviaźniaŭ z toj pryčyny, što jany atrymali prestyžnyja premii.
«Łukašenka tolki tady vyzvalaje palitviaźniaŭ, kali jon baicca, što nie budzie dalej kiravać Biełaruśsiu. Tak było ŭ časy ahresii ŭ Hruzii, potym anieksija Kryma, i tady vyzvalalisia palitviaźni. I zaraz jon taksama baicca, što Pucin prajhraje vajnu. I jon budzie vyzvalać palitviaźniaŭ, ja ŭ hetym upeŭnieny, u tym liku Andžeja».
Pavodle palityka, ES pryniaŭ słušnaje rašeńnie, addaŭšy premiju dvum žurnalistam.
«Mała chto, jak žurnalisty, robiać vialikuju spravu ŭstalavańnia ŭ śviecie demakratyi, svabody, pravoŭ čałavieka. My dažylisia da takich časoŭ, što demakratyj stała ŭžo mienš, čym dyktatur. U śviecie pieramahajuć idei ličbavaha tatalitaryzmu, kiravanaha chaosu. I navat viadučaja kraina śvietu pierastaje dbać pra demakratyju ŭ inšych dziaržavach. Heta, kaniešnie, vielmi ciažkija, niaprostyja časy, i takija hieroi, sapraŭdnyja hieroi jak Andžej Pačobut vielmi važnyja jak symbali, jak ludzi, na jakich treba raŭniacca», — kaža jon.
Žurnalist i aktyvist polskaj mienšaści ŭ Biełarusi Andžej Pačobut aryštavany byŭ uviesnu 2021 hoda ŭ miežach tak zvanaj «spravy Sajuza palakaŭ na Biełarusi». Hrodzienski abłasny sud prysudziŭ jaho da 8 hadoŭ kałonii strohaha režymu. Aktyvista pryznali vinavatym u «zaklikach da dziejańniaŭ, nakiravanych na pryčynieńnie škody nacyjanalnaj biaśpiecy» i «raspalvańni nacyjanalnaj varožaści». Palityčny charaktar prysudu byŭ pryznany biełaruskimi pravaabaroncami i mižnarodnaj supolnaściu.
Paśla vyniasieńnia hetaha žorstkaha prysudu 10 lutaha 2023 hoda Polšča ŭ adkaz rezka ŭzmacniła sankcyjny cisk, zakryŭšy adzin z dvuch klučavych punktaŭ propusku na miažy — «Babroŭniki» («Bierastavica»).
Kamientary