«Biełaruś źnikaje» — tyktok plujecca z nahody pierajmienavańnia prypynkaŭ
Navina ab pierajmienavańni ŭ Minsku sotni prypynkaŭ nasupierak normam zakanadaŭstva, u vyniku čaho zamiest tranślitaracyi ź biełaruskaj movy nazvy byli pierakładzienyja na ruskuju, vyklikała žyvoje abmierkavańnie ŭ tyktoku, sabraŭšy tysiačy kamientaryjaŭ.
Pieravažnaja bolšaść karystalnikaŭ uspryniała rašeńnie čynoŭnikaŭ jak čarhovy akt rusifikacyi.
«Akupacyja prachodzić u štatnym režymie»
Samuju vialikuju hrupu kamientaroŭ składajuć tyja, aŭtary jakich bačać u hetym kankretnym kroku čarhovy dokaz taho, što kraina hublaje svaju samastojnaść i ruchajecca da statusu vobłaści Rasii.
Bolš za ŭsio łajkaŭ nabraŭ łakaničny kamientaryj: «Biełaruś źnikaje».
Inšyja dadajuć: «Chutka Biełaruś stanie vobłaściu Rasii», «Usio, niama bolš našaj krainy. Čym my zaraz adroźnivajemsia ad Rasii?!?!? Heta žach… ale my jak zaŭsiody ścierpim», «Nu dzie tyja, chto harłapaniŭ «zatoje jon krainu zachavaŭ». Jašče paru hadoŭ kiravańnia hetaha cara, i ŭsio — Biełarusi niama», «Pradali našu Biełaruś», «Akupacyja prachodzić u štatnym režymie».
Čamu biełarusy «ścielacca»?
Karystalniki TikTok nie mohuć zrazumieć, čamu suvierennaja kraina dobraachvotna «ścielecca» pierad Rasijaj, ličać heta prykmietaj padparadkavańnia, što supiarečyć suvierennamu statusu krainy.
Kamientaryj «U Rasii nie padładžvajucca pad nazvy biełaruskaha, čamu tady biełarusy ścielacca?» nabraŭ amal 5300 łajkaŭ.
Inšyja dadajuć: «Jak pa mnie, heta niapravilna, Biełaruś ža nie respublika ŭ składzie RF», «Ja choć i nie lubiła biełaruskaj movy, ale ŭsio roŭna sumna(. Biełaruś ścielecca pad RF. Užo ničoha ad kultury nie zastałosia».
«Jany tam chočuć, kab Biełaruś źnikła?»
Cikava, što navat ludzi z Rasii ličać, što heta niapravilnaje rašeńnie, jakoje pahražaje źniknieńniem biełaruskaj movy i nacyjanalnaj identyčnaści. Jany padtrymlivajuć zaniepakojenaść biełarusaŭ.
«Naohuł niapravilna!!! Ja sam z Rasii, ale liču, što hetyja rašeńni nie spraviadlivyja! Jany tam chočuć, kab Biełaruś źnikła?»
Ab pahrozie straty praz takija dziejańni nacyjanalnaj identyčnaści va ŭmovach, kali biełaruskaja mova i tak mała vykarystoŭvajecca ŭ publičnym žyćci i dziaržaŭnymi čynoŭnikami i siłavikami, a zastajecca tolki ŭ siemjach i sacsietkach, pišuć i sami biełarusy.
«Voś mienavita hetaha Ukraina nie chacieła. Tam, dzie bolšy ŭpłyŭ Rasii, tracicca nacyjanalnaja identyčnaść».
«U Biełarusi 85% hramadzian pa nacyjanalnaści biełarusy, ź ich tolki 20% štodnia havorać i 10% dziaciej vučacca na biełaruskaj movie. Chutka ad Biełarusi zastaniecca tolki histaryčnaja nazva terytoryj».
«Čamu ŭsie nyjuć?»
Adnak jość i tyja, chto padtrymlivaje rašeńnie ŭładaŭ. Praŭda, takich mienšaść. Kali samy papularny kamientaryj z asudžeńniem nabraŭ amal 10000 łajkaŭ, to kamientaryj u padtrymku dziejańniaŭ čynoŭnikaŭ — tolki paŭsotni.
«Małajcy čynoŭniki, napisali nazvu na movie bolšaści. Naohuł nie razumieju, navošta ŭ Minsku pisać nazvy na movie mienšaści», «Małajcy, pryjemna stali hučać, daŭno prapanoŭvaŭ», «Vielmi navat dobra».
Prychilniki apraŭdvajuć rusifikacyju praktyčnymi mierkavańniami — maŭlaŭ, bolšaść havoryć pa-rusku, tamu pisać na im łahična, i navat śćviardžajuć, što ruskaja mova «pryjemniej hučyć».
«Čamu ŭsie nyjuć u komach? Ruskaja mova našmat lepš hučyć (ja ź Biełarusi)», «Pravilna, tamu što my ŭsie havorym na ruskaj movie, a tyja, chto ŭ kamientach aburajucca, taksama havorać tolki na ruskaj».
Niekatoryja nie bačać u takich dziejańniach šmat sensu, ale ličać: «Niachaj budzie», bo «i tak usie havorym na adnoj movie — ruskaj».
Znajšlisia i tyja, chto zhadaŭ stary arhumient ab najaŭnaści dźviuch dziaržaŭnych moŭ u jakaści apraŭdańnia dziejańniaŭ čynoŭnikaŭ.
Bol, ale nadzieja na budučyniu
Tyja ž, chto asudžaje rašeńnie administracyi Minska, vykazvajuć svajo rasčaravańnie: «Žach!!!», «Ja płaču», «Vielmi kryŭdna», ździŭlajucca: «I navošta heta?».
Niechta zaŭvažaje, što paśla źmieny ŭłady situacyja z movaj vypravicca.
«Spadziajusia, što ŭ budučyni paśla sychodu (abo źviaržeńnia) Łukašenki ŭsio vypravicca, i ruskaja mova bolš nie budzie aficyjnaj, a biełaruskuju pačnuć raspaŭsiudžvać».
Kamientary
Jemu staviat, v Kriemle, usłovija, na kotorych on možiet sochraniť vłasť i nahrablennoje, on ich vypołniaje.
Tak 31 hod.