Pačynajuć budavać novuju častku aŭtamabilnaha mosta cieraz Muchaviec u Breście
U centry Bresta ŭ listapadzie pačnuć uzvodzić pieršyja apory novaj častki aŭtamabilnaha mosta cieraz raku Muchaviec. Pra heta paviedamiŭ majstar budaŭniča-mantažnych rabot filijała AAT «Mostabud» — «Mostaatrad №58» Mikałaj Bakukin, piša BiełTA.
Stary most, jaki złučaje bulvar Šaŭčenki i Varšaŭskuju šašu, pabudavany jašče ŭ 1960‑ia hady i ŭžo nie adpaviadaje sučasnym patrabavańniam. Tamu było pryniata rašeńnie pra jaho pastupovuju rekanstrukcyju, što ŭklučaje budaŭnictva druhoj vietki. Novyja praloty zrobiać z žalezabietonu, a centralnuju častku — ź mietału.
Raboty pačalisia letam, hałoŭny padradčyk — «Mostaatrad №58». Na abjekcie pracujuć kala 30 čałaviek i kala 15 adzinak techniki, u tym liku budaŭničaj i hruzapadjomnaj.
3 listapada ŭ pieršaj pałovie dnia ŭ horadzie źmianili schiemu ruchu transpartu praz most — kab prakłaści padziemnyja kamunikacyi adkrytym sposabam i paskoryć tempy rabot. Ciapier śpiecyjalisty zajmajucca ŭkładkaj liŭnievaj kanalizacyi. Na kolcy pa bulvary Šaŭčenki zaviaršajuć pieranos vodapravoda i hazapravoda.
Paralelna supracoŭniki DBU-15 robiać nasyp darožnaha pałatna pa levym baku, dzie i projdzie novaja vietka mosta. Ciapier staviacca špuntovyja aharodžy placovak, dzie niepasredna budzie źbiracca novy most.
«Vynas sietak i prystasavańnie placovak — asnoŭny padrychtoŭčy pieryjad. Jon praktyčna zakančvajecca. Užo ŭ bližejšyja dni budziem rabić bureńnie śvidravin dla buranabiŭnych słupoŭ dla apor mosta. Hetym my pačniom asnoŭnyja raboty pa budaŭnictvie mosta».
Pry mantažy mietaličnaha pralotu płanujecca vykarystoŭvać baržu.
Zaviaršyć budaŭnictva pieršaj vietki płanujuć naprykancy 2026‑ha abo ŭ pačatku 2027 hoda. Paśla hetaha ruch transpartu puściać pa novym moście, a stary źbirajucca demantavać i ŭźvieści na jaho miescy novy.
U Breście pačnuć rekanstrukcyju mosta cieraz Muchaviec
Jak vyhladaje most pamiž vulicaj Maskoŭskaj i płoščaj Niezaležnaści, jaki adkryli siońnia
U Mazyry adkryjuć paśla rekanstrukcyi most praz Prypiać
Jak vyhladaje ŭ Mazyry most praz Prypiać, budaŭnictva jakoha zaviaršajecca FOTY
U Kitai adkryli samy vysoki ŭ śviecie most
Kamientary