U «Narodnaj Hramadzie» razborki — u Sparyša zabrali pasadu hienieralnaha sakratara, jon nie zhodny

«U mianie ŭźnikła adčuvańnie, što siarod ludziej, jakija ciapier sprabujuć demanstravać lidarstva ŭ «Narodnaj Hramadzie», zanadta šmat ludziej troški nie našych… Ja b acharaktaryzavaŭ ich jak ludziej z «Havary praŭdu». Heta nie revalucyjaniery, zusim», — narakaje były palitviazień Siarhiej Sparyš.

U «Narodnaj Hramadzie», abjadnańni prychilnikaŭ Mikoły Statkieviča, razdraj siarod kiraŭnictva. Adrazu varta ŭdakładnić, što «partyja» — heta vielmi ŭmoŭnaje abaznačeńnie dla biełaruskich emihracyjnych palityčnych ruchaŭ.

Faktyčna «Narodnaja Hramada» (jak i inšyja «partyi») — heta prosta zamiežnaja jurydyčnaja asoba. Niama nijakaha minimalnaha limitu siabroŭ, niama niejkaj asobnaj rehistracyi. Faktyčna kožny achvotny moža zarehistravać takuju «partyju» na svajo imia.

Na čale «Narodnaj Hramady» akazaŭsia Jaŭhien Vilski, były połacki afhaniec, jaki ŭ siaredzinie 2010‑ch byŭ u «Havary praŭdu», ličyŭsia davieranaj asobaj Taćciany Karatkievič. Paśla dałučyŭsia da Hramady, ale byŭ na druhasnych rolach.

U 2020‑m Vilski byŭ kaardynataram inicyjatyŭnaj hrupy Cichanoŭskaj pa Viciebskaj vobłaści.

Hienieralnym sakratarom — ličy, namieśnikam — pry im była Chielen Minskaja — žančyna z fantazijnym psieŭdanimam, jakaja nie raskryvaje svajo realnaje imia. Miarkujučy z usiaho, jana žyvie va Ukrainie i davoli blizkaja da biełaruskich dobraachvotnikaŭ.

Pavialičyć

Kali ž u vieraśni 2025 hoda byŭ pamiłavany i vyviezieny ŭ Litvu były hienieralny sakratar «Narodnaj Hramady» Siarhiej Sparyš, to Chelen Minskaja viarnuła jamu pasadu. A ciapier, vyhladaje, znoŭ zabrała.

Apošnija dni aktyvisty «NH» svaracca pamiž saboj u fejsbuku, vyśviatlajuć, chto ahient, chto ałkaholik, a chto na kaho źbiraŭsia pisać danosy ŭ litoŭskija śpiecsłužby.

Pavialičyć

Pavialičyć

Siońnia Chelen Minskaja pierapościła ŭ svoj telehram-kanał na 130 padpisčykaŭ dopis Siarhieja Sparyša, u jakim toj vinšuje z dniom naradžeńnia Viktara Babaryku. Jaje hetaje vinšavańnie vidavočna aburyła. «Častkovy adkaz na pytańnie, čamu Sparyša źniali z pasady hienieralnaha sakratara partyi «Narodnaja Hramada», — prakamientavała jana i ŭdakładniła, što pytańnie ŭ jaho pazicyi. Maŭlaŭ, pazicyja Sparyša prarasijskaja, a heta niedapuščalna va ŭmovach interviencyi.

«Naša Niva» spytała ŭ byłoha palitviaźnia, što ž za kanflikt adbyŭsia i ci nasamreč jaho adpravili ŭ adstaŭku.

«Kali ja vyjšaŭ, ja byŭ troški ździŭleny tym, u jakim stanie maja partyja «Narodnaja Hramada». Ale pieršym zvanočkam dla mianie było toje, u jakim stanie partyjnyja kanały. Jany nie vialisia praktyčna apošnija try hady praz toje, što čałavieka, jaki hetym zajmaŭsia, u jakoha było daručeńnie Mikałaja Statkieviča zajmacca partyjnymi kanałami, pa sutnaści z partyi vypierli. A bolš rabić heta nie było kamu, usim astatnim było na hetu spravu plavać.

Viadoma, viałasia niejkaja praca, ale tym nie mienš heta troški nie taja partyja, ź jakoj ja chacieŭ by źviazvać svajo žyćcio. Chaciełasia b, kab jana trošački znoŭ źmianiłasia, i kab heta znoŭ była partyja 2020 hoda, partyja Mikałaja Statkieviča», — patłumačyŭ Sparyš.

Jon pa-raniejšamu ličyć siabie hienieralnym sakratarom. «Što tyčycca taho, što mianie nibyta źniali z partyjnaj pasady, to ja adznaču, što mianie pryznačaŭ partyjny źjezd, a zaraz niejkija niekalki čałaviek, parušajučy svaje novyja statuty, skazali, što ciapier nibyta ja nie hienieralny sakratar.

Ja, kali ščyra, hetymi pasadami nie nadta cikaŭlusia, ja nie baču asablivaha sensu ŭ hetych pasadach, ale ŭ dadzienym vypadku heta pryncypova, bo parušajucca ŭsie zakony božyja i čałaviečyja», — kaža były palitviazień.

«A što tam ličać niekalki čałaviek, jakija pierabiehli da nas z «Havary praŭdu», nu dyk heta ich sprava», — padsumoŭvaje Sparyš.

• 6
• 0
• 5
• 14
• 0
• 2
• 0
• 0