Biełarusy kinulisia hladzieć sieryjał pra chimkinskich viadźmarak. Što?

«Chimkinskija viadźmarki» — prajekt rasijskaha telekanała STS. Raskazvaje jon pra troch siabrovak, jakija majuć svoj sałon mahii i ezateryki ŭ handlovym centry ŭ padmaskoŭnych Chimkach. Dziaŭčaty nosiać čornyja trykatažnyja płaščy z kapturami, a pad ich časam nadziavajuć nakładnyja rohi i adzieńnie ŭ ablipku — nijakaj pavahi da mahii!

Pry hetym šaptuchi tolki prykidvajucca, što majuć mahičnyja zdolnaści, nasamreč jany — afierystki. I pakul psieŭdaviadźmarki strasajuć hrošy za źniaćcie psuty i inšyja radaści, brat adnoj ź ich abšukvaje sacsietki čarhovaj achviary, a vyniki padkazvaje šaptucham u navušnik. Klijenty šakavanyja: jak šaptuchi tolki daviedvajucca pra ich takoje!

Ale tut na šlachu dziaŭčat sustrakajecca sapraŭdnaja viadźmarka. Jana pieradaje im svaje zdolnaści, i šaptuchi na heta zhodnyja, bo žadajuć pavyrašać ułasnyja prablemy. Naprykład, muž adnoj z klijentak pahražaje dziaŭčatam kryminalnym artykułam, ale zdolny zabycca na ich isnavańnie, kali atrymaje hihancki vodkup.

Tamu chimkinskija afierystki pahadžajucca pryniać zdolnaści, nie razumiejučy całkam, što jany sapraŭdy atrymajuć tyja dary. A kali ŭsio ž ich atrymlivajuć, uśviedamlajuć, što na ich zdolnaści paluje niechta jašče.

Z pačućciom humaru ŭ scenarystaŭ hetaj kamiedyi składana. Naprykład, voś vam adzin z žartaŭ. Viadźmarka vyrašaje vyklikać duch inšaj viadźmarki-niabožčycy, ale maje tolki jaje imia — Praskoŭja. Ale na toje imia adhukajecca nie sama viadźmarka, a inšyja Praskoŭi, jakich u rasijskaj historyi było bahata, i viadźmarka musić ich usich ciarpieć.

Dy i ŭvohule, «Chimkinskija viadźmarki» — nievynosna pusty i biessensoŭny sieryjał. Heta historyja pra papularny naratyŭ u postsavieckaj mientalnaści, kali machlaryć pa drobiazi całkam narmalna. Maralnuju miažu pry hetym stavić sam čałaviek, časta jon i nie ličyć siabie machlarom: maŭlaŭ, trochi abyšoŭ sistemu, kradzie ŭ bahatych, dy i prosta nie trapiŭsia, a heta hałoŭnaje.

Hetaja historyja šmat kamu znajomaja. A kali sam prajšoŭ praz taki dośvied, lahčej atajasamić siabie z anałahičnymi piersanažami, to-bok i papieražyvać za ich.

Pavialičyć

Ale hałoŭnaje nie heta. «Chimkinskija viadźmarki» zadavalniajuć charakternuju dla šmat kaho prahu. Kali žyćcio i tak składanaje, jość dva varyjanty: albo pahruzicca ŭ palityku i naviny, sprabujučy zachavać iluziju kantrolu, albo adčajna šukać sposaby adciahnuć uvahu. 

U stvaralnikaŭ «Chimkinskich viadźmarak» atrymałasia, pa sutnaści, niaśmiešnaja kamiedyja z hierainiami, jakija nie čaplajuć, i ź siužetam, jaki nie maje vialikaha sensu. Ale ŭ hetym i sakret papularnaści prajekta.

Amatary takich filmaŭ i sieryjałaŭ nazyvajuć ich lohkimi. Ich možna ŭklučyć navat fonam i nie zvažać uvahi na detali siužetu, bo ŭsio roŭna, kali tolki nie pahladziš na ekran, tam budzie adno i toje ž: šaptuchi vyklikajuć duchaŭ i zadziorysta biehajuć ad pieraślednikaŭ u adzieńni, za jakoje sapraŭdnyja viadźmarki adpravili b ich na vohnišča.

Ruskamoŭnaja aŭdytoryja sieryjał acaniła: naprykład, na «Kinapošuku», bujnym rasijskim kinaresursie, u prajekta salidny rejtynh — 8,1 bała. Taki voś pradukt u duchu sučasnaj realnaści.

• 2
• 0
• 3
• 14
• 0
• 0
• 0
• 0