Dzień pieramohi «Biełtelekama»

Vajna pryvatnych internet-pravajderaŭ z «Biełtelekamam», jakija dobra patrapali niervy manapalistu ŭ minułym hodzie i pryviali da istotnaha źnižeńnia koštaŭ na dostup u internet dla šarahovych biełarusaŭ, pradkazalna skončyłasia poŭnaj i kančatkovaj pieramohaj apošniaha.

U kancy krasavika patencyjnaje akcyjaniernaje tavarystva adabrała adzinuju krynicu prybytku pryvatnych pravajderaŭ — absłuhoŭvańnie jurydyčnych asob. Ciapier miehabitny anlim ad byfly (handlovaja marka «Biełtelekama») pa košcie 33 $ mohuć nabyvać nie tolki zvyčajnyja hramadzianie, ale i firmy. Cana dla jurasobaŭ źniziłasia ŭ 10 razoŭ! Anałahičny kanał z tak zvanaj harantavanaj pałasoj prapuskańnia dla internet-pravajderaŭ uładalnik vonkavaha šluza pradaje za 416 $ biez uliku PDV, ale z ulikam krasavickaj źnižki ŭ 25%. Kab spracavać u nul i prapanavać kančatkovym spažyŭcam padobnyja bieźlimitnyja ŭmovy, pryvatny pravajder pavinien umudrycca paviesić na adzin kanał minimum 12 klijentaŭ. Na movie apierataraŭ suviazi heta nazyvajecca multyplikataram, na jakim fizična nie moža być bolš za 2–3. Vidavočna, pakuty pryvatnikaŭ buduć niadoŭhimi — roŭna stolki, kolki treba času dla pieraskładańnia damovy sa ščodrym «Biełtelekamam».

Z absłuhoŭvańniem fizičnych asobaŭ pytańnie było vyrašanaje jašče raniej. Bieźlimitnyja prapanovy byfly, startavyja pakiety pa canie ad 6 $ i niepadzielny kantrol rehijanalnych rynkaŭ kančatkova pachavali mahčymaści kankurentaŭ manieŭravać. Situacyja pa 100% zachopie rynku strymlivajecca tolki ahidnaj padtrymkaj i niepavarotlivaściu manapalista ŭ absłuhoŭvańni šarahovych karystalnikaŭ. «Internet pa tałonach» bolš nie zdajecca takim užo pierabolšańniem — klijenty miesiacami stajać u čarzie na padklučeńnie da byfly.

Dziejańni «Biełtelekama», uchvalenyja Minsuviazi, bolš nahadvajuć taktyku vypalenaj ziamli i pryviali da źniščeńnia kankurencyi. Na pieršy pohlad takaja dziaržaŭnaja palityka pazbaŭlenaja sensu. Ale na fonie budučaj libieralizacyi rynku suviazi i źjaŭleńnia alternatyŭnych mižnarodnych apierataraŭ naprošvajecca prostaja jak hrabli vysnova: pryvatnych pravajderaŭ staviać na miažu vyžyvańnia pierad pieradziełam rynku. Schiema, hadami abkatanaja u susiedniaj Rasii i nazvanaja «rejderskim zachopam», pieraduhledžvaje prychod «surjoznaha hulca», jaki zmoža zacikavić patrebnych čynoŭnikaŭ ad suviazi i bieź lišniaha šumu za kapiejki zahrebci sabie častku pierśpiektyŭnaha rynku. U kančatkovym vyrašeńni pytańnia zacikaŭlenyja kitajskija i rasijskija karparacyi, jakija padtrymlivajucca tak zvanymi «hienierałami» haliny.

• 0
• 0
• 0
• 0
• 0
• 0
• 0
• 0